TE ƔƐƐ VAITIƐ 23

1Pɔɔ ɣaazu ƃakogɛi ɣɛ faa‐wo‐bo kpɔgi va é ɣɛ tea, “Nà numaa, kɛ̀ɛvɛ ŋeteai ɣɛɛzu Gala gaazu ga ki pagɔ fai ɣaazɔ zu é yɛsu é ziiti za ʋoloi ma.” 2Laa‐ʋaale gwalai Ananaiya é numaitiɛ leʋeni te ɣɛni loni koba ga te fala dáavɛ. 3Pɔɔ zɛba é ɣɛ ma, “Gala ka è ʋala, yài è maʋaa wuloai è ɣɛ siɣigi kobegɛi!? Yà zeini vɛ ga è nà faa‐wogi wo ga velei tɔgi la è vɛɛ kɔnɔ ga deʋe woga ga te fàla nii ɛ́ lɛ tɔ su?” 4Niitiɛ te ɣɛni loni ná woba te ɣɛni tea, “?Yà Gala na laa‐ʋaale gwalai laa woo zu loo ga yowũa?” 5Pɔɔ ɣɛ tea, “Gɛ̀ lɛ ŋɛni kwɛ̃ni, nà numaa, ga towaa é ga laa‐ʋaale gwalai. Ƃɔvɛlaale ponɛvɛ ŋɛ ni yíɛ wo ga ‘Mɛ lɛ faa yowũ wo ɔ́ vile yá numaitiɛ te maazu nui va.’ ”

6Kɛ̀ tei Pɔɔ wɛlɛni ná va ga te taniga te ɣɛni ga Sadusia taniga te ga Favilesiitiɛ, é lobani faa‐wo‐bo kpɔgi zu yíɛ ɣɛ tea, “Nà numaa, gà ga Favilesi ta gè ga Favilesiitiɛ te luu. Nà ki‐gaa‐ziɛi ga saa vea ta wu ziɣi saa ya towa é faa‐wo pilega bà.” 7Tei é nii woni, daaza looni Favilesiitiɛ yɔɔzu ta Sadusiitiɛ. Na ɣa ɣɛɛ na kpɔgi ɣaa wɛɛni su fele. 8Ƃɔvɛlaale Sadusiitiɛ ta bo ga saa nu lɛ wu ziɣia saa ya ɔ́ nɔ ɣɛ ga Gala ta ɣeela ɣɛ ma ta gɔʋɛ. Kɛ̀ Favilesiitiɛ ta laa wu ziɣizu ma tiɛ bo ga nii ɣaazɔ ɣa ga gaama. 9Na ma kpɔɛ ƃakpa leveni. Wuigi niitiɛ te ɣɛni Favilesiitiɛ zaama te taniga te lo te ɣili nii woga va tiɛ ɣɛ tea, “Gɛ́ dɛ faa ta nɛpɛ pɛtɛni zunui nii va. Kilaa ʋaa zu ani gɔʋɛ ve ƃaa Gala ta ɣeela ƃɔɛni pɔ́?” 10Tei sa daazai ɣɛɛni ga ŋapi sɔdasi maazu nu walai wɔ gíɛ luo ga te mɛ lɛ Pɔɔ ƃolo‐kpolo ba tɔ kɛ su kpulu‐kpulu, é sɔdasiitiɛ leʋeni ga te kulo te zaama ga gaa‐ƃaa te lɛɛ la sɔdasi vɛlɛi zu.

11Na wulu ƃidi de maliɣii loni Pɔɔ woba é ɣɛ ma, “Yii lɔ, ƃɔvɛlaale è ɣɛ velei nɔ è seele woo ʋeea la bɛ̀ Yɛlusulɛɛ, vele nɔ na maa nɛɛ è seele woo ʋee la bɛ̀ Loomɛ lai zu.”

Pɔɔ yɛʋui maa‐ʋuɛ‐loo ʋai

12Tei gela boni Dusiitiɛ te fuɛ looni te ƃɔɔ ɣili ga woto levea ga te mɛ lɛ laa mi ɔ́ nɔ ɣɛ ga te ƃoale é yɛsu te Pɔɔ vaa. 13Taitiɛ te fuɛi nii looni te levegɛi ɣɛ nu yee naagɔ va. 14Te liini laa‐ʋaale gwalaitiɛ wɔ ta nuwutiitiɛ te ɣɛ te ma, “Gé ƃɔɔ ɣilia ƃɔɔƃɔɔ su ga woto levea ga gé mɛ lɛ daa‐mii ŋɛni wɔ̃ɔ é yɛsu gé Pɔɔ vaa. 15Na ma wo vɛɛ sa faa‐wo‐bo kpɔgi va a woo leve na sɔdasi maazu nu walai wɔ vɛ ga é va ga Pɔɔ wo wɔ vɛ, maʋaa ɣa wulo sa è ɣɛ wa ɣɛ vaazu wɛlɛzu ná faa‐wogi zu va ƃɔɔ sɛ‐sɛ. Na ɣa ɣɛɛ na gé ɣavele ƃɛtɛvɛ sa ga gé paa ɔ́ teɣa ɣɛ lɔtɔsu.” 16Tɔwɔ Pɔɔ na seela lui é ta gba‐daa ʋai mɛnini. Na ma é liini é lɛ sɔdasi vɛlɛi zu é bo Pɔɔ ma. 17Pɔɔ wɔ é sɔdasi wũ gile‐gile wũ‐tuo veaitiɛ te gila tili é ɣɛ ma, “Li ga zunu lomai sɔdasi maazu nu walai wɔ, ƃɔvɛlaale faa ta ɣa dá ga é bo ma.” 18Siɣi vele ɣa na é ɣɛ bɛ́ é vaa la sɔdasi maazu nu walai wɔ é ɣɛ ma, “Pilisinei Pɔɔ é tìlini é bo mà ga gè va ga zunu lomai nii è wɔ, tei tɔwɔ faa ta dá ga é bo yìɛ.” 19Sɔdasi maazu nu walai zɛba é lopoi zo zee va. Tei sa é zu wuloni la ná va, é gaa‐zaɣa kɛɛni te felegɔ ŋada laa yíɛ ɣɛ ma, “Zɛƃɛ ɣa é è la ga è bo mà?” 20Nà ɣɛ ma, “Dusiitiɛ te zeiya ma ga te bo yìɛ ga è va ga Pɔɔ faa‐wo‐bo kpɔgi zu ŋina. Maʋaa ɣa wulo sa è ɣɛ ta vaazu gaa‐zaɣa‐kɛɛ wosu ga pele ta ƃɔɔ sɛ‐sɛ é vile ba. 21Kɛ̀ mɛ lɛ ʋa bu te ya. Ƃɔvɛlaale nu liigoi é ta zinaitiɛ zu é zeini gba su maʋaa ma tevegɛ nu yee naagɔ va. Te ƃɔɔ ɣilia ga woto levea ga te mɛ lɛ laa mi ɔ́ nɔ ɣɛ ga te ƃoale é yɛsu te paa. Tɔwɔ te ɣavele ƃɛtɛvɛ sa tiɛ ki‐togi nii maa kpowũ yá wulo è la ga yà va ga Pɔɔ.” 22Na ma sɔdasi maazu nu walai boni lopoi ma ga nà li yíɛ ɣɛ ma, “Mɛ lɛ bo nu ta nɛpɛ ma ga è kɛɛ gè fai nii wɛ̃ɛ.”

Pɔɔ levegɛ gɔmɛti nu walai Fiilesi wɔ vɛ

23É zɛba sa é sɔdasi wũ gile‐gile wũ‐tuo veaitiɛ felegɔ lili é ɣɛ tea, “Ɣalava taawuoi ɣa ziiti na kpidii ʋaa va, a sɔdasi wũ felegɔ ɣavele ƃɛtɛ é vɛɛ soo‐wɔ‐ma vea yee lɔfela va ta kpãi keea vea wũ felegɔ ga te li ƃɔɔ é yɛsu te ziiti Sɛsɔluiya. 24A va ga soo ƃalaa pɛ Pɔɔ ʋaa ma ga é zei kɔ ma wo lii la gɔmɛti nu walai Fiilesi wɔ nɛgbɛlɛ̃i.” 25É kɔlɔ wonɛ sa su woo ga nii ɣavele. É ɣɛni tea,

26“Nài gè ga Kɔlɔdia Lesia gè è luoni, yài è ga gɔmɛti nu walai Fiilesi, gè è luo. 27Zunui nii zogɛi ɣɛ Dusiitiɛ vɛ, te ɣɛ sa vaazu paazu gíɛ wũ kulo te ma gá sɔdasiitiɛ gé kulo te ya, tei sa gé kwɛ̃ɛni ga tɔ ga Loomɛ laa‐zei. 28Tei gè ɣɛni wõizu gè fai nii wɛ̃ɛ te bosu ga dáa, gè vaani la ta ʋaa‐wo kpɔgi zu. 29Gè wɛlɛni ná va ga fai te bosu ga dáa pilegɛ ta lɔgi ʋaa va, kɛ̀ tɛ lɛ kɛɛ‐zɔ ta nɛpɛ boni nii yá kulo bu ga é za su ɔɔ é ɣɛ su kpidi vɛlɛ wu. 30Tei sa gè kwɛ̃ɛni ga tɔ zunui nii maa ʋuɛ loo, gè teveni è wɔ vɛ ga maa ʋilea gè deʋe niitiɛ ya ƃalaa te faa wosu ga dáa ga te nii wo è ɣaazu é ga kɛɛ‐zɔgi te wuu zu.”

31Na ma è ɣɛ velei nɔ te deʋeni la sɔdasiitiɛ ya, te Pɔɔ ziɣini te lii la Ãtepateloi lai zu ga kpidi. 32Tei gela boni, sɔdasiitiɛ te liini wulu sɔdasi vɛlɛi wu é Yɛlusulɛɛ. Te soo‐wɔ‐ma veaitiɛ yɛni na ga ta Pɔɔni te li. 33Tei te vaani Sɛsɔluiya te kɔlɔi ʋe gɔmɛti nu walai ya, te Pɔɔ vileni kakala ƃalaa pɛ. 34Tei é kɔlɔi lodoni, é gaa‐zaɣa‐kɛɛ woni ga vɛ é ga ná nu zui maʋaa va. Tei é kwɛ̃ɛni ga kulovɛ Seliisia, 35é ɣɛni ma, “Gà wɛlɛ yà ʋaa‐wogi zu va ani è ɣɛɛ‐zɔ‐bo beaitiɛ ta vaa na.” É deʋe sa ga Pɔɔ ɣɛ masagi Yɛloo na pɛlɛi wu tiɛ maa ƃɛ.

Currently Selected:

TE ƔƐƐ VAITIƐ 23: DN1971

Highlight

Copy