Jesoiya 25
25
Es 25. Gabiddel.
Preis Zumm Hah
1Oh Hah, du bisht mei Gott,
ich hayb dich uf un lohb dei nohma;
du voahsht shtandhaftich
un hosht vundahboahri sacha gedu,
sacha es du im sinn katt hosht lang zrikk.
2Du hosht di shtatt in en shtay haufa gmacht,
di shtatt mitt vanda is en haufa;
di kaynich-heisah funn fremdi sinn kenn shtatt may;
un see vatt nee nimmi ivvah gebaut.
3Fasell zayla mechtichi leit dich eahra,
un shtett in lendah es unfashtendich sinn,
zayla dich firchta.
4Du voahsht en Roo-Blatz fa di oahma,
en Roo-Blatz fa selli in noht un in dreebsawl,
en Gebei im shtoahm,
un Shadda in di hitz.
Fa da ohften funn di unfashtendicha
is vi en shtoahm am blohsa geyyich en vand.
5Vi di hitz in en drukkanah blatz,
machsht du di fremda shtill sei;
vi di hitz keel vatt im shadda funn en volk,
so machsht du's leet funn di unfashtendicha shtill.
6Uf demm berg risht da Awlmechtich Hah
en grohs essa mitt goot ess-sach fa alli leit,
en grohs essa mitt goodah vei—
es besht flaysh un aldah vei.
7Uf demm berg nemd eah's duch ab
es alli leit zu dekt,
es duch es alli lendah zu gedekt hald.
8Un eah shlukt da doht uf fa'immah.
Gott da Hah zayld's awwa-vassah
ab butza funn alli ksichtah,
un nemd da shohm vekk
funn awl sei leit uf di eaht.
Da Hah hott kshvetzt.
9In sellah dawk zayld's ksawt vadda,
“Dess is geviss unsah Gott;
miah henn eem gedraut,
un eah hott uns saylich gmacht.
Dess is da Hah, miah henn unsah fadrauwa in een gedu,
vella fraylich un froh sei in sei saylichkeit.”
10Di hand fumm Hah zayld uf demm berg roowa,
avvah Moab zayld nunnah gedredda sei unnich eem,
vi shtroh in misht gedredda vatt.
11Si zayla iahra hend naus shtrekka drinn,
vi en shvimmah sei hend naus shtrekt fa shvimma.
Gott laykt iahra hohchmoot niddah,
even mitt iahra shiklichi hend.
12Eah reist eiyah hohchi un fashteikti vanda nunnah,
un lost si uf em bodda leiya.
Eah bringd si runnah uf da grund,
runnah in da shtawb.
Currently Selected:
Jesoiya 25: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
