TE ƔƐƐ VAITIƐ 18

Pɔɔ ɣa Kɔlĩ

1Tei nii wuloni ba, Pɔɔ ziɣini Aatɛ̃ é li Kɔlĩ lai zu. 2É wɛlɛni Dusi nu ta va na daa ga Akuila é ga taa‐zei Pɔ̃tɛ yui zu. Siɣila zu lɛ ŋɛni woozani Etali yui zu é vɛɛ ŋazai Peleseela va, ƃɔvɛlaale Kɔlɔdia boni ga Dusiitiɛ ɣaazɔ te ziɣi Loomɛ lai zu. Pɔɔ liini ga é wɛlɛ te va. 3Tei tɔwɔ ta tiɛni tɔ ŋɛɛ lii ɣilagi ɣɛ, é laa yiini te wɔwɔ ma ta tiɛni te tii ɣɛ, ƃɔvɛlaale te ɣɛni ga seɣe vɛlɛ‐ƃɛtɛ vea. 4Doowo folo ɣile‐giledai zu ɔ́ lo Dusiitiɛ la ga sakpe ta Geliikiitiɛ Gala‐feli wɔtai wu yíɛ te yii lɔ.

5Tei Saila ƃɔga Temete te ziɣini Masadoonia te va, Pɔɔ yee laa ʋegɛi ɣɛ ga Gala goo‐woga yíɛ seele woo ʋe Dusiitiɛ ya ga Ziizɛ ɣɛni ga Kolai. 6Tei te ɣɛlɛni bɛ́ te daa ŋala‐ŋala, é ná seɣei ƃɛkpɛnɛni é ɣɛ te ma, “Wo yɛʋui ʋaa ɣa yɛ wo wũmɔ! Màa wuovɛ su. É ziɣi za ma é li ga tuo vele gà ɣɛ liizu zii ƃalaagitiɛ wɔ.” 7Pɔɔ ziɣini na é li zunu ta na pɛlɛ wu daa ga Tisia Jɔsita, é ga Gala‐feli nu. Ná pɛlɛi ɣɛni nɔ Gala‐feli wɔtai wobavɛ. 8Kolesipɔ, nii é ɣɛni ga Gala‐feli wɔtai malo‐tuoi, é de maliɣii ʋaa ziɣini ga gaama é vɛɛ pɔ́ pɛlɛ wu vea ɣaazɔ va. Tei Kɔlĩ veaitiɛ te lamaa te Pɔɔ woo mɛnini, te siɣini ga gaama te bataize ɣɛ sa ga tiɛ. 9Ná wuuni Pɔɔ ɣaazu ga kpidi ɣila de maliyii ɣɛ ma, “Mɛ lɛ luo. Kɛ̀ ƃɔɛ, mɛ lɛ maazu ɣɛ ƃu. 10Ƃɔvɛlaale gà è woba. Nu ta lɛ laa lɛɛ è wu ɔ́ ŋada zei yìɛ, ƃɔvɛlaale nu lamaa ta ga nà dɔ tai nii zu.” 11Na ma Pɔɔ kɛɛni na ga kwena gila ɣalo dɔzita, é te zaama yíɛ te ɣala bo ga Gala goi.

12Kɛ̀ tei Galio ɣɛni ga gɔmɛti nu walai Akeea yui zu, Dusiitiɛ te ƃɔni su te laa lɛ Pɔɔ wu te vaa la dáa wu kuutii zu, 13tiɛ ɣɛ tea, “Zunui nii ɣa lɔɔzu numaitiɛ wũ su ga te Gala feli ga pelei nii zu vele é ga Gala na tɔgi ŋala‐ŋalaga.” 14Kɛ̀ tei Pɔɔ ɣɛni ƃɔɔ nɔ é ƃɔɛ, Galio ɣɛni Dusiitiɛ ma, “Ee Dusiitiɛ, è ɣɛ é ɣɛni ga faa ta é ga tuo‐vele‐yowũ‐wuloa ɔɔ faa‐yowũ‐ƃakpa‐ɣɛɛ, gòi ɔ́ ɣɛ ga gaama ga gè wɛlɛ fai nii zu va wiɛ. 15Kɛ̀ tei tɔwɔ é nɔ ga fai pilegɛi wooniga va ta daa‐zeiga é vɛɛ wo ƃɔɔ lɔgi va, a wɛlɛ su va wa ƃɔɔ. Gɛ̀ lɛ ʋaani bu ga gè ɣɛ ga fai niitiɛ mazii zu‐vɛtɛ nu.” 16É te ƃɛ sa kuutii zu. 17Te pɛ te Sɔtenii nii zoni é ɣɛni ga Gala‐feli wɔtai malo‐tuoi te dowa kuutii laavɛ. Kɛ̀ Galio lɛ wui toni nii ma.

Pɔɔ na gale‐ma ʋai wulu Ãteya

18Tei sa nii wuloni ba, Pɔɔ folo lamaa ɣɛɛni na. É ʋelini sa Kolai maa veaitiɛ ma é zei yuwu ɣa ga é li Siilia, Peleseela vɛɛ sa ba ta Akuila. Te wũgi woni Sɛ̃kulia, ƃɔvɛlaale é mawoto leveni. 19Te vaani Ɛfɛsɔ lai zu é te yɛ na, kɛ̀ tɔ ƃɔwɔi liini Gala‐feli wɔtai wu é lo Dusiitiɛ la ga sakpe. 20Tei te maa nɛɛnɛni ga é lebi na, ɛ́ lɛ ʋaani bu. 21Kɛ̀ é ʋelini te ma é ɣɛ tea, “Gà va wulu wo wɔ ani Gala ka ʋa na bu.” É zei sa yuwu ɣa é wulo Ɛfɛsɔ va. 22Tei é vileni Sɛsɔluiya, é liini é laali Gala pɛlɛi wu veaitiɛ ma é li sa Ãteya. 23Tei sa é folo taniga ɣɛɛni na, é ziɣini na yíɛ ziɛ‐ziɛ yá ziɣi vɛ é li vɛ Galeesia yui zu ta Felegia yíɛ kala dopoitiɛ ɣaazɔ zu ƃaa ga woo.

Apɔɔla ɣa Gala goo wosu Ɛfɛsɔ

24Tɔwɔ Dusi nu ta daa ga Apɔɔla é ga Alezãduiya laa‐zei é vaani Ɛfɛsɔ. É ɣɛni ga nui daa ɔ́ ʋa, kele‐ɣelegɛi Gala kɔlɔi zu. 25Kala bogɛi ɣɛ de maliɣii na tuo velei zu. Tei tɔwɔ fai nii mazɔƃɛlɛ wɔɔlɔi ɣɛ su ga kpakpaa, é ƃɔɛni é fai niitiɛ lɛ pilegɛi ɣɛ Ziizɛ va ga gaa‐wodo vele, velei ƃalaa Jɔ̃ na bataize‐ɣɛɛ velei nɔ ɣa é ɣɛ ga kwɛ̃ɛgɛi ɣɛ la. 26É vɛɛni ga ƃɔɛ ga duo lala vele Gala‐feli wɔtai wu. Kɛ̀ tei Peleseela ƃɔga Akuila te goo mɛnini, te siɣini te lii la te Gala na pelei maʋaa ɣavele zu wulo ma ƃɔɔ ga gaa‐wodo vele. 27Tei é ɣɛni wõizu é ziɛi leve é li Akeea, Kolai maa veaitiɛ te zii lɔɔni te kɔlɔ wonɛ ná Ɣala pɛlɛi wu veaitiɛ wɔ ga te yee zei bu. Tei é ziitini, niitiɛ te Ziizɛ maʋaa ziɣini ga gaama Gala na gaazu‐maa‐wõi‐ɣaa ƃɔ‐bai zaala zu, é ƃɔni te va ga kpakpaa. 28Ƃɔvɛlaale é loni Dusiitiɛ la ga kpaanaga kɛnɛ zaama yíɛ dɛ ga tiɛ Gala kɔlɔi zaala zu ga Ziizɛ ɣa é ɣɛni ga Kolai.

Currently Selected:

TE ƔƐƐ VAITIƐ 18: DN1971

Highlight

Copy