Yos 1
1
Mlungu akumlamula Yoswa kuti acipunde cilambo ca Kenani pa ngondo
1Mose* jwakutumicila jwa AMBUJE* ŵawile, myoyo AMBUJE ŵaŵecete ni Yoswa mwanace jwa Nuni, juŵaliji mkamusi jwa Mose. AMBUJE ŵaŵecete kwa Yoswa kuti, 2“Mose jwakutumicila jwangu awile, sambano m'mwejo mliŵicile cilepe, ni ŵandu wosope ŵa ku Isalaeli, ni mjomboce Lusulo lwa Yolodanilu, kuti mjinjile mcilambo cingucipeleka kwa jemanjaji. 3Malo galigose gatiluliŵate lusajo lwenu nagapelece kwa jemanja, mpela munamsalilile Mose mu cilanga.*#Det 11:24-25 4Malile genu tigacityocela ku cipululu cakum'mwela mpaka ku matumbi ga Lebanoni kumpoto, kutyocela ku lusulo lwalukulungwa lwa Yufuleti kungopoko lyuŵa, kupitila ku cilambo ca Ahiti, mpaka ku Nyasa ja Mediteleniyani kungapilo lyuŵa. 5Pangali jutacimpunda m'mwejo pimli cijumi. Une tinjiŵa ni m'mwejo mpela munaŵelele ni Mose. Tinjiŵa ni m'mwejo masiku gosope ngasinimleka.#Det 31:6, 8; Aheb 13:5 6Mŵe ŵamacili ni ŵakulimba mtima, pakuti timciŵa jwakwalongolela aŵa ŵanduŵa pitacijinjilaga mcilambo cinatesile cilanga kwa acinangolo ŵawo kuti tinacipelece kwa jemanjaji.#Det 31:6-7, 23 7Mgambe kuŵa ŵamacili ni ŵakulimba mtima, mlolecesye kuti mpikanile yosope yene yigakumjiganya Malamusi giŵamlamwile Mose jwakutumicila jwangu. Mkasimgaleka pakugalawucila ku mkono wamlyo kapena wa mciji nipo timcipunda kulikose kutimcijawulaga. 8Msimicisyeje kuti buku ja Malamusi jikuŵalanjidwa ndaŵi syosope syakupopela ŵandu. Mjiganicisyeje musi ni cilo, nipo mlolecesyeje kuti mkupikanila yosope yene yilembedwe mwelemo. Myoyo timcisicila ni kupunda kwakwe. 9Kumbucilani kuti nimlamwile m'mwejo kuti mŵe ŵamacili ni ŵakulimba mtima! Mkajogopa kapena kwasa mtima, pakuŵa une, AMBUJE Mlungu jwenu, ndili ni m'mwejo kulikose kutimjawuleje.”
Yoswa akupeleka ukumu kwa ŵandu
10Myoyo Yoswa ŵalamwile acimlongola kuti, 11ajawule ku cigono nipo akasalile ŵandu kuti, “Alinganye cile yakulya, ligongo mu ndaŵi jakwanila masiku gatatu tajomboce Lusulo lwa Yolodani kuja kukwinjila cilambo citacipelece AMBUJE Mlungu jwenu kwa jemanja.”
12Yoswa ŵatite kwa mitundu ja Lubeni ni Gadi ni kwa hafu ja lukosyo lwa Manase kuti,#Num 32:28-32; Det 3:18-20; Yos 22:1-6 13“Mkumbucile maloŵe giŵamsalile Mose jwakutumicila jwa AMBUJE kuti AMBUJE Mlungu jwenu tacimpa jemanja cele cilamboci kumbali ja kungopoko lyuŵa kwa Yolodani kuti ciŵe ca jemanja. 14Aciŵamkwenu, ŵanace ŵenu, ni yilangwa yenu tiyicitamaga apano, nambo asilikali ŵenu, ali ajigele yida ya ngondo, tacijomboka kuja kwa Aisalaeli acimjawo kukwakamusya, 15mpaka ali ajinjile mcilambo ca kungapilo lyuŵa kwa Lusulo lwa Yolodani ciŵampele AMBUJE Mlungu jwenu. Pitacipeleka malo ku ngosyo syosope sya ku Isalaeli, ni taciwujila ni kutamilicika apano, mcilambo cawo kungopoko lyuŵa kwa Yolodani, ciŵapelece Mose jwakutumicila jwa AMBUJE kwa jemanja.”
16Jemanjajo ŵamjanjile Yoswa kuti, “Uwe tucitenda yosope yene yatusalile soni tucijawula kulikose kutacitutuma. 17Uwe tucapikanila wawojo, mpela mutwampikanilaga Mose, nipo AMBUJE Mlungu jwawo aŵe ni wawojo mpela muŵaŵelele ni Mose! 18Jwalijose jutaciwusya ya ulamusi wawo kapena kunyosya line mwa lilamusi lyawo taciwulajidwa. Aŵe ŵamacili ni ŵakulimba mtima!”
Currently Selected:
Yos 1: YAWO
Highlight
Copy
Compare
Share
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
