Okushuuruurirwa 20

Sitaane okubohwa, n'abarikwera okwema na Yesu emyaka rukumi

1 # 2 Pet 2:4. Bwanyima naareeba maraika ondiijo naashuuma, naaruga omu iguru aine omu ngaro ekishumuruzo ky'ekiina ekitaine bugarukiro n'orujegyere ruhango. 2#Kut 3:1; Kush 12:9. Yaakwata ekyo kijoka ekya ira niwe Muregi kandi Sitaane, yaamuboha okumara emyaka rukumi, 3#2 Tes 2:9, 10. yaamunaga omu kiina ekitaine bugarukiro, yaakinga, yaataho akamanyiso, ngu arekye kurugamu kubeihabeiha amahanga obundi, okuhitsya ahi emyaka rukumi erihwera. Bwanyima y'egyo myaka ashemereire kubohororwa okumara omwanya mukye.

4 # Dan 7:27; 1 Kor 6:2. Kandi naareeba ebitebe by'obukama; abaabaire babishutamiho baaheebwa obushoboorozi bw'okucwa emanja. Kandi naareeba emyoyo y'abo abaatemirweho emitwe nibaturwa okuba abajurizi ba yesu n'ekigambo kya Ruhanga, kandi abatararamize nyamaishwa n'ekishushani kyayo, n'obu kwakuba okwikiriza kuteebwa akamanyiso kaayo aha buso bwabo nari aha mikono yaabo. Baagaruka baaba abahuriire, baayema na kristo okumara emyaka rukumi. 5#1 Tes 4:16. Kwonka abafu abandi abaatsigaireho bo tibaragarukire kuba abahuriire, okuhitsya ahi emyaka rukumi yaahwereire. Oku nikwo kuzooka kw'okubanza. 6#Isa 61:6. Omuntu owaatungire omugabo omu kuzooka okwo okw'okubanza aine omugisha kandi n'orikwera. Abari nk'ogwo okufa kwa kabiri tikubaineho bushoboorozi; kureka baryaba abanyamurwa ba Ruhanga na Kristo, bategyekye nawe okumara emyaka rukumi.

7Egyo myaka rukumi ku erihwa, Sitaane aryakomororwa arugye omu kihome, 8#Ezk 38:16. aryashohora aze kubeihabeiha amahanga agari aha mbaju ina ez'ensi, Googi na Magoogi, okubateerana hamwe kurwana. Obwingi bwabo buryaba nk'omusheenyi ogw'aha rubaju rw'enyanja. 9#2 Bag 1:10. Baahurura nibareetwa embaju zoona ez'ensi, baayehinguririza orusiisira rw'abarikwera n'orurembo orurikukundwa; kwonka omuriro gwaruga omu iguru, gwabamaraho; 10#Kush 19:20. na Sitaane, owaababeihabeihire, yaanagwa omu nyanja y'omuriro n'obuganga bw'ekibiriiti, ahu enyamaishwa na nabi ow'ebishuba baabaire bari. Baryabonabonesibwa nyomushana na nyekiro ebiro n'ebiro.

11 # Mat 25:31-46. Bwanyima naareeba ekitebe ky'obukama kihango ekirikwera n'Ogwo owaabaire akishutamiho; ensi n'eiguru byahunga nibiruga omu maisho ge; byabura obuhamizo. 12#Fil 4:3. Naareeba abafu, abakuru n'abato, beemereire omu maisho g'ekitebe ky'obukama, ebitabo byashuuruurwa. N'ekitabo ekindi kyashuuruurwa, nikyo eky'amagara. Abafu baacwerwa emanja z'ebyahandiikirwe omu bitabo nk'ebi baakozire oku biri. 13#Yoh 5:28, 29. Enyanja yaagarura abafu abaabaire bagirimu, na Rufu n'Okuzimu byagarura abafu abaabaire bariyo; boona baacwerwa emanja ez'ebi baakozire. 14#1 Kor 15:26, 55. Rufu n'Okuzimu byanagwa omu nyanja y'omuriro. Egyo nyanja y'omuriro nikwo kufa okwa kabiri. 15#Mat 25:41. Kandi omuntu weena, ou eiziina rye ryabaire ritahandiikirwe omu kitabo ky'amagara, yaanagwa omu nyanja y'omuriro.

Currently Selected:

Okushuuruurirwa 20: RR64

Highlight

Copy

Compare