Yos 13

AMBUJE akumlamula Yoswa kuti ajigale cilambo cicasigele

1Pandaŵi jelejo ŵaliji ali acekulwipe mnope. AMBUJE* ŵatite kwa jwalakwe, “M'mwe mcekulwipe mnope, nambo cilambo cisigelepe cakuti msumule: 2upande wesope wa Filisitiya ni Geshuli, 3yalumo soni upande wosope wa Afimu kum'mwela. (Cilambo cakutyocela ku Lusulo lwa Siho, ku malile ga Iguputo, mpaka kumpoto ku malile ga Ekiloni, caŵalanjidwaga ca Kenani; ayimwene ŵa Afilisiti ŵatamaga ku Gasa, Ashidodi, Ashikeloni, Giti, ni Ekiloni). 4Pana soni cilambo ca Akenani, ni Meala (cicaliji ca Asidoni), mpaka ku Afeki, ku malile ga Aamoli; 5cilambo ca Agebala; Lebanoni josope kungopoko lyuŵa, kutyocela ku Baala Gadi, kukuli kum'mwela kwa Litumbi lya Helimoni, mpaka ku Mpata wa Hamati. 6Cele cilambo cakuti mcipundeci cikupwatikanya upande wosope wa Asidoni, ŵakutama ku cilambo ca kwitumbi pasikati pa Matumbi ga Lebanoni ni Misilefoti Mayimu. Une tinjatoposya pakwakoposya ŵele ŵandu wosopeŵa pitiŵaŵandicileje ŵandu ŵa ku Isalaeli. M'mwe mkusosekwa kucigaŵa cilamboco mwa ŵandu ŵa ku Isalaeli, mpela munamlamulile m'mwejo kuti mtende.#Num 33:54 7Myoyo sambano, gaŵani aci cilamboci mwa mitundu jine msano ni mcecejo ni litika lya lukosyo lwa Manase, kuti ciŵe cawocawope.”

Gaŵanya kwa upande wa kungopoko lyuŵa kwa Lusulo lwa Yolodani

8Mitundu ja Lubeni ni Gadi ni litika line lya lukosyo lwa Manase ŵaliji ali apocele cilambo ciŵapele jemanjajo Mose,* jwakutumicila jwa AMBUJE; cicaliji mbali ja kungopoko lyuŵa kwa Lusulo lwa Yolodani.#Num 32:33; Det 3:12 9Upande wawo wajendelecele ku Aloeli (pa ngulugulu pa Ciŵata ca Alinoni) ni msinda wa pasikati pa cele ciŵataco ni kuwanganya cawe cosope kutyocela ku tawuni ja Medeba mpaka ku msinda wa Diboni. 10Upande wawo wajendelecele mpaka kungopoko lyuŵa kwa malile ga Aamoni. Upandewo wapwatice soni misinda josope jiŵalamulilaga Mwenye Sihoni, jwa Aamoli, kutyocela ku msinda wa Heshiboni. 11Upandewo wapwatice soni Giliyadi, yigawo ya Geshuli ni Maaka, litumbi lyosope lya Helimoni, ni Bashani josope mpaka ku Saleka. 12Japwatice ucimwene wa Ogi, jwakusigala jwa Lefayimu, juŵalamulile ku Ashitaloti ni Edileyi. Mose ŵaliji ali ŵapundile ŵanduŵa ni kwakoposya. 13Myoyo, Aisalaeli nganiŵatoposya ŵandu ŵa Geshuli ni Maakati; jemanjajo ali mkutamape mu Isalaeli.

14Mose nginapeleka cilambo ku lukosyo lwa Lefi. Mpela muŵaŵecetele AMBUJE kwa Mose, jemanjajo ŵaliji ŵamti apoceleje yakwagaŵila ya mbopesi syakutinisya pa malo gakupelecela mbopesi yakupelecedwa kwa AMBUJE Mlungu ŵa Isalaeli mpela cipanje cawo.#Det 18:1

Upande uŵapelece Mose ku lukosyo lwa Lubeni

15Mose ŵaliji ali apelece kambali ka cilambo kwa maŵasa ga lukosyo lwa Lubeni mpela kawokawope. 16Upande wawo wajendelecele mpaka ku Aloeli (pa mbali pa Ciŵata ca Alinoni) ni msinda wa pasikati pa cele ciŵataco ni japwatice cituluka cosope kusyungulila Medeba. 17Japwatice Heshiboni ni misinda josope pa citulukapo: Diboni, Bamoti Baala, Beti Baalameyoni, 18Yahasi, Kedemoti, Mefati, 19Kiliyataimu, Sibima, Seleti Sahala petumbi lya ciŵataco, 20Beti Piyoli, mwiŵanda mwa Litumbi lya Pisiga, ni Beti Yeshimoti. 21Japwatice misinda josope ja mcituluka ni ucimwene wosope wa mcimwene Sihoni jwa Aamoli, juŵalamulilaga ku Heshiboni. Mose ŵampundile jwalakwejo, yalumo soni ni ayimwene ŵa Midiyani: Efi, Lekemu, Suli, Huli ni Leba. Wosope ŵaŵalamulilaga cilambo m'malo mwa Mwenye Sihoni. 22Mwa ŵele ŵiŵawulajidwe ni ŵandu ŵa ku Isalaeli ŵaliji Balamu mwanace jwamlume jwa Bewoli. 23Yolodani galiji malile ga lukosyo lwa Lubeni kungapilo lyuŵa. Aji jaliji misinda ni misi jiŵapelece ku maŵasa ga lukosyo lwa Lubeni mpela jawojawope.

Upande uŵapelece Mose ku lukosyo lwa Gadi

24Mose ŵaliji ali apelece soni mbali ja cilamboco kwa maŵasa ga lukosyo lwa Gadi mpela cawocawope. 25Upande wawo wapwatikenye Yasa ni misinda josope ja Giliyadi, litika lya cilambo ca Aamoni mpaka ku Aloya, jijili kungopoko lyuŵa kwa Laba; 26cilambo cawo cajendelecele ku Lamati Misipa ni Betonimu, kutyocela ku Heshiboni mpaka ku Mahanaimu mpaka kumalile ga Lodebala. 27Mciŵata ca Yolodani upande wawo wapwatice Beti Halamu, Beti Nimila, Sukoti, ni Safoni, misi jijasigele ja ucimwene wa Mwenye Sihoni jwa Heshiboni. Malile gawo ga kungapilo lyuŵa galiji Lusulo lwa Yolodani mpaka kumpoto ku Nyasa ja Galileya. 28Jeleji jaliji misinda ni misi jiŵapelece kwa maŵasa ga lukosyo lwa Gadi mpela gawogawope.

Mbali jiŵapelece Mose kungopoko lyuŵa kwa Manase

29Mose ŵaliji ali apelece kambali ka cilambo kwa maŵasa ga hafu ga lukosyo lwa Manase mpela kawokawope. 30Upande wawo wajendelecele ku Mahanaimu ni japwatikenye Bashani josope, ucimwene wosope wa Ogi, mwenye jwa ku Bashani, yalumo soni ni misi 60 ja Yaili ku Bashani. 31Japwatikenye litika lya Giliyadi, nambo soni Ashitaloti ni Edileyi, mulikulungwa mwa misinda ja ucimwene wa Ogi ku Bashani. Gosopega gapelece kwa hafu ja maŵasa gigakopwece kutyocela kwa Makili mwanace jwa Manase.

32Mwelemu ni muŵagaŵile Mose cilambo ca kungopoko lyuŵa kwa Yeliko ni Yolodani piŵaliji ali mwilambo lya Mowabu. 33Nambo Mose nginapeleka malo galigose ku lukosyo lwa Lefi. Jwalakwe ŵasalile jemanjajo kuti cipanje cawo caliji camti ticiŵe mbali jimo ja yakupeleka ya kwa AMBUJE Mlungu jwa Aisalaeli.#Num 18:20; Det 18:2

Currently Selected:

Yos 13: YAWO

Highlight

Copy

Compare