KƆLĨITIƐ 1

Daali‐mai

1Nai gè ga Pɔɔ, gè ga Ziizɛ Kolai na keelai ta Gala zii‐mai mavele ma, a de wɔi Temete vɛɛvɛ bà, gíɛ kɔlɔi nii leve Gala na pɛlɛi wu veaitiɛ wɔ vɛ te Kɔlĩ lai zu é vɛɛ sa Gala na dɔ numaitiɛ ɣaazɔ va te Akeea yui wɔlɔ‐kɔlɔ ma ɣaali. 2Gaazu‐maa‐wõi‐ɣaa ƃɔ‐bai ƃɔga zii‐lai kuloai de ɣeea Gala zeea ta de maliɣii Ziizɛ Kolai ta ɣɛ wo ʋaa ma fãa.

Pɔɔ na mama‐fee ʋai Gala bɛ tei sa faa ƃoei maʋaa wuloni ba

3Kaze lɛ Galagi nii ma é ga de maliɣii Ziizɛ Kolai keeai é ga ná Galagi, nii é ga maa‐wõi‐ɣaa ɣeeai. Towa é ga gaa‐nɛkpɛ mazii ɣaazɔ‐wo Galagi 4nii é gé ɣaa nɛkpɛsu faa ƃoei ɣaazɔ zu yá zei gé ma, kɛɛ ʋaa ma gá ƃalaa gé zoo gé niitiɛ ɣaa nɛkpɛ faa ƃoei ta nɛpɛ ka zei te ma. Gaa‐nɛkpɛgi nii Gala ge boga ga gíɛ daamɔdai nɔ gá kɛ ga nui faa ƃoei ɣa zei ma. 5Toku ge zei ga velei nɔ gé wɔɔ laa wɔɔlɔi la Kolai na daa‐nɔwɔ‐wogi va, vele nɔ na gé wɔɔ laa ɣa wɔɔlɔ la gaa‐nɛkpɛgi va Kolai zaala zu. 6Ani faa ƃoei ɣa zei na gé ma, kuloai ɣa na ga wa ɣaa‐nɛkpɛgi ta wa valolai. Ani wɔnɔ gaa‐nɛkpɛ ka wo na ga gíɛ, towaa ɣɛ wa ɣaa‐nɛkpɛgi ʋaa ma wa gaa ɣa wa ɣɛ na yii lɔɔzu daa‐nɔwɔ‐wo sii ɣilagi nii ɣa yá wo ga gíɛ. 7Nii gé ɣigi ba é vile wo va tɔ nɔ laani laa‐zu. Toku ge zei ga gé kwɛ̃ni ga tei tɔwɔ wo wɔɔ laa gá laa‐nɔwɔ‐wogi va, vele nɔ na wɔnɔ wo wɔɔ laa ɣa ɣɛɛ la gá ɣaa‐nɛkpɛgi va.

8Nà numaa, gɛ́ lɛ wõini a wɔ yɛ liti su é vile faa ƃoei va é zeiya gé ma Eezia yui zu. Te yee leveni gé va ta yee‐leve‐bai wala yee vii gé ma sa gɛ́ lɛ ŋɛni ziɛzu ná wu. Gé ɣigi ziɣini ʋɔlɔ sa ná ƃalaa ga gé yɛʋui ɣa yɛ gé ya. 9Gé kaani sa ga te zeiya ma te ʋa bu ga gé saa maa zɔlɔ wo. Tɔwɔ na ɣɛɛni nɔ ga gé mɛ lɛ yee la bɔɔ ma, kɛ̀ gé yee la Galagi nii ma yá saa vea wu ziɣi saa ya. 10É gé wuloa saa ʋaa ƃoei na ɣavelei zu. Tɔwɔ tɔ wɔnɔ dɛ nɔ yá gé wulo faa ƃoei zu. Towa gé ɣigi ƃakogɛi bá ga tɔ kɔnɔ yá gé wulo faa ƃoei zu. 11Wa ƃalaa kɛni wa ƃɔ gíɛ Gala‐felia zu, kɛɛ ʋaa ma nu lamaa mamama fe Gala bɛ. Toku ge zei tuuyiɛi va toai gé ma ga Gala‐felia lama‐lama mazu‐loo.

Pɔɔ na daali‐ma ʋai maa‐zo fai

12Nii é ga gá yoka‐teveai tɔ ga nii. Gá ɣi‐gaa‐ziɛi ɣa dɛɛzu ga gíɛ ga seele ga gé luoni ga wiɛ ga faa‐zakpa‐ɣɛi nii kuloai Gala zeea ta gaama luo‐woga. Gé kɛɛni ƃalaa ga wiɛ ga kpakpaa. Gɛ́ lɛ ŋɛni kɛɛzu ga ŋeteai nii zu ɣele‐ɣele. Kɛ̀ gé ɣɛni kɛɛzu Gala na maa‐wõi‐ɣaa ƃɔ‐bai zaala zu. 13Gɛ́ lɛ dɛ ŋɛni ta ƃɔnɔ ponɛni wo wɔ é wulo nii wulu wa zoo wo dodo wo gaa ɣa. Kìgi ɣa ba ga wa gaa ɣa ƃɔɔ kpowũ 14tei tɔwɔ wo ta ɣaa ɣaa sa ba, kɛɛ ʋaa ma de maliɣii Ziizɛ na kui ɣa ziiti na wo zoo wo wɔɔlɔ ƃɔɔ ɣaazu gé ʋaa ma è ɣɛ velei nɔ gá kɛɛ la ga wiɛ wa ƃalaa.

15Tei tɔwɔ dài ɣɛ ga fai nii, gè ɣɛni wõi ɣɛɛzu ga gè va wo wɔ vɛ ga maa wũ pa, kɛɛ ʋaa ma nà daali‐mai ɣɛ wo ma ga tuuyiɛi yá vɛɛ da wo ya fele. 16Gè ɣɛni wõi ɣɛɛzu ga gà ɣɛ na liizu Masadooni gè laali wo ma. Gà lii na gè va wulu wɔnɔ wo wɔ vɛ wo tève Yudiiya yui zu. 17?Tei gè ɣɛni wõi ɣɛɛzu gè nii ɣɛ, gè ɣɛni ɣigi maa ʋeli‐felisu ʋaa ve? ?Gè nà deʋei ƃɛtɛni è ɣɛ nui nii ŋeteai nii zu ɣi‐gaa‐ziɛ ma kavele ƃɛtɛi ga gè ɣɛ tea “coi” gè ɣɛ tea wɔnɔ “ƃa” ga maa ʋilea? 18È ɣɛ velei nɔ Gala ge la ga nui nu ɣa laa la ga ƃɔɔƃɔɔ su, vele nɔ na é la ga woi nii gé yɛga bosu wiɛ. Ɛ́ lɛ ga “ooi” ta “ƃa”. 19Sevaana pɛ Temete pɛ nà pɛ, Gala goi gé boni wo zaama é vile Gala dui Ziizɛ Kolai va ɛ́ lɛ ŋɛni ga “ooi” ta “ƃa”. Sáala zu kɛɛvɛ nɔ ga “ooi” wɔ. 20Toku ge zei ga sáala zu ɣa Gala na ki‐togi ɣaazɔ zu ʋai zolowogɛ la. Na ɣa é kɛɛ a diɛ ɣɛ tea, “É ɣɛ ŋɛ na” Kolai zaala zu diɛ bo ga ƃaa la Gala ma. 21Kɛ̀ Gala ka é gé vɛɛ wo va é a de maʋaa zo kpãa ga de ɣɛ su ɣilekpu da Kolaini. Na ɣa ɣɛɛ na é de wulo ga de tii ɣɛ. 22É yee‐wo pɛɛni de va é baa ŋinɛgi leve de yiitiɛ zu ga é ɣɛ ga nii yá dɛ ga zɔi é vaazu kɛɛzu de vɛ.

23Gala ka é ga seele ga zɔi é kɛɛ gɛ̀ lɛ vaani Kɔlĩ tɔ ga pàa ʋai mɛ lɛ ɣɛ ga wo wãla‐ma ʋaa. 24Ɛ́ lɛ ga gá ƃɔɔ ziɣizu ga gaa‐ƃaa ɣa gé ya nii maazu wo yee lai ma. Gé vɛɛvɛ wo va a diɛ tii ɣɛ wo wuu‐zu‐nɛɛ ʋaa ma, ƃɔvɛlaale wo logɛ kpãa zee‐la‐mai zu.

Currently Selected:

KƆLĨITIƐ 1: DN1971

Highlight

Copy

Compare