Shpricha 31
31
Es 31. Gabiddel.
Di Vadda Fumm Kaynich Lemuel
1Dess sinn di vadda fumm Lemuel, da kaynich funn Massa—
di vadda es sei maemm een gland hott:
2“Oh mei sohn, da sohn funn mei muddahs-leib,
da sohn funn mei gebaydah,
3du nett dei graft fasauma uf veibsleit,
adda dei macht uf selli es kaynicha fadauva.
4Heich moll, Lemuel, kaynicha sedda nett vei drinka,
roolahs sedda nett en falanges havva fa shteik drinkes,
5adda si mechta drinka un fagessa vass es ksetz sawkt,
un si mechta di aylendicha halda funn iahra recht greeya.
6Gebb shteik drinkes zu selli es am shtauva sinn,
un vei zu selli es in dreebsawl sinn.
7Loss si drinka un iahra oahmoot fagessa,
un nimmi an iahra aylenda denka.
8Shvetz uf fa selli es nett shvetza kenna fa sich selvaht,
un fa's recht funn awl selli es falossa sinn.
9Shvetz uf un richt mitt gerechtichkeit,
un mach es di aylendicha un oahma iahra recht greeya.”
Lohb Zu Di Shtandhaftich Haus-Fraw
10Veah kann en goodi fraw finna?
Si is may veaht es keshtlichi shtay.
11Iahra mann draut iahra folshtendich;
mitt iahra hott eah alles es eah brauch.
12Awl iahra layva lang dutt see eem goot,
un bringd eem kenn shawda.
13See gukt fa vull un flax,
un gleicht shaffa mitt iahra hend.
14See is vi en shiff es kawf-sach drawkt,
un bringd iahra ess-sach funn veit ab.
15See shtayt uf diveil es es noch dunkel is,
un risht ess-sach fa iahra haus-halding,
un gebt aw zu iahra mawda.
16See gukt en feld ivvah un kawft's;
mitt vass see fadeend, blanst see en vei-goahra.
17See dutt iahra eahvet mitt graft;
iahra eahm sinn shteik.
18See fahandeld iahra sach un kumd goot raus;
iahra licht gayt nett aus nachts.
19See shpind iahra ayknah naytz,
un haybt di shpindel in iahra hend.
20See macht iahra eahm uf zu di oahma,
un langd iahra hend naus zu selli in noht.
21See hott kenn angsht fa iahra haus-halding vann's shnayt,
fa si sinn awl geglayt in voahmi glaydah.
22See macht sich shayni dekk fa iahra bett;
iahra glaydah sinn gmacht aus fei purpel linnen duch.
23Iahra mann is gekend an di doahra funn di shtatt,
vo eah hokt mitt di eldishti fumm land.
24See macht glaydah aus linnen duch un fakawft si;
see fakawft belts zu di kawf-leit.
25See is geglayt mitt graft un eah,
un see hott kenn angsht veyyich di dawwa es am kumma sinn.
26See shvetzt mitt veisheit,
un mitt bamhatzichkeit land see anri leit.
27See vatsht ivvah di sacha funn iahra haus-halding;
un see est nett's broht funn faulheit.
28Iahra kinnah shtayn uf un preisa see,
un iahra mann lohbt see aw.
29Eah sawkt, “Feel veibsleit sinn goodi veivah,
avvah du bisht bessah es si awl.”
30En veibsmensh es sich shay ohshikt, kann em fafiahra,
un en shay ksicht bleibt nett fa'immah,
avvah en fraw es da Hah fircht, sett gepreist sei.
31Gebb iahra di eah es see fadeend hott mitt iahra hend,
loss iahra verka gepreist sei an di shtatt-doahra.
Currently Selected:
Shpricha 31: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
