KƆLĨITIƐ 5

1De kwɛ̃ni ga ŋeteai nii zu zeɣe vɛlɛi de bu, na ɣa ga de lɔtɔi, ani a wolo na, pɛlɛ ɣa de ya kuloai Gala zeea. Tɔ ga pɛlɛi nii ɛ́ lɛ loni ga nu ƃuse yee é ga pɛlɛi yá yɛ gee wɔlɔgi zu wɔlɔ‐wɔlɔ ta wɔlɔ‐wɔlɔ. 2Ƃɔɔƃɔɔ su da ƃalasu ŋeteai nii zu a diɛ ná maa‐wõi‐wõi kulo ga de ɣɛ de ɣɛɛ‐zuvɛ Gala ta, 3kɛɛ ʋaa ma da ɣɛ na na, tete mɛ lɛ sa ɣɛ de ma. 4Tei dɛ a de seɣe vɛlɛi nii wu, a da yɛʋu lɛɛzu diɛ too ga zii‐zɛlɛ. Ɛ́ lɛ ga de wõini te de maa ʋoo, kɛ̀ tɔ ga de wõini seɣe yɛ de ma te ta lɛ wɔnɔ ma, kɛɛ ʋaa ma nii é ga saa ŋɛni zɛʋui é na maa ƃoale. 5Nui é de ɣavele ƃɛtɛɛ fai nii ʋaa ma tɔ ga Galagi nii é baa ŋinɛgi levega de wɔ ga ki‐to ga tɔ vaazu kɛɛzu.

6Na ma de laavɛ la ga ɣee nɛpɛ. De kwɛ̃ni ga tei de da vɛlɛi wu, na ɣa ga de malɔtɔi, de zu wulovɛ de maliɣii va. 7Da ziɛzu ga de laa vele la, ɛ́ lɛ ga de wɛlɛ vele ba. 8De laavɛ la. Pagɛ to mu de zu wulo de lɔtɔi va kɛɛ ʋaa ma da vɛlɛi wu ɣɛ ga de maliɣii wɔ vɛ. 9Na ma de ɣɛni da vɛlɛi wu ƃaa de zu wuloni ba, nii da ɣɛ pulu tɔ ga de de maliɣii yii‐laa ʋaa ɣɛ. 10Toku ge zei ga nu pɛ ka lo Kolai na faa‐wo‐bo kpɔkpɔgi laa wu ƃɔɔ ti, kɛɛ ʋaa ma nu ɣile‐giledai faa vagɔ maa zɔlɔ wo ɔɔ é faa yowũ maa zɔlɔ wo. Nii wɔgi nu ɣa maa zɔlɔ wo towaa ziɣi nɔ nii la manui kɛɛni kɛ́i ma nu ƃuse lɔtɔi zu.

Zɔɔzu‐ƃɛtɛ lii

11Na ma de maliɣii na duo‐bai wɛ̃ɛ pele ma gé vɛ, gá nu ƃusea wulu ga gé laa lɔ te va. Tɔwɔ nui mazii gé le kwɛ̃ɛgɛ Gala bɛ. Kìgi zu kwɛ̃ɛgɛ ƃalaa pɛ wo vɛ wa ɣi‐gaa‐ziɛi zu. 12Gɛ́ lɛ sa wɔnɔ ƃɔɔ lɛɛzu ga wiɛ. Kɛ̀ nii yá ɣɛ ga zaƃu wo wɔɔlɔ ƃɔɔ ɣaazu gé ʋaa ma nà ɣa gé feezu wo ya, kɛɛ ʋaa ma wo zoo wo numai niitiɛ woo zu loo ta wɔɔlɔ ƃɔɔ ɣaazu nu ƃuse lo‐suvɛ ʋaa ma. To mu tɛ lɛ kɛɛ nii ma yá yɛ nu yii zu. 13Ani gé ɣigi lɛ gé woba, minɛ ɣa Gala zeea. Ani kɔnɔ gé ɣigi ɣa gé ya, na ɣa wa wulo‐nu‐ma ʋaa ma. 14Kolai na wõilai é gé ɣigi zu towa é deʋe wulozu ga gíɛ, ƃɔvɛlaale gé laavɛ la ga nu ta zaavɛ nu pɛ faa ma. Na ma nu pɛ ge zaa. 15É zaani nu pɛ faa ma, kɛɛ ʋaa ma taitiɛ te ŋɛtea te mɛ lɛ sa wɔlɔ‐wɔlɔ ŋeteai ɣɛ ƃɔɔ ʋaa ma, kɛ̀ tiɛ kɛ máʋaa ma. Towa é ga nui nii é zaani é wu ziɣi kɔnɔ saa ya te mazabu ma.

16Na ma é ziɣi sa zai ŋɛ ni ma é li ga tuo, da ɣi‐gaa‐ziɛi é vile nu va ga nui mazii é le ɛ́ lɛ ziɣia nu ƃuse ŋeteai la. To mu velei wɔlɔ de ɣɛ ɣi gaa ziɛzu la é vile Kolai va ga nui mazii é le siɣiai ɣɛ nɔ nu ƃuse ŋeteai la. Kɛ̀ dɛ lɛ sa wɔlɔ‐wɔlɔ ɣi gaa zia ɔ́ vile ba ga pelei na zu vele. 17Na ma ani nu ƃɔga Kolai ta su ɣilekpu, manui ɣa ga nui kpɛtɛi ga niinɛ. Faa wɔlɔ‐zaɣagi ƃea gá, maniinɛi vaa. 18Nii ɣaazɔ wulovɛ Gala zeea. Towa é de yɔɔzu ƃɛtɛɛ da tiɛni Kolai zaala zu é zɛba é zɔɔzu‐ƃɛtɛ lii ʋe de ya. 19Na zu‐wulo‐zu ɣa ga Gala ka é kɛɛni Kolai yìɛ te yɔɔzu ƃɛtɛ ta nu ƃuse é yee wulo ta lɔ‐kãla‐ŋala fai zu nii é yɛga te va ga faa é de lo zɔɔzu‐ƃɛtɛ ɣeela woi‐wo fai ƃawola. 20Na ma da ɣa de ga Kolai ɣaazuvɛ. Gala ka kɛɛzu diɛ ná fai la numaa vɛ. Gá wo maa nɛɛnɛsu ga Kolai woo ga wa Galani wo yɔɔzu ƃɛtɛ. 21De mazaƃui ma nui nii ɛ́ lɛ ŋɛni faa yowũ ʋaa ɣavele wɛ̃ni Gala ge kɛɛni ná dɔ laa ɣɛ faa yowũ maʋaa va, kɛɛ ʋaa ma de ɣɛɛ vele ma su ɣilekpu da tiɛni nà kɛ de wɔɔ laa ɣɛ Gala na tele‐bo tuoi‐ɣɛɛ ʋaa va.

Currently Selected:

KƆLĨITIƐ 5: DN1971

Highlight

Copy

Compare