Breddichah 9
9
Es 9. Gabiddel.
Alli-Ebbah Muss Shtauva
1So habb ich dess alles ivvah-gedenkt in meim hatz un habb ausgmacht es di gerechta un selli mitt veisheit, un aw vass si doon, is alles in di hend funn Gott. Avvah nimmand vayst eb leevi adda hass am voahra is uf een.
2Es zayld gleicha sei fa alli-ebbah. Es zayld ay end sei fa di gerechta un di gottlohsa, di gooda un di shlechta, selli es rein sinn un selli es nett sinn, un selli es opfahra un selli es nett doon.
So vi's is mitt em gooda mann,
so is es mitt em sindah;
so vi's is mitt demm es shveahra dutt,
so is es mitt sellem es sich feicht shveahra.
3Dess is es evil ding in alles es ohgayt unnich di sunn; sell is, es es gleicha end zayld zu alli-ebbah kumma. Un di hatza funn mensha sinn foll evil un unfashtand diveil es si levendich sinn, un shpaydah missa si shtauva.
4Ennich ebbah es noch unnich di levendicha is hott hofning. Even en levendichah hund is bessah ab es en dohdah layb!
5Fa di levendicha vissa es si shtauva zayla,
avvah di dohda vissa nix;
si greeya nimmi veidah ennichah lohn,
un nimmand denkt may an si.
6Iahra leevi un hass un fagunsht
sinn shund lang faganga;
si zayla kenn dayl may havva
mitt ennich ebbes es es gebt unnich di sunn.
7So gay un ess dei broht mitt frayt, un drink dei vei mitt en fraylich hatz, fa Gott hayst goot vass du dusht.
8Du veisi glaydah oh, un salb dei kobb mitt ayl.
9Sei fraylich in demm layva mitt dei fraw es du leeb hosht so lang es du laybsht in demm katz layva es Gott diah gevva hott unnich di sunn. Fa dess is dei dayl im layva un in dei eahvet es du dusht unnich di sunn.
10Vass-evvah es dei hend finna fa du, du's mitt awl dei macht, fa vo du anna gaysht im grawb zayld kenn eahvet adda denkes adda eisicht adda veisheit sei.
11Ich habb aw dess ksenna unnich di sunn:
Selli es shteik shpringa doon nett immah beeda,
un di shteika henn nett immah ivvah-hand im greek.
Selli mitt veisheit henn nett immah ess-sach;
di shmeahda sinn nett immah reich,
un di glanda vadda nett immah bessah gyoost.
Avvah di recht zeit un glikk dreft alli-ebbah.
12Un da mensh vayst aw nett vann sei shtund kumd:
Vi fish es unfahoft kfanga vadda in en net,
adda fekkel in en fall,
so vadda mensha kfanga bei shlechti zeida
vann si unfahoft uf si kumma.
Veisheit Is Bessah Es Macht
13Ich habb aw veisheit ksenna unnich di sunn un's hott en deefah meik glost in miah:
14Es voah moll en glenni shtatt mitt yusht vennich leit drinn. Un en shteikah kaynich is geyyich si kumma, hott di shtatt umringd un hott grohsi grund heifa ufgebaut veddah di vanda.
15Nau in selli shtatt hott en oahmah mann gvoond mitt feel veisheit. Un eah hott di shtatt kalda funn ivvah-gnumma vadda deich sei veisheit. Avvah noch sellem hott nimmand may an sellah oahm mann gedenkt.
16So habb ich ksawt, “Veisheit is bessah es graft.” Avvah em oahma mensh sei veisheit vatt niddah gezayld un sei vadda sinn nett abkeicht.
17Shtilli vadda funn selli mitt veisheit,
sedda may keaht sei
es di roolahs funn di unksheida iahra laudi vadda.
18Veisheit is bessah es greeks-ksha
avvah ay sindah kann feel shawda du zu sell vass goot is.
Currently Selected:
Breddichah 9: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
