Habakuk 3
3
Es 3. Gabiddel.
Em Habakuk Sei Gebayt
1En gebayt fumm brofayt Habakuk fa di unshuldicha.
2 Hah, ich habb keaht vi hohch ohksenna es du bisht;
un di verka es du dusht macha es ich mich feich, oh Hah.
Du si viddah in unsah dawk,
in unsah dawk loss si vissa gmacht sei,
in dei zann, fagess nett bamhatzichkeit.
3Gott is funn Theman kumma,
un Sellah es Heilich is fumm Berg Pharan. (Sela)
Sei hallichkeit fild di himla,
un sei lohb fild di eaht.
4Sei glanz voah vi di sunn am uf kumma,
licht shtrawla sinn funn sei hand ganga,
datt voah sei graft fashtekkeld.
5Peshtelens is fannich eem heah ganga,
un dohdes-grankheit is hinnich eem nohch kumma.
6Eah is kshtanna, un hott di eaht kshiddeld,
eah hott gegukt, un hott di heida gmacht ziddahra.
Di ayvicha berga sinn fabrocha,
un di alda hivla sinn zammah kfalla.
Sei vayya sinn ayvich.
7Ich habb di tents funn Kushan in noht ksenna,
un di leit funn Midian henn geziddaht.
8Voahsht du bays mitt di revvahra, oh Hah?
Voah dei zann geyyich di grikka?
Voahsht du zannich mitt em say
vo du dei geil gridda hosht,
uf dei greeks-veyya es ivvah-gnumma henn?
9Du hosht dei bow grisht,
un dich grisht fa dei arrows sheesa. (Sela)
Du hosht di eaht kshpalda mitt revvahra.
10Di berga henn dich ksenna, un henn kshiddeld.
Es hohch vassah is fabei gloffa;
es deef vassah hott grohsi yacht gmacht,
un iahra vella voahra hohch.
11Di sunn un da moon im himmel henn shtill kshtanna,
fumm glanz funn dei arrows am fleeya,
fumm licht funn dei glitzahrichah shpiah.
12In dei haysah zann bisht du ivvah di eaht gloffa,
un voahsht veesht bays vi du di heida fashtambt hosht.
13Du bisht kumma fa dei leit frei setza,
fa dei ksalbdah raus helfa.
Du hosht da foah-gengah fumm gottlohsa haus kshlauwa,
un hosht een uf kshpalda funn di hifta biss an da hals. (Sela)
14Du hosht een in da kobb kshtocha mitt sei ayknah shpiah,
vo sei greeks-gnechta raus kshprunga sinn fa uns ausnannah shtroiya.
Si henn sich kfroit vi si kumma sinn
fa di aylendicha fressa es am sich fashtekla voahra.
15Du hosht da say uf kshtatt mitt dei geil,
un hosht grohsi vella gmacht im vassah.
16Ich habb dess keaht un mei hatz hott geglobt,
mei leftz henn geziddaht funn di yacht;
mei gnocha sinn faul gedrayt,
un mei bay henn kshiddeld.
Ich voaht geduldich fa da dawk
es dreebsawl uf di leit kumd es geyyich uns shtreida.
17Even vann da feiya-bohm nett ausshlakt,
un di vei-shtekk kenn frucht henn,
even vann di ayl-baym kenn ayl gevva
un di feldah kenn ess-sach gevva,
even vann kenn shohf in di penn sinn
un kenn fee in di shtell,
18doch zayl ich mich froiya deich da Hah,
un zayl fraylich sei in Gott mei Frei-Shtellah.
19Gott da Hah is mei graft;
eah macht mei fees vi hasha fees,
un fiaht mich ivvah hohchi bletz.
Zumm foah-singah. Fa kshpeeld sei mitt harfa.
Currently Selected:
Habakuk 3: pdcB
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible