2 TƐSƐLONAIKAITIƐ 3
3
A Gala feli gé ʋaa ma
1Na pɛ ka wulo na ba, nà numaa, a wiɛ Gala feli gé ʋaa ma, kɛɛ ʋaa ma de maliɣii woi ziɛ ga maa ʋilea, ƃaa ƃakpa la ma è ɣɛ velei é ɣɛɛni la wo zaama. 2A feli wɔnɔ ga é gé wulo wãla‐lɔɔ veaitiɛ yee ma niitiɛ te luƃo vele yowũai, toku ge zei ga nui pɛ ge lei zee‐la‐ma ɔ́ ɣɛ zéea. 3Kɛ̀ de maliɣii ɣa ga nui nu ɣa laa la. Towaa wo zu ƃaa é ƃaa wo maazu ga tuƃo‐vele‐yowũ nui mɛ lɛ faa ɣɛ ga wiɛ. 4Na ɣa ɣɛɛ na gé laavɛ la de maliɣii zaala zu ga fai niitiɛ gé deʋezu gíɛ da wo ya wa te ɣɛɛzu. Tɔwɔ wa vaazu ɣɛɛzu nɔ te ɣɛɛzu. 5De maliɣii ɣa nii ɣɛ wo vɛ fãa. Na ɣa ga towaa wo ɣigi wote Gala na wõila ʋaa ma é pote wɔnɔ Kolai na gili‐faa‐vai ʋaa ma.
Tii‐ɣɛɛ ʋai ga nu ʋaa ʋaa
6Tɔwɔ nà numaa, a ziɛ ga’ deʋei nii gé daazu wo ya de maliɣii Ziizɛ Kolai na daa‐zeigi zu. Na ɣa ga wo ƃe teve wo wɔi nii va yá ɣɛ fii‐ƃɛɛ luo wosu, to mu ɛ́ lɛ ɣɛɛ luozu ɔ́ zolowo de yaa ʋai nii ma é wuloa gé ya é ziiti te ma. 7Wa ƃɔɔ wo kwɛ̃ni ga maa nɛɛvɛ wiɛ gé laa wo‐kɔ̃ɔ. Gɛ́ lɛ ŋɛni fii‐ƃɛɛ wulozu gé ɣɛi ma wo wɔ vɛ. 8Gɛ́ lɛ ŋɛni nu ta nɛpɛ na daa‐mii ŋɛni miini gɔ́ ƃe maʋɔɔnɛ‐ʋee ɣɛɛzu. Kɛ̀ to mu gé tii ɣɛɛni kpidi vɛɛ folo va gíɛ ɣɛ talakpa‐talakpa ga mɔɔlɛ, kɛɛ ʋaa ma gé mɛ lɛ ɣɛ ga wo ta nɛpɛ wũmɔ ɣasɔ. 9Su‐wulo‐zu lɛ ga ɛ́ lɛ ŋɛni ga gá woo gaama ʋaa ga gé na ɣɛ. Kɛ̀ gé kɛɛni ga gé po‐kɔ̃ɔ dɛ ga wiɛ gé luo velei zu ga wo ziɛ la. 10Tei ƃalaa gé ɣɛni wo wɔ vɛ, gé deʋe laani wo ya. Na ɣa ga nui nɛpɛ lɛ tii ɣɛɛ manui mɛ lɛ laa mi. 11Ƃɔvɛlaale gá mɛnisu ga nui taniga ta wo zaama te ʋii ƃɛi te nɔ ga nui niitiɛ te laa lɛ ziɣia te vaa ʋaa zu, tɔwɔ tɛ lɛ tii nɛpɛ kɛɛzu. 12Gá daazu na ɣavele veaitiɛ ya ga tɔ gíɛ te lɛnɛ ga kpaanaga de maliɣii Ziizɛ Kolai na daa‐zeigi zu ga te ɣaa yii tuoi na va te ta lii ɣɛ ga te ƃɔɔ vaa ʋaa‐ɣɛɛ ŋɛni zɔlɔ wo. 13Nà numaa, a mɛ lɛ ƃɔlɔ faa vagɔ‐ɣɛɛ va. 14Ani nu ta nɛpɛ gɛ lɛ ŋɛni kɛɛni ɔ́ goo‐mɛni kulo faitiɛ zu gé ponɛɛ kɔlɔi nii zu, a ɣi zɛ manui zu, wa ʋaa nɛpɛ ge mɛ lɛ ɣɛ manui na faa zu, kɛɛ ʋaa ma wũfe ge vili má. 15A mɛ lɛ siɣi ga wo zili yɔ̃wɔ, kɛ̀ wa tɛnɛ, tei tɔwɔ a ɣɛ ga wo wɔi ta.
Tuuyiɛi
16Nii é ga zii‐lai maliɣii tɔ ɣagi towaa zii‐laa ʋe wo ya ga ɣee nɛpɛ fãa yiɛ fe pelei ɣaazɔ zu. De maliɣii ɣa ɣɛ wo woba fãa.
17Nài gè ga Pɔɔ nà ƃɔɔ ɣa gè daali‐ma woi niitiɛ wonɛzu ƃɔɔ yee ma. Nii ɣa é ga zèe‐wogi kɔlɔi nɛpɛ su gà ponɛ. Vele ɣa na gà kɔlɔ wonɛ la. 18De maliɣii Ziizɛ Kolai na maa‐wõi‐ɣaa ƃɔ‐bai ɣa ɣɛ wo pɛ wo ʋaa ma fãa.
Currently Selected:
2 TƐSƐLONAIKAITIƐ 3: DN1971
Highlight
Copy
Compare
Share
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
