Jesoiya 24
24
Es 24. Gabiddel.
Gott Sei Gericht Uf Di Eaht
1Gukk moll, da Hah zayld di eaht leah un veesht macha,
eah fadeahbt da grund un shtroit iahra leit ausnannah.
2Un's gayt mitt di preeshtah vi mitt di leit,
un mitt em meishtah vi mitt em gnecht,
un mitt di fraw vi mitt di mawt,
un mitt em kawfah vi mitt em fakawfah,
un mitt em naus-laynah vi mitt em laynah,
un mitt em shuldicha vi mitt demm es eah's shuldich is.
3Di eaht vatt gans leah un fadauva,
fa da Hah hott dess vatt ksawt.
4Di eaht favelkt un drikkeld uf,
di veld vatt shvach un drukka,
di hohcha uf di eaht vadda matt.
5Di eaht is unheilich gmacht bei iahra leit,
si henn Gott sei ksetz ivvah-gedredda,
henn di gebodda fa'ennaht,
un henn's ayvich bund fabrocha.
6Fasell frest da fluch di eaht uf,
di leit missa di shuld drawwa,
un fasell vadda selli uf di eaht ufgebrend,
yusht vennich leit sinn ivvahrich.
7Di vei-shtekk drikla uf,
un da nei vei vatt vennich;
awl di lushticha zayla yammahra.
8Di fraylich yacht funn di tambourines is shtill,
di yacht funn di lushticha hott kshtobt,
un di fraylich yacht funn di harf shtobt.
9Si drinka nimmi vei un singa,
da vei is biddah zu di drinkah.
10Di fadauva shtatt is nunnah gebrocha,
alli haus is zu gmacht un nimmand kann nei gay.
11In di shtrohsa greisha si naus fa vei,
nimmand froit sich un leit sinn bedreebt,
di fraylichkeit is vekk gnumma funn di eaht.
12Di shtatt-leit in shtikkah,
un's doah is alles fabrocha.
13So zayld's sei uf di eaht,
un unnich di heida,
so es vi da ayl-bohm kshiddeld vatt,
un di letshta drauva abkshnidda vadda.
14Si vadda laut, un singa mitt frayt,
fumm say in di west hayva si em Hah sei hallichkeit uf.
15So preiset da Hah in di east,
hayvet uf da nohma fumm Hah, da Gott funn Israel,
ivvahrawlich am say nohch.
16Miah heahra leit singa funn di endah funn di eaht:
“Hallichkeit zumm Gerechta.”
Avvah ich muss sawwa, “Favass binn ich so aylendich,
favass binn ich so aylendich, vay zu miah!
Di zvay-ksichticha zayla zvay-ksichtich sei,
un di falsha yusht noch may falsh.”
17Oh leit funn di eaht,
angsht un pitt-lechah un fang-shtrikka
sinn am voahra uf eich.
18Selli es shpringa funn di shreklich yacht funn furcht,
zayla in's pitt-loch falla,
un selli es aus em loch gradla,
zayla kfanga sei mitt em fang-shtrikk.
Di fenshtahra fumm himmel vadda uf gmacht,
un da fuddah funn di eaht zayld shidla.
19Di eaht is ufgebrocha,
is uf kshpalda un alles fashiddeld.
20Di eaht vakkeld vi en ksoffanah,
un shokkeld zrikk un faddi vi en heisli im vind;
di shuld funn iahra sinda is so shveah uf iahra,
es see fald un kann nee nimmi uf shtay.
21Uf sellem dawk zayld da Hah
di macht fumm himmel ovva droh,
un di kaynicha funn di eaht unna droh shtrohfa.
22Si zayla zammah ksammeld sei
vi kfangani in en kellah-shtubb,
un eikshpatt sei in en jail;
feel dawk shpaydah vadda si kshtrohft.
23Da moon un di sunn zayla blayich vadda mitt shohm,
fa da Awlmechtich Hah zayld kaynich sei
uf em Berg Zion in Jerusalem,
un sei hallichkeit zayld fannich di eldishti sei.
Currently Selected:
Jesoiya 24: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
