Shpricha 17
17
Es 17. Gabiddel.
1'Sis bessah fa en drukkani grusht broht havva mitt fridda,
es vi en haus foll leit am essa mitt shtreit.
2En gnecht mitt veisheit zayld roola ivvah da boo es nett heicht,
un zayld en dayl funn di eahbshaft greeya vi ayns funn di breedah.
3Vi gold un silvah broviaht is bei feiyah,
so vadda di hatza broviaht beim Hah.
4En evilah mensh heicht ab zu evili leftz,
un aynah es leekt heicht ab zu en falshi zung.
5Veah di oahma fashpott dutt Deah nunnah es si gmacht hott,
un veah blesiah nemd in ebbah shunsht sei druvvel zayld kshtrohft vadda.
6Kinds-kinnah sinn da krohn funn aldi leit,
un di eah funn di kinnah is iahra eldra.
7Es shtayt en dummah mann nett goot oh fa grohs shvetza,
un noch feel vennichah sett en roolah leeya.
8Geld gevva hinna rumm is vi en keshtlichah shtay zu sellem es es gebt,
eah maynd es grikt eem alles es eah brauch.
9Veah letz gedu vattt un fagebt's, is am sucha fa leevi,
avvah veah ohhald shvetza diveyya faliaht sei freind.
10En shmeahdah mann land may bei aymol gezankt vadda,
es vi en dummah dutt bei en hunnaht mohl gegaysheld vadda.
11En evilah mensh sucht yusht fa sich shteibahra;
en shlechtah gebodda-drawwah vatt geyyich een kshikt.
12'Sis bessah fa en muddah beah ohdreffa es iahra glenni kshtohla grikt hott,
es vi en unksheidah mensh am sei dumhayda ausdrawwa.
13Vann en mensh evil fa goodes zrikk betzawld,
dann zayld evil sei haus nee nett falossa.
14Da ohfang funn shtreit is vi en damm am rinna,
so shtobbet's eb's graysah vatt.
15Di shuldicha frei gay lossa,
adda di unshuldicha shtrohfa—
da Hah hast si awl zvay.
16Vass goot is geld fa veisheit kawfa in di hand funn en unksheidah,
vann eah's nett dutt fa lanna?
17En freind gebt leevi di gans zeit,
un en broodah is geboahra fa helfa an di zeit funn noht.
18Yusht en mann unni goodah fashtand macht en bund,
un fashprecht fa goot shtay fa sei nochbah.
19Sellah es en leevi hott fa zadda gleicht shtreit,
un sellah es sei doah hohch macht is am gukka fa druvvel.
20En mann mitt en grummi meind zayld nett goot du,
un ebbah mitt en falshi zung fald in druvvel.
21En unksheidah boo bringd dreebsawl zu sei daett;
da daett funn en unksheidah boo hott kenn frayt.
22En fraylich hatz macht ebbah ksund,
avvah en bedreebdah geisht drikkeld di gnocha uf.
23En gottlohsah mensh nemd geld hinna rumm,
un fabeekt da vayk es recht is.
24En eisichtichah mann hald sei awwa uf veisheit,
avvah em dumma sei awwa sinn uf em end funn di gans veld.
25En unksheidah boo bringd dreebsawl zu sei daett,
un macht sei maemm es een gedrawwa hott bedreebt.
26Es is nett goot fa en unshuldichah mann shtrohfa,
un aw nett fa evvahshti gayshla veil si eahlich sinn.
27En mensh mitt eisicht sawkt nett feel,
un en mann es sacha fashtayt, vatt nett ufkshtatt.
28Even en unksheidah mensh es shtill bleibt is gnumma fa veisheit havva;
vann eah sei maul zu hald is eah fanumma fa shmeaht sei.
Currently Selected:
Shpricha 17: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
