TE ƔƐƐ VAITIƐ 17

Tɛsɛlonaika yopo‐yapa fai

1Tei sa te leveni Ãfepolɛ lai zu ta Apoloonia, te vaani Tɛsɛlonaika lai zu vɛ Dusiitiɛ ta Ɣala‐feli wɔta ɣɛni na. 2È ɣɛ velei é ɣɛ la ga Pɔɔ ɣɛɛ ʋaa wɔlɔ‐zaɣa, é lɛɛni bu ta Dusiitiɛ tiɛ Gala kɔlɔi zu ʋai wɔwɔ yɔɔzu wulo doowo folo saagɔ yee wu, 3yíɛ kavele zu wulo te ma yíɛ dɛ ga kɛni Kolai ɔ́ laa‐nɔwɔ wo na ɣa ɣɛɛ na é wu ziɣi saa ya. Yíɛ wɔnɔ ɣɛ te ma, “Ziizɛi nii gè maʋaa wosu wiɛ towaa é ga Kolai.” 4Pɔɔ laa lɔɔni taniga va te vɛɛ sa ba ta Saila. Vele nɔ na Geliikii niitiɛ lamaa te zɔƃɛlɛ ɣɛni Gala faa zu te kɛɛni la. Ŋaza lo‐tuoi niitiɛ te vɛɛni te va tɛ lɛ ŋɛni wɔnɔ ga soloya. 5Kɛ̀ sili ɣɛni Dusiitiɛ wuu zu. Tei sa te kuu‐zu‐ƃɔlɔ vea ziɣini koto‐kata beaitiɛ zaama, te kpɔ gaa lɛɛni ba te tai zu ɣɛ yopo‐yapa. Na ɣa ɣɛɛ na te vɛɛni Jeesẽ na pɛlɛi va ga ŋapi tiɛ pele ɣaa ziɛ ga te Pɔɔni kulo te va ga tiɛ numaitiɛ wɔ. 6Tei tɔwɔ tɛ lɛ ŋɛni wɛlɛzu te va, te Jeesẽ ƃokponi é vɛɛ Gala pɛlɛ wu veaitiɛ taniga va te li ga tiɛ taa lo‐tuoitiɛ laa wu. Te ɣɛni lobasu tiɛ ɣɛ tea, “Numai niitiɛ te zui wotega fele te vaa vɛ ƃalaa pɛ. 7Jeesẽ wɔ ge yee zei te wu. Na ɣa ɣɛɛ na te ta nɛpɛ gɛ lɛ ziɛzu ga Siiza na tɔgitiɛ. Ta bosu ga masa ta ƃɔnɔ ka na daa ga Ziizɛ.” 8Tei numaitiɛ vɛɛ taa lo‐tuoitiɛ va te nii mɛnini, te ɣɛni pɔ̃ɔ. 9Tei sa Jeesẽ vɛɛ zɔitiɛ va te Pɔɔni maa bowũ siɣini, te ƃeni te va te li.

Ziizɛ na keelaitiɛ ta Bɛluiya

10Gala pɛlɛ wu veaitiɛ te Pɔɔ leveni ta Saila ga maa ʋilea Bɛluiya lai zu ga kpidi. Tei te ziitini, te liini Dusiitiɛ ta Ɣala‐feli wɔtai wu. 11Tɔwɔ Dusiitiɛ te ɣɛni vɛ te luola nɛi ɣɛ é leve niitiɛ va te ɣɛni Tɛsɛlonaika, ƃɔvɛlaale te yee zeini woi wu te zɔƃɛlɛi ɣaazɔ su tiɛ wɛlɛ Gala kɔlɔi zu va sɛ‐sɛ ga gela‐bo pele ɣile‐gile, kɛɛ ʋaa ma te wɛlɛ na va ga ani fai niitiɛ ta ga gaama. 12Na ma te lamaa te siɣini ga gaama. Na ɣa ɣɛɛ na Geliiki ŋazai niitiɛ ƃalaa te ɣɛni te zaama te lo‐su wɔɔlɔi é vɛɛ te mazinaa va tɛ lɛ ŋɛni ga soloya. 13Kɛ̀ tei Dusii niitiɛ te Tɛsɛlonaika te kwɛ̃ɛni ga Pɔɔ ɣɛni Gala goi wosu Bɛluiya ƃalaa pɛ, te vaani na ta ƃalaa te vɛɛ ga lɔɔ kpɔgi zu tiɛ te yii wote. 14Na ɣɛɛzu Gala pɛlɛ wu veaitiɛ te Pɔɔ wulo na te teve yuwu wukũigi va ga maa ʋilea. Kɛ̀ Saila ƃɔga Temete te yɛni na. 15Taitiɛ te loni Pɔɔ luo te yɛni tuo te vaa la Aatɛ̃ lai zu. Tei sa Pɔɔ ʋelini te ma ga ani ƃɔɔ nɔ ɔ́ zolowo na su Saila ya ta Temete te va pɔ́, te liini wulu.

Pɔɔ ɣa Aatɛ̃

16Tei Pɔɔ ɣɛni te ƃowũsu Aatɛ̃, zii yowũni kuu zu ga velei é wɛlɛni la tai va daa ʋegɛi ga maa‐niini galaga. 17Na ma é ƃɔɛni Dusiitiɛ wɔ ga kpaanaga Gala‐feli wɔtai wu ta niitiɛ te zɔƃɛlɛ ɣɛni Gala fai zu. Na ɣa ɣɛɛ na niitiɛ nɛpɛ ɔ́ te vɛtɛ dɔwɔ ƃalagi ɣa folo ɣile‐giledai yee wu, ɔ́ lo te la ga sakpe. 18Ɛpɛkuliiyɛ̃ ɣele‐ɣele beaitiɛ te vɛɛ Setowe ɣele‐ɣele beaitiɛ va te taniga te pɛtɛni ƃalaa pɛ. Te taniga te ɣɛni tea, “Zɛƃɛi gaa‐vala‐ba yɛpɛ‐wuu nui nii ɣa bo?” Zɔitiɛ te ɣɛ tea, “Yà pɛtɛ ga Gala goo‐wo nu zuu‐taƃɔnɔ‐su ɣalaga ʋaa ma.” Te nii woni ƃɔvɛlaale é ɣɛni Gala goo wosu é vile Ziizɛ va ta nu wu‐ziɣi ʋai saa ya. 19Siɣi vele ɣa na é ɣɛ te vɛ te vaa la faa‐wo‐bo kpɔgi zu na laa ga Ɛliapɛgɛ tiɛ ɣɛ ma, “?Gá zoo gé faa wẽɛ é vile kala‐bo niinɛi nii va è pilega gé laa wu? 20Ƃɔvɛlaale yà faa taniga loozu gé wui zu kuloai ga gíɛ. Na ma gé wõini gé fai niitiɛ zu‐wulo‐zuvɛ wɛ̃ɛ.” 21Tɔwɔ Aatɛ̃itiɛ ɣaazɔ vɛɛ zuu ƃalaa su veaitiɛ va te ɣɛni na tɛ lɛ ŋɛni faa ta nɛpɛ ma é wulo faa niinɛ woga ɔɔ mɛniga wulu.

22Na ma tei Pɔɔ ɣɛni loni Ɛliapɛgɛ ʋaa‐wo kpɔgi zu, é ɣɛni tea, “Aatɛ̃ zinaitiɛ, gè wɛlɛɛ na va pelei ɣaazɔ zu ga Gala zeke bɔɔlɔvɛ wo ɣaazu. 23Ƃɔvɛlaale tei gè ɣɛni ziɛ‐ziɛsu, gè wɛlɛni wo ʋeli ŋɛniitiɛ va sɛ‐sɛ. Gè wɛlɛni ƃalaa pɛ gala zeke‐kɛɛ vana ta va woi nii wonɛi ma, ‘Togɛi galagi nii ʋaa ma nu lɛ kwɛ̃ni.’ Na ma nii wo felizu liti su towaa gè maʋaa wosu wiɛ. 24Galagi nii é zui ƃɛtɛni é vɛɛ su ŋɛni ɣaazɔ va, tei tɔwɔ é ga zui maliɣi ta gee, ɛ́ lɛ ɣɛɛ ŋadɛivɛ ga sei vɛ ná ƃɛtɛi nu ƃuse vɛ 25ɔ́ nɔ ɣɛ ga mɔɔlɛ wo bɛ́ ga nu ƃuse yee. Na maʋaa ɣa wulo è ɣɛ yá ŋɛni ta nɛpɛ maƃala wo, tɔ ƃɔɔ wɔ nɔ ɣa é ŋeteai ʋeezu nui ɣaazɔ ya ta zɛʋui é vɛɛ sa ŋɛni ɣaazɔ va. 26Nu gila mawulo‐ba ɣa Gala ge zii ɣaazɔ ƃɛtɛɛ la ga te ɣɛ zui wɔlɔ‐kɔlɔ ma ɣaali. É kuu ʋeeni te ya ŋeteai zu é te ɣɛɛ‐zuvɛtiɛ wɛ̃ɛ teve, 27kɛɛ ʋaa ma te Gala gaa ziɛ, kígi ba ga ta yɛ yee vɛɛzu ƃɛ‐ƃɛ te pɛtɛ. Tɔwɔ maa lɛ woozani de ɣile‐giledai va,

28ƃɔvɛlaale

‘Saala zu ɣa de yɛʋui la de ya

diɛ lubu de ŋetea.’

È ɣɛ velei ƃalaa wa wuu‐zu‐laali ʋaa‐wo beaitiɛ taniga te boni la tiɛ ɣɛ tea,

‘Ƃɔvɛlaale a da ga mawulo‐ba ga gaama.’

29Tei tɔwɔ de ga Gala mawulo‐ba, maa lɛ nɛɛni dɔ ɣi gaa ziɛ ga Gala kavele ɣa ga po‐kɔ̃ɔgi nii kpɛtɛi ga zɛni ga nu ƃuse yee ta ná ki‐gaa‐ziɛi, ɔ́ nɔ ɣɛ ga kanigi ɔɔ kwɔtii nii kpɛtɛi ŋɛ na. 30É laa wuloni nu ƃuse ɣɛɛ‐zɔ su ga siɛgi na te ɣɛni kɛɛzu la liti su, kɛ̀ tɔ sa bosu nui ɣaazɔ ma ŋada ɣaazɔ ga te wulu ɣaa ʋe ta ʋaa yowũi va. 31Ƃɔvɛlaale é kui nii loga yá zui zu ʋaa‐wogi ɣaa leve ma ga tele‐bo. Towaa ɣɛ ga zaƃu zunui é yee ƃadoga ba é nii ɣɛ. É nu pɛ ki daa wodoa fai nii zu ga velei é bu ziɣia la saa ya.”

32Tei te faa mɛnini é vile nu wu‐ziɣi ʋai va saa ya, taniga te ŋɛɛ wuloni su, kɛ̀ zɔitiɛ te ɣɛni tea, “Gá wui to è woi ma é vile fai nii va wɔnɔ.” 33Pɔɔ wulo vele ɣa na é ɣɛ te zaama é li. 34Kɛ̀ nui taniga te siɣini ga gaama te vɛɛ ba. Taitiɛ te siɣini ga gaama te taniga te ɣɛni ga Dayaniisia nii é ɣɛni ga Ɛliapɛgɛ ʋaa‐wo‐bo nui ta ta ŋaza nu ta daa ga Damɔle, zɔitiɛ te vɛɛ sa te va.

Currently Selected:

TE ƔƐƐ VAITIƐ 17: DN1971

Highlight

Copy