Abafilipi 1

1Nyowe Paulo na Timoseo, abahuuku ba Kristo Yesu, twabahandiikira, imwe abarikwera boona omuri Kristo Yesu, abatwire Filipi hamwe n'abareeberezi n'abadiikoni; 2nitubendeza ahari Ruhanga Tataitwe na Mukama waitu Yesu Kristo.

Paulo okworeka okukunda kwe aharibo

3 # 1 Kor 1:4. Nsiima Ruhanga wangye ahu mbaijukira hoona, 4kandi omu kushaba kwangye kwona okw'obutoosha mbashabira mwena n'okushemererwa, 5ahabw'okuba mukakwatanisa naanye omu kubuzya engiri okwiha ahu mwatandikiire n'okuhitsya hati. 6#Fil 2:13; 1 Kor 1:6-8. Kandi hoona nimpamiza kimwe ngu: Ogwo owaatandikire omurimo murungi omuriimwe aryaguhikiiriza aha kiro kya Yesu Kristo. 7Kandi kinshemereire kubateekateekaho ntyo mwena, ahakuba muntuura aha mutima, kandi mwena mukwataniise naanye omu mbabazi za Ruhanga, omu kubohwa kandi n'omu kurwanirira engiri kwangye n'okugihamya. 8#Rom 1:9. Ruhanga niwe kareebi wangye, naamanya ku mbainiire orushusho mwena omu mbabazi za Kristo Yesu. 9Kandi eki ndikubashabira n'eki, ngu okukunda kwanyu kugume kweyongyere kikanya omu kumanya n'okwetegyereza kwona, 10#1 Tes 5:23. mubone kusiima ebirikukira oburungi, mushangwe mutaine buryarya nari akamogo aha kiro kya Kristo, 11#Efe 1:12, 14; Yoh 15:8. mwijwire ebyana by'okuhikiirira ebi Yesu Kristo arikwanira omuriimwe, mubone kuhaisa Ruhanga ekitiinisa n'okumuhimbisa.

Okubohwa kwa Paulo okuhimbisisa Yesu

12Niinyenda kubamanyisa, B'eishe-emwe, ngu ebyambaireho bikaija kwongyera kubuzya engiri, 13#Fil 4:22. ahabw'okuba kikamanywa abaserukare boona abarikurinda Kaisari n'abandi boona, ku naabohirwe ahabwa Kristo; 14kandi ab'eishe-emwe abarikukira obwingi kyabareetera kuhama omuri Mukama ahabw'okubohwa kwangye, baayeyongyera kugira obumanzi bw'okugamba ekigambo kya Ruhanga bataine bwoba. 15N'ekya buzima abamwe nibagamba Kristo ahabw'eihari n'empaka, kwonka abandi nibamugamba n'omutima murungi; 16abo babuurira Kristo ahabw'okukunda, nibamanya ngu ndi aha ahabw'okurwana aha ngiri: 17kwonka abandi tibarikumugamba mu mazima, kureka okurwanira orubaju rwabo, nibagira ngu nibaija kuunyongyera obusaasi omu kubohwa kwangye. 18Mbwenu ninfa ki? Kizima omu buryo bwona, yaaba mu buryarya, yaaba omu mazima, Kristo naagambwa; ekyo nikyo ndikushemerererwa, kandi ndyakishemerererwa.

Okubaho kwaitu ni Kristo

19Ahakuba nimmanya ngu, ahabw'okushaba kwanyu n'okuhwerwa Omwoyo wa Yesu Kristo ekyo kiryandugiramu okujunwa, 20#1 Pet 4:16. nk'oku ntegyereize kimwe n'amatsiko, ngu tihariho kyona ekirnkwatsa enshoni, kureka nk'oku kyabaire kiri kare, hoona na hati mbwenu Kristo aryaguma ahimbisibwe n'obumanzi bwingi omu mubiri gwangye, yaaba ndiho nari nfiire; 21ahakuba ahariinye okugumaho ni Kristo, n'okufa n'enshaagi; 22kwonka ebyangye yaaba kugumaho omu mubiri, nikyo kirikanyisa ebyana omu murimo gwangye. Nyowe tindikumanya ki nshemereire kutooranaho. 23#2 Kor 5:8. Ndi embaju zombi; nkaayenzire kugyenda kuguma na Kristo, ahabw'okuba ekyo nikyo kirikukirira kimwe oburungi. 24Kwonka shi ahabwanyu okugumaho omu mubiri nikyo kirikwetengwa. 25Ahabw'okwetegyereza ekyo, nimmanya ngu niinyija kugumaho, ntuure naimwe mwena, mubone kweyongyera omumaisho omu kwikiriza kandi n'okukushemerererwamu, 26okwehimbisa kwanyu kubone kukanya omuri Kristo Yesu ahabwangye, ku ndiba naagarukire owaanyu. 27#1 Tes 2:12. Kwonka emitwarize yaanyu ebe eshemereire engiri ya Kristo; ku ndiba naizire nari ntaizire kubareeba, mpurire ebyanyu ngu muhamire mwine omwoyo gumwe, nimurwana aha kwikiriza kw'engiri n'omutima gumwe, 28kandi mutarikutiinisibwa bazigu omu kigambo kyona; ekyo n'akamanyiso k'okuhwerekyerera aharibo akarikumanywa, kwonka ahariimwe n'ak'okujunwa kwanyu akarikuruga ahari Ruhanga. 29Ahakuba timurahairwe kwikiriza Kristo kwonka, kureka n'okubonabonesibwa ahabwe, 30#Byak 16:22. nimurwana orugamba, nk'oku mwandeebire, kandi oru murikumpuriraho na hati.

Currently Selected:

Abafilipi 1: RR64

Highlight

Copy

Compare