LUKI 2

Ziizɛ ɣaa ʋai

1Na maziɛ su ɣalaso gwalai Siiza Ɔgɔseta woo leveni ga kɛni ta nu pɛ daa ziɣi zui zu. 2Nii ɣa é ɣɛni ga daa‐ziɣi‐wo faa maa wũgi Kwaliinia ɣɛi ma ga gɔmɛti nu walai Siilia yui zu. 3Nu pɛ ge liini wulu vele zu ga te te laa ziɣi. 4Zoosɛ ƃalaa wuloni Nazɔi lai zu Geealali yui zu é li Deeve ɣaa lai zu daa ga Bɛfelehɛ̃ɛ é Yudiiya yui zu. Ƃɔvɛlaale é ɣɛni ga Deeve vɛlɛi manu zuwui ta. 5É liini ga ta Meele te ta laa‐zeigi ziɣi, Meele nii é ɣɛ ga ná tabolo wɛ̃ɛ, é wɔnɔ ga nui ko ge ɣɛni ba. 6Tei te ɣɛni na, siɛgi ziitini ga Meele laa yii. 7É ná zunu luu maa wũgi ɣa sa é maa ƃiti ga seɣe é da nikɛ laa‐mii wologi zu, ƃɔvɛlaale daa‐zu lɛ ŋɛni te ʋaa ma wɛ̃ɛ vɛlɛi wu.

Baala‐maazu‐ʋɛtɛ beaitiɛ ƃɔga Gala ta ɣeelaitiɛ

8Tɔwɔ baala‐maazu‐vɛtɛ bea te ɣɛni ná ligi zu yupu‐yupugi zu tiɛ ta vaala kpulugi maazu vɛtɛ ga kpidi. 9De maliɣii Gala na keelai wuloni te ɣaazu. De maliɣii na saala‐malai te maa wodoni è ɣɛ ŋada wodoa. Te laa ʋeni ga duo. 10Gala ta ɣeelai ɣɛni te ma, “A mɛ lɛ luo. A wɛlɛ! Gè vaa wo wɔ ga woo niinɛ vagɔi é vile kuu‐zu‐nɛɛ ƃakpa walai nii va yá va nu ƃuse yaazɔ wɔ. 11Su‐wulo‐zu ɣa ga wo valo nu ɣaavɛ zaa Deeve ɣaa lai zu, nii é ga Kolai, de maliɣii. 12Nii ɣa wa kwɛ̃ɛ da. Wa wɛlɛ duuyɛ̃ ba máa ƃitigɛi ga seɣe é laani nikɛ laa‐mii wologi zu.” 13Nà ɣɛɛni ƃɔɔ nɔ Gala ta vea te maƃulu gwala sa Gala ta ɣeelai va tiɛ Gala daa maa lɛ tiɛ ɣɛ tea,

14“Bɔɔlɔla ɣɛ Gala zeea gee‐zuvɛ.

Yá ɣɛ na kɔnɔ ga zui mavele, zii‐laa ɣɛ numai niitiɛ zaama te maʋai lai ga zíi.”

15Tei Gala ta ɣeelaitiɛ te ziɣini baala‐maazu‐vɛtɛ beaitiɛ wɔ vɛ te lɛ gee‐zuvɛ, baala‐maazu‐vɛtɛ beaitiɛ ƃɔɔ te ɣɛni ɣii ma, “A dii Bɛfelehɛ̃ɛ de wɛlɛ fai nii va é ɣɛɛ, nii de maliɣii maʋaa wuloa kɛnɛ ma de ɣaazu.” 16Te liini sa ga gaazu‐ʋile te wɛlɛ Meele va ta Zoosɛ, duuyɛ̃gi wɔ ge sa laani nikɛ laa‐mii wologi zu. 17Tei te wɛlɛni duuyɛ̃gi va, fai nii sa é woni te ma é vile lopoi va te kɛɛni numaitiɛ te kwɛ̃. 18Taitiɛ nɛpɛ te fai nii mɛnini baala‐maazu‐vɛtɛ beaitiɛ te boni é vilini te ma ga ki‐gaa‐ziɛ. 19Kɛ̀ Meele niitiɛ ɣaazɔ laa‐zu ɣɛɛni yii zu yíɛ ɣi gaa ziɛ te ma. 20Baala‐maazu‐vɛtɛ beaitiɛ te liini sa wulu tiɛ ƃaa la Gala ma tiɛ daa maa lɛ fai nii ɣaazɔ ma te pɛtɛni ta nii te mɛnini è ɣɛ velei nɔ te boni la te ma.

Te daa‐zei seini Ziizɛ ʋa

21Tei te Ziize ɣaani folo lɔsava leve, te seini kpoto ma te dáa zei ga Ziizɛ. Daa‐zeigi nii ɣa Gala ta ɣeelai dáa woni tɔ teɣa ɣɛ mawogi ziɣizu.

Te Ziizɛ laa wona boni Gala‐feli wɔta walai wu

22Tei siɛgi ziitini te maa‐wuo ʋai ma è ɣɛ velei Mooze na tɔgi laa woi ɣɛni la, te vaani ga Ziizɛ Yɛlusulɛɛ te dáa wona bo de maliɣii Gala ma. 23Te na ɣɛɛni ga velei ponɛi ɣɛ la de maliɣii Gala na tɔgi zu mawoi ga “Zunu lui nɛpɛ yá ɣɛ ga dée ƃea luu ta tíli ga nui kuloai su ga tee ga Gala na dɔ.” 24Te liini kɔnɔ ga te ƃiiƃɔku felegɔ wulo ga zalaɣa ɔɔ wopo niinɛ felegɔ, è ɣɛ velei bogɛi la de maliɣii na tɔgi zu.

25Tɔwɔ zunu ta ɣɛni Yɛlusulɛɛ lai zu dáa ga Simiã. Zunui nii ɣɛni ga tele‐bo tuo‐wo nu é ga nui wũ kpadogɛi ɣɛ Gala faa va yíɛ Yezɔitiɛ ɣaa‐nɛkpɛsu maa kpowũ. Gala baa ŋinɛgi ɣɛni koba. 26Gala baa ŋinɛgi kuloni kɛnɛ ma gáazu ga saa lɛ pɛtɛga é yɛsu é wɛlɛ de maliɣii Gala na nui va é yee ƃadoga ba, na ɣa ga Kolai. 27Puu vele ma zíi zu Gala baa ŋinɛgi vɛ é vaani Gala‐feli wɔta walai wu. Tei sa lopoi Ziizɛ ɣaa veaitiɛ te vaani la Gala‐feli wɔta walai wu ga velei tɔgi boga la te kɛɛ la ŋɛ na, 28Simiã é Ziizɛ ziɣini é sei yee lɔkɔ zu. É Gala daa maa lɛɛni sa yíɛ ɣɛ tea,

29“Màliɣii Gala, ƃe sa ba nài gè ga yà lii‐ɣɛɛ nui

gè li zii‐laa zu,

è ɣɛ velei è boga la.

30Toku ge zei ga gè ɣaazu laa yà valolai ma.

31Na ɣa ga nii è maʋaa ɣavele ƃɛtɛɛ nu pɛ gaazu ma,

32nii é ga ŋada wodoai yá è maʋai wulo kɛnɛ ma

zii ƃalaagitiɛ ɣaazu,

tɔwɔ é ga ƃaa‐la‐ma ʋaa yà numaitiɛ ʋaa ma,

na ɣa ga Yezɔitiɛ.”

33Fai é woni é vile Ziizɛ maluuyɛ̃gi va é vilini dée ma ga ki‐gaa‐ziɛ ta kéea. 34Simiã tuuyiɛ loo sa te ma. É ɣɛni dée Meele ma, “Wɛlɛ! Lopoi wulovɛ su ga tee nu lamaa loo ʋaa ma bu ta nu lamaa wu‐ziɣi ʋaa ma Yezɔitiɛ zaama. Kulovɛ su wɔnɔ ga tee ga po‐kɔ̃ɔgi nii nu lamaa ɣa ɣɛlɛ ba, 35kɛɛ ʋaa ma nu lamaa wuu‐zu ɣi ge wulo kɛnɛ ma. Yà ɣagi ƃalaa máʋai ɣa zii‐zuuli ƃakpa vili è yii zu.”

36Gala daa woo‐wo ŋaza nu ɣɛni na dáa ga Ana é ga Faanɔwɛ duu. Faanɔwɛ ɣɛni ga Asɛ nu zuwui ta. Ana wɔlɔ zaɣagɛi ɣɛ ga ʋikɛ. É kɛɛni pɔɔ nui ya ga kwena dɔfela é ziɣi kpea ʋolo ma, pɔɔ nui wɔ ge za sa. 37É yɛni ga po ŋazai nii zini gɛ lɛ ŋɛni bɛ́ é yɛsu kaa wenagi ɣɛ ga kwena zee lɔsava kai naa. Ɛ́ lɛ wuloni Gala‐feli wɔta walai va. É ɣɛni Gala zeke kɛɛzu zi‐dɔɔ maazu ta Gala‐felia kpidi vɛɛ folo va. 38Siɛgi na zu te ɣɛni la Gala‐feli wɔta walai wu ta Simiãni, nà maziɛ kpɔɔƃɔɔgi nɔ ɣa Ana wuloni ma é mama fe Gala bɛ é ƃɔɛ é vile lopoi Ziizɛ va niitiɛ ɣaazɔ wɔ te ɣaazu ɣɛni Yɛlusulɛɛ wũ‐maa‐wo fai luo.

Te lii ʋai wulu Nazɔi lai zu

39Tei sa te fai pɛ kɛɛni è ɣɛ velei nɔ de maliɣii na tɔgi boga la, te galeni ma te li te wɔ taa zu Nazɔi lai zu Geealali yui zu. 40Lopoi wɔɔlɔni sú ƃaa, daa ʋegɛi ga kele‐ɣele. Na ɣa ɣɛɛ na Gala na tuuyiɛ ɣɛni ma.

Zunu lomai Ziizɛ ɣɛɛ ʋai Gala‐feli wɔta walai wu

41Ziizɛ ɣaa veaitiɛ tɔ li Yɛlusulɛɛ teve‐maazu wui ma ga kwena‐kulo vele ɣile‐gile. 42Tei sa é kwena kɛɛni puu kai fele, te liini na è ɣɛ velei é ɣɛni la ga te ɣɛɛ ʋaa wɔlɔ‐zaɣa. 43Tei kui‐ɣaa ʋai wuloni ba tiɛ li wulu, zunu lomai Ziizɛ yɛni na wulu Yɛlusulɛɛ. Káa veaitiɛ tɛ lɛ ŋɛni ga kwɛ̃ɛga, 44kɛ̀ te ɣɛni kaazu ga tɔ nu ƃulugi zaama. Te tuola ɣila siɛ wo sa. Te gaa ziɛni te ɣaa yɔ̃wɔitiɛ zaama ta te ɣaazu‐wɛ̃ɛgitiɛ. 45Tei tɛ lɛ ŋɛni pɛtɛni, te liini wulu Yɛlusulɛɛ tiɛ gaa ziɛ. 46Tei sa folo saagɔ leveni, te wɛlɛni ba Gala‐feli wɔta walai wu é zeini kala‐mɔitiɛ zaama yíɛ wui to te woo ma yíɛ gaa‐zaɣa‐kɛɛ vili te ma. 47Taitiɛ nɛpɛ te goo mɛnini, ná faa ɣaa‐ɣaa velei vɛɛ faitiɛ va é ɣɛni te ɣaa wotesu é wuloni ga tiɛ ga kpakpaa. 48Tei kaa veaitiɛ te pɛtɛni, é vilini te ma ga ki‐gaa‐ziɛ. Dée ɣɛni ma, “Dùu, zɛƃɛ luo ɣa è boga ga gíɛ ŋɛ ni? Wɛlɛ, gá è yeea gé yɛga è ɣaa ziɛzu ʋɛnɛɛ.” 49É ɣɛ te ma, “Tɔ ɣɛ le wo yɛga fò‐fo wulozu su? ?Wɛ lɛ ŋɛni kwɛ̃ni ga kɛni gà ɣɛ kèea na pɛlɛi wu?” 50Tɔwɔ tɛ lɛ nii ɣaa yaani é boni te ma. 51É vile sa te wulu ta tiɛni te va Nazɔi lai zu. Na ɣa ɣɛɛ na é ɣɛni ga goo‐mɛni duu te ya. Dée é nii ɣaazɔ laa‐zu ɣɛɛni ɣi su. 52Ziizɛ wɔɔlɔni kele‐ɣele su é wɔɔlɔ wɔnɔ kpigi zu é wɔɔlɔ wɔnɔ Gala zii‐laa ʋai zu ta nu ƃuse.

Currently Selected:

LUKI 2: DN1971

Highlight

Copy

Compare