TE ƔƐƐ VAITIƐ 22

1“Nà numaa wa kèeani, a goo‐zu‐wulo‐kɛi nii mɛni gè vaazu bosu wo ɣaazu nɔ ŋɛ ni.”

2Tei te goo mɛnini yíɛ ƃɔɛ te wɔ Hiiƃulu woi zu, te na ɣɛɛni ƃɔɔ ƃu. É ɣɛ te ma,

3“Gà ga Dusi nu. Te kàani Tasɔ, Seliisia yui zu. Kɛ̀ kùlovɛ su tai nii zu Gameelia wu. Kɔlɔ wɛ̃ɛgɛi bɛ̀ de ɣeeani ta lɔgi mavele ƃɔɔƃɔɔgi zu, ƃɔ̀ɔlɔi Gala faa zu è ɣɛ velei wo ɣaazɔ wo la zai ŋɛ ni. 4Gè pele niinɛi nii zu vea ƃɔɔlani ga gìɛ te vaa ƃalaa. Gɔ̀ te ɣili gìɛ te vili kpidi vɛlɛ wu, na ɣa ga zinaa vɛɛ ŋazaa va, 5è ɣɛ velei laa‐ʋaale gwalai vɛɛ nuwutiitiɛ ta ʋaa‐wo kpɔgi va ta mazeele woo ʋee la bɛ̀. To mu fɔlɔ ta ɣa gè kɔlɔ wuloni te ya ga gè lii la de vaa Lusiitiɛ wɔ. Tɔwɔ gè ɣɛni liizu Dimasikɔ ga gè niitiɛ zo te ɣɛni na ƃalaa pɛ, kɛɛ ʋaa ma te yɛ gili‐zu gè va ga tiɛ Yɛlusulɛɛ ga te tɔ kpɛ tiɛ.

Pɔɔ ɣa luo vele maa‐ʋeli pelei zu wulozu

6“Tei sa gè ɣɛni nà siɛi ma, gè lɔtɔni Dimasikɔ va folo gaa‐lɔ‐ga laa yɔɔzu. Na ɣɛɛni nɔ kpẽi ŋada wodoa wala ta wulo gee‐zuvɛ é màa wodo. 7Gè looni zuwãavɛ gè woi mɛni yíɛ ɣɛ mà, ‘Sɔɔ, Sɔɔ, zɛƃɛi é kɛɛ è kpɔ̀ɔlasu?’ 8Gè gaa wote gè ɣɛ ma, ‘Ƃɛ ɣa ga yìɛ, màliɣii?’ É ɣɛ mà, ‘Nài è kpɔ̀ɔlasu nà ɣa gè ga Nazɔi Yiizɛ.’ 9Tɔwɔ niitiɛ te ɣɛni bà te wɛlɛni ŋada wodoai va, kɛ̀ tɛ lɛ nui nii woi mɛnini é ɣɛni ƃɔɛzu pɔ̀. 10Gè ɣɛni tea, ‘Màliɣii, zɛƃɛ ɣa gà kɛ?’ De maliɣii ɣɛ mà, ‘Wu ziɣi è lɛ Dimasikɔ. Ná ɣa nii ɣaazɔ ɣa wo na yìɛ é è maʋaa ma ga è kɛ.’ 11Tei tɔwɔ gɛ̀ lɛ ƃega zoo gɔ̀ wɛlɛ toku ge zei ŋada wodoai maʋoloi va, taitiɛ te ɣɛni bà te yee looni zèea gé lɛ Dimasikɔ.

12“Zunu ta wɔ ge ɣɛni na daa ga Ananaiya, nii sɔƃɛlɛ ɣɛ Gala na tɔgi ʋaa zu. Dusiitiɛ ɣaazɔ te ɣɛni zeini na tiɛ tɔwɔ vagɔi wo. 13Zunui nii vaani pɔ̀ vɛ, é loni kòbavɛ yíɛ ɣɛ mà, ‘Kàa yɔ̃wɔ Sɔɔ, è ɣaazuvɛ ziɣi ma.’ Nà maziɛgi zu nɔ ɣa gàazuvɛ ziɣini la ma gè wɛlɛ bá. 14É ɣɛni tea, ‘De ɣeeani ta Ɣalagi yee ƃadoga yìɛ ga è zii‐mai wɛ̃ɛ ga è wɛlɛ tele‐bo tuo‐wo nui va è woo mɛni é wulo dá. 15Ƃɔvɛlaale yà vaazu seele woo ʋeezu máʋaa ma nui ɣaazɔ ɣaazu é vile nii va è pɛtɛga è mɛni. 16Na ma minɛɛ è ná maa kpo‐wũsu? Wu ziɣi è bataizei maa zɔlɔ wo yà ʋaa yowũitiɛ te wuo yìɛ, yìɛ ná daa‐zeigi lili.’

Pɔɔ lili fai ga é li zii ƃalaagitiɛ wɔ vɛ

17“Tei gè liini wulu Yɛlusulɛɛ gìɛ Gala feli Gala‐feli wɔta walai wu, máʋaa wuloni sa è ɣɛ gɔ̀ ɣɛ zesu 18gè wɛlɛ màliɣii va yíɛ ɣɛ mà, ‘Kɛ́ ɣaʋu è wulo Yɛlusulɛɛ va ga maa ʋilea, ƃɔvɛlaale tɛ lɛ vaazu yee zeizu yà zeele woi wu pilegɛi bà.’ 19Gè ɣɛ ma, ‘Màliɣii, ta ƃɔɔ te kwɛ̃ni ga niitiɛ te è maʋaa ziɣini ga gaama kɛ̀ɛvɛ te wulozu Gala‐feli wɔtai ɣaazɔ wu gìɛ te wu kpidi vɛlɛ wu gìɛ te lowa. 20Tei wɔnɔ yà zeelei Setiifɛ̃ ɣɛni ŋamai wuuzu, gè ɣɛni ƃalaa loni ná woba zèe zeiyai saa ʋai wu gìɛ yee ka paa veaitiɛ ta zeɣei va.’ 21É ɣɛ sa mà, ‘Wulo vɛ va, ƃɔvɛlaale gà è levesu woozala zii ƃalaagitiɛ wɔ.’ ”

Sɔdasi maazu nu walai ɣaazu‐ɣɛɛ ʋai Pɔɔ va

22Te yɛni wui tosu gói ma é yɛsu é nii wo, te woo lɛ sa gee zu tiɛ ɣɛ tea, “A nui na mazii vaa é wulo zui ɣa! Ƃɔvɛlaale maa lɛ nɛɛni ɔ́ yɛ ŋetea.” 23Tei te ɣɛni lobasu tiɛ ta zeɣeitiɛ wulo ma tiɛ pili tiɛ fifiligi lɛ gee zu, 24sɔdasi maazu nu walai sɔdasiitiɛ leʋeni ga te lɛɛ la sɔdasi vɛlɛi zu, é deʋe wɔnɔ ga te yɛ kɔ̃ɔ‐kɔ̃ɔsu ga dowa vele é yɛsu é wuu‐zu ʋaa wo, kɛɛ ʋaa ma é kwɛ̃ɛ nii velei ma ga nii te ɣɛni maloba bosu ga yowũa ga pɔ́ vele. 25Kɛ̀ tei te gilini dowa ʋaa ma, Pɔɔ boni sɔdasi wũ‐gila wũ‐tuo nui ma é ɣɛni loni ná woba é ɣɛ ma, “?Tɔ tɔ su wo ʋaa ma ga wo nui nii lowa é ga Loomɛ laa‐zei, ani wɛ lɛ kɛ́ɛ‐zɔ dɛɛni?” 26Tei sɔdasi wũ‐gila wũ‐tuo nui é nii mɛnini, é liini sɔdasi maazu nu walai wɔ vɛ é ɣɛ ma, “Zɛƃɛ ɣa è ɣɛ è kɛ? Ƃɔvɛlaale zunui nii ɣa ga Loomɛ laa‐zei.” 27Sɔdasi maazu nu walai vaa vele ɣa na é ɣɛ, é ɣɛ Pɔɔ ma, “Bo mà. Yà ga Loomɛ laa‐zei?” Nà ɣɛ ma, “Ooi.” 28Sɔdasi maazu nu walai gaa wote é ɣɛ ma, “Gè taa‐zeidai nii maa ɣeeani ga naʋolo lamaa.” Pɔɔ ɣɛni ma, “Kɛ̀ nà dɛi, te kàani ga taa‐zei.” 29Na ma niitiɛ te ɣɛni vaazu kɔ̃ɔ‐kɔ̃ɔsu ga dowa vele te ʋazani ba ga maa ʋilea. Na ɣa ɣɛɛ na sɔdasi maazu nu walai ƃalaa ɣɛni luozu, ƃɔvɛlaale é looni ga na laa ga Pɔɔ ɣɛni ga Loomɛ laa‐zei, tɔwɔ é nà ɣili sa ɣɛ.

Pɔɔ ɣa faa‐wo‐bo kpɔgi laa wu

30Kɛ̀ na wulu zubui sɔdasi maazu nu walai ɣɛni wõi ɣɛɛzu ga é zaƃu ƃɔɔƃɔɔgi wɛ̃ɛ Dusiitiɛ te ɣɛni faa yowũ wosu la ga dáa. É Pɔɔ ʋũi é deʋe ga laa‐ʋaale gwalaitiɛ vɛɛ faa‐wo‐bo kpɔgi ɣaazɔ va te wũi. É va sa ga Pɔɔ é sei te laa wu.

Currently Selected:

TE ƔƐƐ VAITIƐ 22: DN1971

Highlight

Copy