Jesoiya 26
26
Es 26. Gabiddel.
En Lohb-Leet
1In sellem dawk zayld dess leet ksunga sei in Juda:
“Miah henn en shteiki shtatt.
Gott shteld di innahlicha un ausahra vanda uf,
fa leit aus di kfoah halda.
2Mach di doahra uf
so es di gerechta leit nei gay kenna,
selli es da glawva halda.
3Du haldsht selli in folkummanah fridda,
es iahra gedanka uf diah halda,
veil si sich falossa uf dich.
4Falosset eich uf da Hah fa'immah,
fa Gott da Hah is en ayvichah Felsa.
5Eah daymeedicht selli es in di hay voona,
eah laykt di hohch shtatt niddah;
eah laykt si nunnah uf da grund,
un shtohst si in da shtawb.
6See vatt nunnah gedredda mitt fees,
di fees funn selli es noht henn,
di fees funn di oahma.”
7Da vayk funn di gerechta is ayva,
du machsht di pawt funn di gerechta grawt.
8Miah voahra uf dich, oh Hah,
diveil es miah in dei gericht lawfa.
Miah vella an dich un an dei nohma denka,
sell is unsah falanga im hatz.
9Mei sayl hott en falanga fa dich in di nacht,
un mei geisht in miah dutt eahnshtlich sucha fa dich.
Vann dei gerichta uf di eaht kumma,
dann lanna di leit funn di veld gerechtichkeit.
10Even vann gnawt gvissa vatt zu di gottlohsa,
doon si alsnoch nett gerechtichkeit lanna;
un even in en land es ufrichtich is,
doon si alsnoch evil,
un sayna nett di hallichkeit fumm Hah.
11Oh Hah, dei hand is hohch ufkohva,
avvah si sayna see nett.
Loss si dei bekimmahnis sayna fa dei leit,
un loss si sich shemma.
Loss es feiyah es du haldsht fa dei feinda si fazeahra.
12Du shafsht fridda fa uns, Hah,
alles es miah ausgricht henn hosht du gedu fa uns.
13Oh Hah unsah Gott, anri meishtah unni dich
henn ivvah uns groold,
avvah dei nohma laynich doon miah eahra.
14Si sinn nau doht un layva nimmi,
di kshtauvana shtayn nett uf.
Du hosht si kshtrohft un zu nix gebrocht,
un hosht kenn gedenknis glost funn eena.
15Du hosht dei leit feel gmacht, oh Hah;
du hosht dei leit feel gmacht
un hosht hallichkeit grikt.
Du hosht's gans land graysah gmacht.
16 Hah, dei leit sinn zu diah kumma in iahra dreebsawl;
an di zeit es du si kshtrohft hosht
henn si yusht so ball pishbahra kenna.
17Vi en veibsmensh am en kind havva,
sich fadrayt un naus greisht in shmatza,
so voahra miah fannich deim ksicht, oh Hah.
18Miah voahra am en kind havva un in shmatza,
avvah miah henn nix foah gebrocht es yusht da vind.
Miah henn nimmand frei gmacht im land,
un henn di veld kenn neiyi hofning gevva.
19Di dohda funn unsah leit zayla viddah layva,
iahra leivah shtayn viddah uf.
Vekket uf un singet mitt frayt,
diah es unnich em shtawb leiyet.
Dei dau is vi da meiya-dau uf di eaht,
un di eaht bringd awl iahra dohdi raus.
Da Hah Zayld Richta
20Gaynd, mei leit, gaynd in eiyah shtubba,
un machet di deahra zu hinnich eich;
fashteklet eich fa en veil,
biss sei zann fabei ganga is.
21Gukket moll, da Hah is am aus sei gebei kumma,
fa di leit uf di eaht shtrohfa fa iahra sinda.
Di eaht zayld's bloot veisa es fagossa voah uf iahra,
un fashtekkeld selli nimmi lengah es doht gmacht voahra.
Currently Selected:
Jesoiya 26: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
