JĨI 5

Nii é kpɛtɛ vea laa ma

1A nii mɛni, wai wo ga kpɛtɛ veaitiɛ. A wɔlɔ wiɛ loba ga kpee faa ƃoei ʋaa ma é vaazu ziitizu wo ma. 2Wa ƃɛtɛ ŋɛniitiɛ te luulea, wa yogbogitiɛ miai gove ŋɛnia vɛ. 3Wa zɛniga vɛɛ maɣaniga va koi‐koi ge te mia. Tɔwɔ te mawoi‐koigi ɣa ɣɛ ga seelei yá faa yɛ wo ma. Towaa wo lɔtɔi mi è ɣɛ ŋabu ɣa ɣɛ ŋɛni ɣalazu. Wo wa lɔnɔ‐ba ŋɛnii laa‐zu ɣɛɛ sa siɛ‐gaa‐ƃelagi nii zu. 4A wɛlɛ! Taitiɛ te tii ɣɛɛ wa ƃalagitiɛ zu, wo te ʋɔɔnɛi yɛ na wulu ga woia pele, te ʋɔɔnɛitiɛ maa woo ɣa lɛɛzu. Tɔwɔ tii‐ɣɛɛ veaitiɛ te wɔlɔ woi loa nui nii wui zu é ga kɔɔ ƃɔgi maliɣii. 5Wo ɣɛɛvɛ ŋeteai ɣɛɛzu zui zu ga zii‐ma‐ɣɛɛ ƃakpa‐woga wiɛ niitiɛ ɣɛ te lai wo yii ma. Wo ƃɔɔ ɣaa wɔga ga wo mawulo ɣɛ ba wo vaa ʋoloi ʋaa ma. 6Wo faa vɛɛ tele‐bo tuo‐wo nui va wo paa. Ɛ́ lɛ losu wo la.

Zii‐lɔɔ ƃɔga Gala‐felia

7Na ma, nà numaa, a yii lɔ é yɛsu de maliɣii vaa ʋolo ziiti. A wɛlɛ! Kpala‐ga lii‐ɣɛɛ nui ɣa ɣɛ ná tɔnɔ‐ba zii‐zii ŋɛni zu‐mɔsɔgi maa kpowũsu yá ƃɛtɛ zui ma yíɛ kɛ ga zii‐laa é yɛsu tine maa wũgi pu ma ta na wulu ɣelei. 8Wa ƃalaa a yii lɔ. A yii zo kpãa, toku ge zei ga de maliɣii vaa ʋai zu ƃua. 9Nà numaa, a mɛ lɛ ɣɛ zili zaɣazu ɣiíni ma, kɛɛ ʋaa ma faa mɛ lɛ va yɛsu wo ma. A wɛlɛ! Faa‐wo gaa‐leve nui ɣa sa loni pɛlɛi la. 10Nà numaa, Gala daa woo‐wo beaitiɛ te ƃɔɛni de maliɣii na daa‐zeigi zu, a natiɛ ziɣi ga po‐kɔ̃ɔ daa‐nɔwɔ‐wogi ʋaa ma ta zii‐lɔi. 11A wɛlɛ! Niitiɛ te loni kpãa ta ɣa da te lili ga numaitiɛ kuu‐zu‐nɛɛ te ya. Wo faa mɛniga é vile Joobi lo fai va kpãa wo wɛlɛ kɔnɔ nii va de maliɣii ɣɛni pulu. Na ɣa ga velei nu maa‐wõi ɣa loo la de maliɣii ma ta velei é la ga maa‐wõi‐ɣaa‐wo nu.

12Kɛ̀ nà numaa, nii é fai pɛ maazu tɔ ga wo mɛ lɛ wona gee wɔlɔgi ma ɔ́ nɔ ɣɛ ga zui ɔɔ ŋɛni ta ƃɔnɔ nɛpɛ. Kɛ̀ a ƃe ba wa “ooigi” ɣɛ nɔ ga “ooi”, wa “ƃagi” ɣɛ ga “ƃa”, kɛɛ ʋaa ma wo mɛ lɛ loo faa‐yɛ‐ma ʋaa zu.

13?Nu ta nɛpɛ ka wo zaama yíɛ laa nɔwɔ wo? Ani tɔ ŋɛ na, pagɛi manui Gala feli.? Nu ta nɛpɛ kuu zu nɛɛvɛ? Ani tɔ ŋɛ na, pagɛ manui Gala maa wui. 14?Nu ta nɛpɛ ka zeeƃɛzu wo zaama? Ani tɔ ŋɛ na, pagɛ manui Gala pɛlɛi malo‐tuoitiɛ maa‐lili bo ga te Gala feli ma tiɛ gulo wu wũmɔ de maliɣii na daa‐zeigi zu. 15Na ɣa ɣɛɛ na Gala‐feliai nii yá ɣɛ zee‐la‐ma zu towaa seeƃɛ nui ƃɔɔ valo. De maliɣii ɣa manui wu ziɣi. Ani wɔnɔ manui faa yowũ ɣɛɛ, su ʋaa ɣa yɛ. 16Na ma a wiɛ wa ʋaa yowũitiɛ wulo la wiɛ bo ɣii ma wiɛ Gala feli ɣiini faa ma ga wo valo. Tele‐bo tuo‐wo nui na Gala‐feliai wala ɣaa ɣa ƃaa su‐ʋai‐ɣɛɛ ʋai zu. 17Yiilaija ɣɛni nɔ ga de ɣavele. Kɛ̀ tɔwɔ é Gala felini ƃɔɔ sɔƃɛlɛ maʋaa zu ga tine mɛ lɛ pu. Tine wɔ gɛ lɛ puuni zui ma kwena saagɔ ɣalo dɔzita yee wu. 18É zɛba do kɔnɔ é Gala feli, gee wɔlɔgi zui wɔ ga tine sii‐zii ŋɛniitiɛ te ƃɛtɛ zui ma.

19Nà numaa, ani wo ta nɛpɛ ka ziɣi na gaamai wulu nu ta va ga manui wulu, 20pagɛi é kwɛ̃ɛ ga nui yá nu ziɣi ná pele‐ma lala luoi wulu é vaa la wulu, towaa manui wulo saa ya é zɛʋui yɛ zéea. Nà wɔ ka ɣɛɛ na faa yowũ lama‐lama ka na yá maazu vɛɛ.

Currently Selected:

JĨI 5: DN1971

Highlight

Copy

Compare