1 PITE 1
1
Daali‐mai
1Nài gè ga Pite gè ga Ziizɛ Kolai na keelai ta, gà kɔlɔi nii wonɛzu wo wɔ, wai wo wuloai wa yui va wo yɛzɛgɛi zui niitiɛ zu. Natiɛ ta ga Pɔ̃tɛ, Galeesia, Kɛpɛdoosia, Eezia é vɛɛ Betenia va. 2De ɣeea Gala ge yee ƃadoni wo va é fai nii la wo luo é vaazu ɣɛɛzu ga wiɛ. Gala baa ŋinɛgi wɔ ka é wo wuloa su ga tee ga Gala na dɔa wo ɣɛɛ ʋai ma ga goo‐mɛni‐kulo vea Ziizɛ Kolai ya ta Ziizɛ maŋamai‐ʋaza fai wo ma. Maa‐wõi‐ɣaa ƃɔ‐ba ƃɔga zii‐laa te zu ɣa wɔɔlɔ ma wo ʋaa ma fãa.
Ki‐togi su ʋai ɣa leve ma ti
3Kaze lɛ Galagi nii ma é ga de maliɣii Ziizɛ Kolai keea é ga ná Galagi! Ná gaazu‐maa‐wõi‐ɣaa walai mavele ma é kɛɛ de kaa niinɛda maa zɔlɔ wo, kɛɛ ʋaa ma de ɣi‐to‐su ɣɛ ma. Na ɣa ga ki‐togi bogɛi ga diɛ su ʋai ɣa leve ma ti. Gala ge nii ɣɛɛni Ziizɛ Kolai wu‐ziɣi vele ma bɛ́ saa ya. 4Gala ge kɛɛ wɔnɔ de kaa niinɛda maa zɔlɔ wo kɛɛ ʋaa ma de ŋɛnii nii zɔlɔ wo ga weli nii lɛ ŋala‐ŋalaga, maa ziɣiai, gaazu lɛ wuloa ba. Daazu ɣɛɛvɛ Gala ta wo ʋaa ma, 5waitiɛ Gala ge ƃaazu wo maazu ga ná gaa‐ƃai wa yee‐la‐mai zaala zu é yɛsu wo balolai maa zɔlɔ wo. Na ɣa ga balolai nii kavele ƃɛtɛi ga é wulo kɛnɛ ma wo ɣaazu gaa‐ƃela‐suvɛ. 6Nii ɣaazɔ mavele ma wa kuu‐zu‐nɛɛ wulozu, velei ƃalaa dɛ wo vaazu laa nɔwɔ wosu la ga ta wolo wo wɔ̃ɔ‐kɔ̃ɔ fai zu faa ƃaa sii ɣile‐gilegitiɛ zu ta vile wiɛ. 7Niitiɛ ta ɣɛ te dɛ ga ani wa yee‐la‐mai ɣa ga gaama, na ɣa ga zee‐la‐mai nii tɔnɔ wɔɔlɔi ba é leve zɛni ba nii ta seka te pu kɛɛ ʋaa ma te kwɛ̃ɛ ga ani tɔ ga zɛni kpɔɔƃɔɔ, velei ƃalaa é la ga kãla‐ŋala ŋɛni. Pele zii ɣilagi nii nɔ zu, ta wo wɔ̃ɔ‐kɔ̃ɔ kɛɛ ʋaa ma ani wa yee‐la‐mai ɣa ga gaama, daa‐maa‐lɛɛ wo ga wiɛ, saala la wo ma, wũfe‐ma ɣɛ wo vɛ. Niitiɛ ta ɣɛ ga foloi Ziizɛ Kolai ɣa wulo la kɛnɛ ma. 8Velei ƃalaa wɛ lɛ dɛ Ziizɛ Kolai vɛtɛni la, wo wõivɛ la. To mu wɛ lɛ pɛtɛsu. Na ƃalaa ɣɛɛvɛ máʋaa ziɣivɛ wiɛ ga gaama wiɛ kuu‐zu‐nɛɛ ƃakpa wulo máʋaa ma. Na ɣa ga kuu‐zu‐nɛi nii nu lɛ su‐wulo vele ɣaa. 9Wa balolai maa zɔlɔ wo wo yɛʋui yɛ wo ya ga wa yee‐la‐mai zu‐lɔnɔ.
10Gala daa woo‐wo beai niitiɛ te Gala daa woi woni é vile maa‐wõi‐ɣaa ƃɔ‐bai nii va é vaazu ɣɛɛzu ga wo wo te balolai nii maʋaa wu ɣaa ziɛni tiɛ gaa‐zaɣa‐kɛɛ wo é vile ba. 11Kolai vaa ŋinɛgi é ɣɛni Gala daa woo‐wo beaitiɛ ɣigi zu é Kolai laa‐nɔwɔ‐wo fai yɛni ná luo é bo é vɛɛ saala‐malai va ɔ́ maa zɔlɔ wo na wulu. Na ɣa ɣɛɛ na Gala daa woo‐wo beaitiɛ te siɛgi maɣaa‐zaɣa‐kɛɛ woni fai nii ɔ́ ɣɛɛ la ta velei ɔ́ ɣɛɛ la. 12É wuloni kɛnɛ ma te ɣaazu ga tɛ lɛ ŋɛni tii ɣɛɛzu ƃɔɔ ʋaa ma, kɛ̀ wa ɣa te ɣɛ kɛɛzu wo ʋaa ma. Nii ɣɛɛvɛ faitiɛ zu te wogɛi sa wo ma ga seeze numai niitiɛ vɛ te woo niinɛ vagɔi woni wo ma Gala baa ŋinɛgi zaala zu tevegɛi é wulo Gala ta é va. Fai niitiɛ ɣa Gala ta ɣeelaa te ná maa‐wõi‐wõi kulozu ga te ɣaazu lɔ su.
Tili bogai ŋetea maa wuai ma
13Na ma a wa ɣi‐gaa‐ziɛi ɣavele ƃɛtɛ é lo kpãa wo ɣaa yii wo ɣi togɛi maa‐wõi‐ɣaa ƃɔ‐bai va ga daa ʋega. Na ɣa ga kpɔ‐bai nii é vaazu wosu ga wiɛ Ziizɛ Kolai maʋai wulo‐zuvɛ kɛnɛ ma. 14È ɣɛ velei wo la ga goo‐mɛni‐kulo vea, a mɛ lɛ vile ŋɛni‐wõi‐leve‐ma luoi wulu wo yɛga wɔlɔ bosu liti su. 15Kɛ̀ a wiɛ luo ga maa wua è ɣɛ velei nui nii maa wuai la é wo liliga. A ɣɛ ga nui maa wuai wo luo velei ɣaazɔ zu, 16toku ge zei ga ponɛvɛ Gala kɔlɔi zu Gala giɛ ɣɛ tea, “A ɣɛ ga nui maa wuai, ƃɔvɛlaale màa wuovɛ.”
17Nui nii yá nu ɣile‐giledai na faa‐wo gaa leve ga velei nɔ manui ɣɛɛ‐zɔgi ɣa ɣɛɛ la su‐yɛvɛ faa lɛ ɣɛɛ ba, ani wa ɣɛ na nà lilisu ga wo ɣeea, a wiɛ luo ga duo vele é yɛsu wo wuloi bogɛi wa yui va mawui ƃea ga wo li wulu. 18Wo kwɛ̃ni ga wo wũ maa wogɛ wo wulo wa lɔnɔ‐ba lala luoi zu wo siɣia wo mama gwɔlɔni zeea. Wũ‐maa‐wogi lɛ woni ga ŋɛnii niitiɛ ta ŋala‐ŋala, è ɣɛ velei kani ge la ta zɛni. 19Kɛ̀ é woni ga Kolai maŋamai nii tɔnɔ wɔɔlɔi ba, è ɣɛ velei baala zuwui nii la kawɔ‐zu lɛ ba ɔ́ nɔ ɣɛ ga ŋɛni ta nɛpɛ po ge ɣɛ ba nà maŋamai. 20Gala ge maʋai yɛni ná luo é deʋe ŋeteai maʋaa lɔɔ ɔ́ vɛɛ zeizu, kɛ̀ máʋaa wuloni kɔnɔ kɛnɛ ma siɛ gaa‐ƃelagi nii zu wo mazaƃu ma. 21Sáala zu ɣa wo lai la ga Gala nii é bú ziɣini saa ya é saala la má, na ma wo laavɛ ga Gala wo ɣi togɛi bá.
22Tei tɔwɔ wo yɛʋui maa wua goo‐mɛni‐kulo vele ma wiɛ gaamai zu ga wo wõi ga wo vaitiɛ ga ƃɔɔƃɔɔ su, a wõi ga ɣiini ga ƃɔɔƃɔɔ su wiɛ kulo yii zu wiɛ kɛ. 23Wo ɣaavɛ kɔnɔ ga niinɛ. Wɛ lɛ wuloni nu zuwui nii zu sú ɣa ŋala‐ŋala. Kɛ̀ wo wulovɛ nii zu sú lɛ ŋala‐ŋalaga Gala daa woi nii zaala zu é ga ʋululai mawoi é wɔnɔ ga woi yá yɛ ma wɔ. 24Toku ge zei ga ponɛvɛ Gala kɔlɔi zu mawoi ga
“Nu ƃuse ŋeteai ɣaazɔ maʋaa wulovɛ ga gui ɣavele,
mazaala‐malai ɣaazɔ ga gui mawuoi ɣavele.
Gui ɣa woto‐woto, mawuoi wɔ ge wulo gá é loo.
25Kɛ̀ de maliɣii woi ɣa ɣɛ ma wɔlɔ‐wɔlɔ ta wɔlɔ‐wɔlɔ.”
Woi na ɣa ga woo niinɛ vagɔi é woni wo ma.
Currently Selected:
1 PITE 1: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
