1KƆLĨITIƐ 13

Wõila

Gà vaazu dɛ pele ta lɛɛzu ga wiɛ nii pagɛi é leve te pɛ ba.

1Anɛɛ ƃalaa gè woo laali‐taali bo nu ƃuse laa woi zu ta Gala ta ɣeelaitiɛ ta dɛi, ani wõila lɛ zèea ga ɣɛ nɔ ga kolui yá ŋada li kulo ɔɔ sɛɣɛ‐zɛɣɛgi yá ɣɛ lubusu. 2Anɛɛ ƃalaa Gala daa woo‐wo gaa‐ƃaa ɣɛ bɛ̀ gìɛ fai ɣaazɔ ɣaa ɣa doowugɛi yɛga ta kele‐ɣele fai ɣaazɔ, anɛɛ ƃalaa kɔnɔ zee‐la‐mai ɣaazɔ ɣɛ zèea ga gà zoo gè kɛ gizi kpaazagitiɛ te ziɣi wó ma, ani tɔwɔ wõila lɛ zèea, màʋai ɣa ɣɛ nɔ ga faa yãka. 3Anɛɛ ƃalaa gè weligi ɣaazɔ ɣɛ ga faa‐nɛɛ, na ɣa ɣɛɛ na giɛ̀ yoka teve ga tei gè ɣi kuloa ƃɔɔ zu, ani tɔwɔ wõila lɛ zèea, mawulo‐su‐nu‐ma nɛpɛ gɛ lɛ ɣɛɛ bɛ̀.

4Wõila ɣa ga zii‐lɔɔ ta tuola nɛɛ. Wõila lɛ ga sili ʋaa ɔɔ yoka‐tevea. 5Ɛ́ lɛ ga kpɔɔ‐ʋaa‐wɔɔlɔ‐gaazu ʋaa ɔɔ tuo ƃaala‐ƃaala‐boga. Wõila lɛ ga nu ɣili ƃɔɔ yii‐ma luo‐woga va. Ɛ́ lɛ ga nu yii ɣaa yìɛ wãla ga faa ʋii‐ƃɛɛ ɔɔ faa‐wãla‐ma luo‐woga. 6Wõila lɛ ga nu kuu‐zu‐nɛɛ wulo fai nii zu ɛ́ lɛ pele ma, kɛ̀ tɔ ga nu kuu‐zu‐nɛɛ wulo gaamai zu. 7Wõila‐wuloa ɣa ga nu ziɛ fai ɣaazɔ wu é fai ɣaazɔ ziɣi ga gaama, ki‐to‐su ɣɛ ma fai ɣaazɔ zu yíɛ yii la fai ɣaazɔ ɣa.

8Wõila lɛ wɔlɔ‐wɔlɔ wɛ̃ɛga. Gala daa woo‐wo fai na dɛi towaa ƃea gá, woo laali‐taali‐bo faitiɛ ta dɛi ta wɛ̃ɛ, kele‐ɣele fai na dɛi towaa ƃea gá. 9Ƃɔvɛlaale maa‐wulo‐zu ɣa da ɣele‐ɣelegi va, maa wulo‐zu wɔnɔ Gala daa woo‐wo fai va de vɛ. 10Kɛ̀ nii maa‐wulo‐zu lɛ ba nà ɣa vaa na, nii wɔgi maa‐wulo‐zu ba maʋaa ɣa ƃea gá. 11Tei gè ɣɛni ga lopo wolo, gɔ̀ yɛpɛ nɔ è ɣɛ lopo wolo gìɛ ɣi gaa ziɛ è ɣɛ lopo wolo gìɛ faa leʋe ɣi su è ɣɛ lopo wolo. Tei gè ɣɛɛni ga nuwuti, gè lopo wolo luoitiɛ looni ya. 12Nii zu da wɛlɛzu è ɣɛ nu ɣa ɣɛ ŋɛni maa niini kaazu pɛtɛ su. Gaa lɛ wodoni. Kɛ̀ siɛ ta ɣa vaazu ga de pɛtɛ sa ga ƃɔɔƃɔɔ su. Gè fai ta wɛ̃ni nɔ ba nii zu. Kɛ̀ gà vaazu gaa ɣaazu ƃɔɔ kãlai è ɣɛ velei nɔ màʋai ɣaa ɣai la Gala bɛ. 13Na ma zee‐la‐ma, ki‐to, wõila — faa saagɔi niitiɛ ta yɛ na wɔ. Kɛ̀ nii é ga fai kpakpa kelegi faa saagɔi niitiɛ zu tɔ ga wõila.

Currently Selected:

1KƆLĨITIƐ 13: DN1971

Highlight

Copy

Compare