Habakuk 2
2
Es 2. Gabiddel.
1Ich nemm mei blatz am vatsha,
un graddel nuff uf da vatsh-tavvah;
ich voaht fa sayna vass eah sawkt zu miah,
un vass mei andvat zu eem sei soll veyyich sei glawk zu miah.
Em Hah Sei Andvat
2No hott da Hah dess andvat gevva:
“Shreib anna vass du ksenna hosht
un mach's playn uf babiah
so es sellah vo's drawkt, es laysa kann.
3Fa di vision es du ksenna hosht is fa shpaydah naus,
dess shvetzt veyyich di end-zeit,
un zayld nett letz sei.
Even vann's lang gayt, voaht difoah,
es zayld fashuah blatz nemma, un zayld nett shpoht sei.
4Gukk moll, sellah es shtols is,
is nett recht in sei sayl;
avvah da gerecht zayld layva bei seim glawva.
5Un veidah, vei drinkes dutt da shtols mann fafiahra,
so es eah shtols un unruich is.
Eah is greedich vi's grawb,
un vi da doht, is nee nett zufridda.
Eah sammeld awl di heida zu sich selvaht,
un geddaht awl di leit zu sich.
6Zayla nett awl dee leit een fashpodda un sawwa,
‘Vay zu eem es kshtohla shtoft uf heifeld
un macht sich reich bei geld naus layna!
Vi lang zayld dess on gay?’
7Zayla nett dei layns-leit bletzlich ufshtay geyyich dich?
Zayla si nett ufvekka un dich ziddahra macha?
No zayla si dich rawva.
8Veil du feel lendah grawbt hosht,
dann zaylsht du grawbt sei bei di leit es ivvahrich sinn.
Fa du hosht mensha-bloot fagossa,
un awl di lendah, shtett un leit faveesht un umgebrocht.
9Vay zu eem es sei haus baut mitt uneahlich geld,
un dutt sei nesht in di hay,
fa's sayf halda funn di kfoah.
10Du hosht feel leit unnah gay gmacht,
un hosht dei ayya haus fashohmd,
un deich dess hosht ksindicht geyyich dich selvaht.
11Di shtay in di vand roofa naus,
un di balka un's hols zayla andvat gevva.
12Vay zu eem es en shtatt baut mitt fagossa bloot,
un di shtatt shteik macht bei rawva!
13Is es nett fumm Awlmechticha Hah
es leit iahra eahvet nuff gayt in flamm,
un di heida sich meet macha fa nix?
14Fa di eaht zayld foll sei mitt di eisicht
fumm Hah sei hallichkeit,
so vi di vassahra da say zu dekka.
15Vay zu eem es sei nochbahra drinka macht,
un leaht fumm gifticha kobli biss si ksoffa sinn,
so es eah si no nakkich sayna kann.
16Du zaylsht foll sei mitt shohm in blatz funn hallichkeit.
So drink du nau un veis dei nakkichheit!
Es kobli im Hah sei rechtsi hand kumd rumm zu diah,
un shohm zayld dei hallichkeit zu dekka.
17Es veesht sach es du gedu hosht zu Lebanon
zayld ivvah dich kumma,
un es du di diahra doht gmacht hosht
zayld dich fagelshtahra.
Fa du hosht mensha-bloot fagossa,
un hosht di lendah un shtett fadauva,
un awl di leit es drinn voahra.
18Vass goot is en gleichnis, siddah es en mensh es gmacht hott?
Adda en gegossa gleichnis es yusht leeya land zu leit?
Fa deah es es macht, draut in sei aykni eahvet,
vann eah gleichnisa macht es nett shvetza kenna.
19Vay zu eem es sawkt zumm hols, ‘Vekk uf!’
Adda zu en dohdah shtay, ‘Shtay uf!’
Kann sell ding roht gevva?
Es is ivvah-gezowwa mitt gold un silvah;
es hott kenn ohften.
20Avvah da Hah is in seim heilicha tempel;
loss di gans eaht shtill sei fannich eem.”
Currently Selected:
Habakuk 2: pdcB
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
