1KƆLĨITIƐ 12

Faa‐nɛitiɛ te wuloai Gala baa ŋinɛgi ya

1Nà numaa, gɛ̀ lɛ wõini gɔ̀ wo yɛ liti su fai niitiɛ zu Gala baa ŋinɛgi te ɣɛɛ de vɛ ga faa‐nɛɛ. 2Wo kwɛ̃ni ga tei wɛ lɛ ŋɛni Gala faa ziɣini dɛ ga gaama, wo ɣakani wo li maa‐niini galagitiɛ wɔ tɛ lɛ yɛpɛɛ, ani ƃalaa wo yii wuloni ga pele mazii ta nɛpɛ wiɛ kɛ. 3Na ma gè wõini wo gaa ɣa ga nu nɛpɛ gɛ lɛ ɣɛɛ ƃɔɛzu Gala baa ŋinɛgi zaala zu manui ɔ́ ɣɛ tea, “Koto ɣa ɣɛ Ziizɛ va fãa!” Na ɣa wulo na su, nu nɛpɛ gɛ lɛ zooga ɔ́ ɣɛ tea, “Ziizɛ ɣa é ga de maliɣii,” kɛni Gala baa ŋinɛgi ɣa ɣɛ ga zaƃu manui na wo.

4Tɔwɔ de zooda ʋaitiɛ kɛi de vɛ ga faa‐nɛɛ máa ʋeli‐feligɛ. Kɛ̀ Gala baa ŋinɛgi é kɛɛzu tɔ nɔ ɣilekpu. 5De ɣɛɛ liitiɛ maa ʋeli‐feligɛ, tɔwɔ de maliɣii de tii ɣɛɛzu bɛ́ é nɔ ɣilekpu. 6Tii‐ɣɛɛ veleitiɛ maa ʋeli‐feligɛ wɔnɔ de ya, tɔwɔ Gala gilagi nɔ ɣa é maʋai wuuzu nu ɣile‐giledai ɣi su. 7Gala baa ŋinɛgi na tii ɣaa ɣa wodo nu pɛ faa ma nu ɣile‐giledai ɣɛɛ ʋai zu. 8Gaa‐ƃaa ʋeevɛ nui ta ya Gala baa ŋinɛgi zaala zu ga é yɛpɛ ga kele‐ɣele pele, gaa‐ƃaa ʋeeai wɔnɔ ta ya Gala baa ŋinɛ gilagi nɔ zaala zu ga é faa ɣaa‐ɣaa yɛpɛ wu. 9Gaa‐ƃaa ʋeevɛ nui ta ya Gala baa ŋinɛgi nɔ zaala zu ga zee‐la‐ma ɣɛ zéea, nu‐valo zobo feeai wɔnɔ ta vɛ Gala baa ŋinɛ gilagi nɔ zaala zu. 10Tii maa‐wɔlɔ‐wɔlɔ‐kɛɛ ɣaa‐ƃaa ʋeevɛ nui ta ya, Gala daa woo‐wo gaa‐ƃaa ʋeeai ta ya, ki‐gaa‐ziɛ yɔɔzu‐wɛ̃ɛ zobo feeai ta vɛ, woo laali‐taali‐bo gaa‐ƃaa ʋeeai ta vɛ, woo laali‐taali su‐wulo‐zu‐lɛɛ ɣaa‐ƃaa ʋeeai wɔnɔ ta ya. 11Gala baa ŋinɛgi tɔ ɣilekpu nɔ ɣa é fai niitiɛ ɣaazɔ wuuzu de ɣigi zu. Towa é gaa‐ƃai ɣaa wɛɛzu nu ɣile‐giledai vɛ è ɣɛ velei nɔ é wõini la.

Dɔtɔ ɣilagi vaa‐lo‐baitiɛ ɣaazɔ

12È ɣɛ velei nu lɔtɔi la ɣilekpu to‐su wɔ tamai ba, tɔwɔ nu lɔtɔi lo‐suvɛ lamavɛ ƃalaa ba te pɛ ta nɔ ga dɔtɔ ɣila, vele nɔ na é la ga Kolai. 13Ƃɔvɛlaale é ɣɛni ga Dusia ƃaa Geliikia, é ɣɛ wɔnɔ ga dua ƃaa wɔɔlɔa, Gala baa ŋinɛ gilagi nɔ zaala zu ɣa de pɛ bataize ɣɛɛ la ga diɛ ga de ɣɛ ga dɔtɔ ɣila su vea. De pɛ Gala baa ŋinɛ gilagi nɔ ɣa é de yii laa ʋega ƃɔɔ kpe‐kpe. 14Nu lɔtɔi lo‐suvɛ lɛ nɔ ɣilekpu. To‐suvɛtiɛ lamavɛ ba. 15Ani kilaa nu wɔwɔi gila gɔ ɣɛ na tea, “Tei tɔwɔ gɛ̀ lɛ ga nu yee, na ma gɛ̀ lɛ ga nu lɔtɔi vaa ʋai ta,” nà lɛ ƃega to‐suvɛ ta wolo ƃalaa ziɣi ba nu lɔtɔi ʋaa va. 16Ani wɔnɔ kilaa nu wui ɔ́ ɣɛ na tea, “Tei tɔwɔ gɛ̀ lɛ ga nu ɣaazu ɣɛzɛ, na ma gɛ̀ lɛ ga nu lɔtɔi vaa ʋai ta,” na lɛ ƃega to‐suvɛ ta wolo ƃalaa ziɣi ba nu lɔtɔi ʋaa va. 17Ani sa kilaa nu lɔtɔi ɣaazɔ ɔ́ ɣɛ na nɔ ga nu ɣaazu ɣɛzɛ, minɛ ɣa sa faa‐mɛni fai ɔ́ yɛ na? Ani wɔnɔ kilaa nu lɔtɔi ɣaazɔ ɔ́ ɣɛ na ga nu wui, minɛ ɣa ŋɛni‐wũ‐mɛni faa ɔ́ yɛ na? 18Tɔwɔ è ɣɛ velei é la, Gala ge nu lɔtɔi lo‐su ɣile‐giledai maʋaa zeini kpekpele su, è ɣɛ velei é wõini la. 19?Ani kilaa te pɛ gɔ ɣɛ na nɔ ga to‐su gila, nu lɔtɔi maʋaa mu gɔ sa yɛ minɛ? 20È ɣɛ velei é la, to‐suvɛ lamavɛ, tɔwɔ é nɔ ga dɔtɔ ɣilekpu. 21Nu ɣaazu ɣɛzɛgi lɛ zooga ɔ́ ɣɛ nu yee ma, “È maƃala lɛ mà.” Ɔ́ nɔ ɣɛ ga nu wũgi ɣɛ nu wɔwɔi ma, “È maƃala lɛ mà.” 22Ɛ́ lɛ ŋɛ na. To mu fɔlɔ nu lɔtɔi lo‐suvɛtiɛ te maʋaa wuloai è ɣɛ te ʋii ɣa ƃɛɛ ta ɣa te maƃala wɔɔlɔi nu ma. 23Na ɣa wulo na su nu lɔtɔi lo‐suvɛ vɛtiɛ é de ɣigi zu ga ƃaa lɛ te ma minɛtiɛ ɣa da te zo ga wũfe‐ma vele ga kpakpaa. Vɛtiɛ ná de lɔtɔi ʋaa va nátiɛ maa lɛ nɛɛni tɔ wulo kɛnɛ ma, da minɛtiɛ maa ɣili ga wũfe‐ma ƃakpa. 24Vɛtiɛ wɔgi natiɛ maa nɛi ga te wulo kɛnɛ ma, ɛ́ lɛ de ma ga kui ga de kɛ ŋɛ na ga minɛtiɛ. Tɔwɔ Gala ge nu lɔtɔi maʋaa zeiya kpekpele su ŋɛ na yíɛ ƃaa la vɛ ma ná lɛ ga ŋada maa nɛɛ‐nɛɛ 25kɛɛ ʋaa ma goo ɣaa laɣa‐laɣa ge mɛ lɛ ɣɛ nu lɔtɔi zu, kɛ̀ to‐suvɛtiɛ te kpala‐zo‐ma zii ɣilagi wo nɔ ga ɣiini. 26Ani nu lɔtɔi lo‐suvɛ ɣila ka laa nɔwɔ wosu, te pɛ ta ƃɔ su te laa nɔwɔ wo. Ani ƃaa ɣa laa na to‐suvɛ ɣila ma, te pɛ ta ƃɔ su te kuu‐zu‐nɛɛ wulo.

27Tɔwɔ wa ɣa wo ga Kolai lɔtɔi, wo ɣile‐giledai ga dɔtɔi lo‐suvɛ ɣile‐gile. 28Gala pɔ ge yee ƃadoga Ziizɛ na keelaitiɛ va ɣaʋu pa Gala pɛlɛi wu. Na wului é yee ƃado dáa woo‐wo beaitiɛ va, na wulu kala‐mɔitiɛ, na wulu tii maa‐wɔlɔ‐wɔlɔ‐kɛɛ vea, na wulu nu‐valo vea, na wulu kpɔ‐ba‐wo bea, na wulu faa wũ‐tuo vea, na wulu woo laali‐taali‐bo bea. 29?Nui pɛ ka é ga Ziizɛ na keela ʋaa ve? ?Nui pɛ ka é ga Gala daa woo‐wo nu? ?Nui pɛ ka é ga kala‐mɔɔ? ?Nui pɛ ka é tii maa‐wɔlɔ‐wɔlɔ kɛɛzu? 30?Nui pɛ ka nu‐valo ɣaa‐ƃaa zéea? ?Nui pɛ ka é woo laali‐taali bosu? ?Nui pɛ ka é woo laali‐taali su‐wulo‐zu lɛɛzu? 31Tɔwɔ de zooda ʋaitiɛ zu kɛ́i de vɛ ga faa‐nɛɛ, pagɛ niitiɛ te ƃakpai te leve te vaa pɛ ba nàtiɛ wõi wɔɔlɔ wo ma.

Currently Selected:

1KƆLĨITIƐ 12: DN1971

Highlight

Copy

Compare