Breddichah 10
10
Es 10. Gabiddel.
1Vi dohdi mukka goot-shmakkich ayl en faulah kshmakk gevva,
so dutt en glay unksheit ding may veeya es veisheit un eah.
2Es hatz fumm mann mitt veisheit gayt rechts,
avvah's hatz fumm unksheida gayt lings.
3Even vann eah am vayk nohch lawft,
dann fashtayt da unksheit nett feel,
un eah veist alli-ebbah vi dumm es eah is.
4Vann en roolah bays vatt ivvah dich,
bleib vo du bisht;
ebbes oahrich letzes kann ivvah-kumma sei
bei shtill bleiva.
5Es hott en evil es ich ksenna habb unnich di sunn;
es is en faylah es roolahs macha.
6Samm unksheidi leit vadda in hohchi bletz gedu,
diveil es di reicha in niddahri bletz gedu vadda.
7Ich habb bunds-gnechta uf di bikkel funn geil ksenna,
diveil es di evvahshti am lawfa sinn vi gnechta.
8Veah-evvah es en loch grawbt mecht nei falla;
veah-evvah es deich en vand brecht
mecht gebissa vadda bei en shlang.
9Veah-evvah es shtay raus shneit mecht sich vay du dibei,
un veah blekk shpald kann sich in di kfoah du.
10Vann en ax shtumb is
un da shneit nett shauf gmacht vatt,
dann nemd's may graft
avvah mitt veisheit kann's faddich gmacht sei.
11Aynah es kshvetzah drawkt,
beist vi en shlang eb see zohm gmacht is beim shlanga-mann.
12Di vadda aus em maul fumm mann mitt veisheit
macha een ohksenna sei,
avvah di vadda fumm unksheida mann
bringa een zu nix.
13Am ohfang sinn sei vadda yusht dummi kshvetzah,
avvah am end sinn si ungettlichah roht.
14Da unksheit mann hott feel zu sawwa,
avvah nimmand vayst vass am kumma is.
Nimmand vayst vass es gebt mitt eem shpaydah naus.
15Em unksheida sei eahvet macht een meet
so es eah da vayk nett vayst zu di shtatt.
16Vay zu diah, oh land, es en kind hott fa en kaynich,
un dei evvahshti macha en grohs essa meiyets.
17Avvah ksaykend bisht du, oh land, vann dei kaynich
geboahra voah funn en kaynichi nohch-kummashaft,
un dei evvahshti essa an di recht zeit—
fa grefta greeya un nett fa ksoffa vadda.
18Vann en mann zu faul is fa's dach fixa,
dann doon di balka sich glei beeya,
un deich di faulheit dutt's dach rinna.
19En grohs essa macht es leit lacha,
un vei macht si fraylich,
avvah's nemd geld fa alles zvayk bringa.
20Fashimf nett da kaynich, even in dei gedanka,
un fafluch nett di reicha in dei bett-shtubb,
veil en fokkel funn di luft dei vadda drawwa mecht,
un eena sawwa vass du sawksht.
Currently Selected:
Breddichah 10: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
