1 TEMETE 1

Daali‐mai

1Nài gè ga Pɔɔ gè ga Ziizɛ Kolai na keelai ta de valo nui Gala na deʋei mavele ma ta Ziizɛ Kolai nii é ga de ɣi‐to‐suvɛ mávele ma, 2gà kɔlɔi nii wonɛzu è wɔ, yài è ga Temete. Yà ga dùu ƃɔɔƃɔɔ nii de siɣia ga gaama mávelei ma. Kpɔ‐bai, maa‐wõi‐ɣai é vɛɛ zii‐lai va kuloai de ɣeea Gala zeea ta de maliɣii Ziizɛ Kolai ta ɣɛ è ʋaa ma fãa.

Tɛnɛ‐bo fai gaama lala ɣala‐bo su

3È ɣɛ velei nɔ gè è lɛnɛni la kɛ̀i ma liizu Masadoonia, yɛ Ɛfɛsɔ lai zu kɛɛ ʋaa ma è bo nui mazii taniga ma na ga te mɛ lɛ kala‐bo ta ƃɔnɔ bo 4ɔ́ nɔ ɣɛ ga te ƃɔɔ yee laa ʋe ga kwele‐toa ta de mama gwɔlɔni te maʋai‐laa ʋai ga yee ƃeɣa ta natiɛ ta dɔ mama gwɔlɔni yíɛ sa nɔ li kelẽi. Fai nɔ na ɣa maʋaa li wũ ma tɔ ga nu yìɛ ɣi gaa ziɛ kelẽi. Ɛ́ lɛ ga nu ɣala‐boga Gala na tuoi zu zee‐la‐mai mavele ma. 5Tɔwɔ deʋei nii dái de ya mazaƃui ɣa ga de wõila luoi nii wo yá wulo nu yii zu, maa ziɣiai, kuloai ki‐gaa‐ziɛ vagɔi zu ta zee‐la‐mai nii gaa‐wɔlɔ gɛ lɛ maʋaa va. 6Numaa taniga ta na te ziɣi vele ma fai niitiɛ wulu é kɛɛ te ɣaka te vili faa yãka zu‐wuloa zu. 7Ta wõi ɣɛɛzu ga kpaanaga ga te ɣɛ ga tɔ‐dɛɛ ɣala‐mɔa. Tɔwɔ nii ƃalaa te bosu tɛ lɛ gaa ɣaazu ɔ́ nɔ ɣɛ ga te fai niitiɛ ɣaa ɣa te ƃɔɛzu yíɛ vile te va.

8Tɔwɔ de kwɛ̃ni ga tɔgi vagɛ, ani nɔ nu ɣa tii ɣɛɛ na la é zolowo dáa woi ma 9manui yìɛ fai nii ɣaa ɣa. Na ɣa ga tɔgi lɛ lɛɛni gaama luo‐wo bea laa ma. Kɛ̀ tɛɛvɛ tɔ‐maazu‐vɛtɛ tala vea laa ma ta goo‐mɛni tala vea. Tɛɛvɛ Gala tuo‐wo tala vea laa ma ta faa yowũ‐ɣɛɛ vea. Tɛɛvɛ maa‐wuo lala vea laa ma ta Gala maa‐ŋɛɛ‐ɣɛɛ vea. Tɛɛvɛ niitiɛ laa ma te ga te ɣeeani‐paa vea ta te leeni é vɛɛ nu ƃusei zɔitiɛ‐vaa vea va. 10Tɛɛvɛ kɔnɔ wɛ̃ɛ‐ziɛ‐bo bea laa ma ta ƃaa‐wulo‐ma wɛ̃ɛ‐yeke‐kɛɛ vea, tɛ́i nu wũmɔ vea laa ma ta zɛɛ ʋaa vea é vɛɛ zɛɛ ʋaa wona‐wo bea va. To mu fɔlɔ tɛɛvɛ faa mazii ta nɛpɛ daa ma nii lɛ vɛɛni kala‐bogi nii va maʋaa ɣaa wuai yawu. 11Na ɣa ga nii ɛ́ lɛ zolowoni saala‐ma Ɣalagi na ƃaa‐la‐ma woo niinɛ vagɔi nii ma tògɛi maʋaa ƃawola.

Pɔɔ na mama‐feeai maa‐wõi‐ɣai ʋaa ma

12Gà de maliɣii Ziizɛ Kolai mamasu. Towa é sù ƃaa fai nii zu. Ƃɔvɛlaale towa é wɛlɛɛ màʋaa zu va ga gà ga nui nu ɣa laa la zee‐ƃado pele ma bà ga gè ná tii ta ɣɛ. 13É nii ɣɛɛni velei ƃalaa gè dáa ŋala‐ŋalani la wɔlɔ gè kpɔɔla gè gaazu‐lɛɛ luo wo da. Kɛ̀ gaazu‐maa‐wõi woni gàazu, ƃɔvɛlaale gè tuoi nii woni lei zu gɛ̀ lɛ ŋɛni maʋaa ziɣini ga gaama. 14Tɔwɔ de maliɣii na maa‐wõi‐ɣaa ƃɔ‐bai laa looni gàazu zee‐la‐ma vɛɛ ba pɛ ta wõilai gé ɣɛɛ vele ma su ɣilekpu gá Ziizɛ Kolai. 15Woi nii ta bo tɔ ga gaama kuloai bu bɛ́ ga nu yee zei bu é wolo wulu ma. Woi na ɣa ga Ziizɛ Kolai vaani zui zu ga é faa yowũ‐ɣɛɛ vea valo. Nà wɔ ka gè ga faa yowũ‐ɣɛɛ vea pɛ te mamaa wũgi. 16Kɛ̀ gàazu‐maa‐wõi ɣaavɛ zaƃui nii ma. Na ɣa ga è ɣɛ velei gè la ga faa yowũ‐ɣɛɛ nu maa wũgi, Ziizɛ Kolai ná zii‐lɔi lɛɛni nii maa‐wulo‐zu nɛpɛ gɛ lɛ ŋɛni maʋaa va, kɛɛ ʋaa ma gè ɣɛ ga po‐kɔ̃ɔ numai niitiɛ ʋaa ma te ɣɛni vaazu máʋaa ziɣizu ga gaama zɛʋui nii ʋaa ma kwɛ̃ɛ gɛ lɛ ba. 17Nui nii é ga ɣalasogi kwena ge li kwena ge va, nii ɛ́ lɛ wɔlɔ‐wɔlɔ zaa, nu lɛ ɣaazu laa ma, tɔ ɣilekpu nɔ ɣa é ga Gala. Ƃaa ɣa la má saala la má wɔlɔ‐wɔlɔ ta wɔlɔ‐wɔlɔ. Nà nɔ yá ɣɛ.

18Deʋei nii ɣa gè daazu è ya, dùi Temete. Solowogɛ Gala daa woi niitiɛ ma é woni é vile è va kɛɛ ʋaa ma woi niitiɛ te kɛ è ŋapi vagɔ wɔ, 19è yee ɣatagɛi zee‐la‐mai va ta ki‐gaa‐ziɛ vagɔ. Nui taniga te ɣɛlɛ vele ma faa vagɔi va é vilini te ɣigi zu nà kɛɛni ta yee‐la‐mai wu te ya è ɣɛ ziɛ‐ɣaa ŋee gwala ɣa wu. 20Hamɛneea ƃɔga Alezãda te ɣɛni numai niitiɛ zaama. Ta ɣa gè te yee laani Seeta ya, kɛɛ ʋaa ma te faa maa woli ga te mɛ lɛ Gala daa ŋala‐ŋala.

Currently Selected:

1 TEMETE 1: DN1971

Highlight

Copy

Compare