Shpricha 30
30
Es 30. Gabiddel.
Di Vadda Fumm Agur
1Dess sinn di vadda fumm Agur, em Jakeh sei boo funn Massa.
Dess sawkt deah mann: “Ich binn meet, oh Gott;
ich binn meet, vi kann ich ohhalda?
2Ich binn geviss dummah es ennichah mensh,
ich habb di eisicht nett funn en mann.
3Ich habb veisheit nett gland,
un ich vays nix veyyich em Heilicha.
4Veah is nuff in da himmel ganga un viddah runnah kumma?
Veah hott da vind zammah gegeddaht in sei hend?
Veah hott di vassahra in en glayt gvikkeld?
Veah hott ausgmacht vo di endah funn di eaht sei sella?
Vass is sei nohma, un vass is seim Sohn sei nohma?
Vaysht du dess?
5Alli vatt funn Gott is voah;
eah is en shield zu selli es eem drauwa.
6Du nix veidahs zu sei vadda,
adda eah shtrohft dich, un du vatsht auskfunna fa en leeyah sei.
7Zvay sacha frohk ich funn diah,
dray si nett nunnah zu miah eb ich shtaub.
8Hald mich funn falshheit un leeya,
mach mich nett oahm adda reich,
avvah gebb miah yusht's broht es ich brauch.
9Vann ich may habb, mecht ich dich falaykla un sawwa,
‘Veah is da Hah?’
Adda vann ich oahm binn, mecht ich shtayla,
un da nohma funn mei Gott fashohma.
10Sawk nett di unvoahret veyyich en gnecht zu sei meishtah,
adda eah faflucht dich un du kumsht in druvvel.
11Es sinn selli es iahra faddah faflucha,
un doon iahra muddah nett saykna;
12selli es sich rein dinka in iahra aykni awwa,
avvah si sinn nett sauvah funn iahrem drekk;
13selli es iahra awwa hohch uf hayva,
un gukka so grohs-feelich rumm;
14selli es zay henn vi shvadda,
un iahra zay sinn ksetzt vi messahra,
fa di oahma vekk butza funn di eaht,
un selli es in noht sinn unnich di leit.
15Da bloot-suklah hott zvay mayt,
un si greisha, ‘Gebb miah, gebb miah!’
Es sinn drei sacha es nee nett satt vadda,
fiah es nee nett sawwa,
‘Sell is genunk!’:
16es grawb, un's muddahs-leib es kenn kinnah havva kann,
es land es immah vassah vill,
un's feiyah es nee nett sawkt,
‘Sell is genunk!’
17Es awk es en faddah fashpott,
un nunnah gukt uf en muddah,
zayld raus gepikt sei bei di grabba fumm deich,
un kfressa sei bei di awdlah.
18Drei sacha sinn zu vundahboah fa mich,
fiahda doon ich nett fashtay:
19da vayk funn en awdlah drovva in di hay,
da vayk funn en shlang uf en shtay,
da vayk funn en shiff uf em say,
un da vayk funn en mann mitt en maydel.
20Dess is da vayk mitt en aybrechichi fraw,
see est, butzt iahra maul ab,
un sawkt, ‘Ich habb nix letzes gedu’.
21Di eaht shiddeld unnich drei sacha,
un unnich fiahda kann see's nett shtenda:
22en gnecht vann eah kaynich vatt,
en unksheidah mann es foll ess-sach is,
23en maydel es nimmand leebt es keiyaht vatt,
un en mawt es di fraw iahra blatz nemd es si kshaft hott difoah.
24Fiah dingah uf di eaht sinn glay,
avvah si henn grohsi veisheit:
25Umensa sinn en shvach ungetziffah,
avvah si shtoahra iahra ess-sach uf im summah;
26felsa-hawsa sinn diahra mitt vennich graft,
doch macha si iahra haymeda um di shtay rumm;
27hoi-shrekka henn kenn kaynich,
avvah si gayn awl mitt-nannah vi greeks-gnechta;
28en lizzaht kann kfanga sei mitt di hand,
doch is eah kfunna in kaynich-heisah.
29Es sinn drei dingah es shtols lawfa,
fiahra es lawfa mitt iahra kebb in di hay:
30en layb, en mechtich diah,
en diah es nett vekk shpringd funn ennich ebbes;
31en shtolsah hohna, en gays-bokk,
un en kaynich mitt sei greeks-leit um sich rumm.
32Vann du dich dumm ohkshikt hosht, un dich uf gebraekt hosht,
adda evil im sinn katt hosht,
dann du dei hand ivvah dei maul hayva.
33Millich buddahra macht buddah,
di naws petza macht's bloot kumma,
un da zann ufshtadda bringd shtreit.”
Currently Selected:
Shpricha 30: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
