Okubara 22
22
Balaki okushaba Balamu okumukyeenera Abaisraeli
1Abaisraeli baimutsya orugyendo, baateera orusiisira omu mpita za Moabu seeri ya Yorudani ahashungaine na Yeriko. 2#Bar 11:25. Balaki mwene Zipori yaareeba byona ebi Abaisraeli baakozire Abaamori; 3#Kur 23:27. Abamoabu baatiina munonga Abaisraeli; ahakuba bakaba bari baingi munonga; emitima yaabahwa omunda ahabw'abo. 4#Kub 31:8. Abamoabu baagambira abakuru ba Midiani bati: Egi nyanja y'abantu neija kumaraho ebitwehinguririize byona, nk'oku ente emara obunyaatsi omu iriisizo. Kandi omu biro ebyo Balaki mwene Zipori niwe yaabaire ari omugabe wa Moabu. 5#Bir 23:4; Yos 13:22. Yaatuma entumwa ahari Balamu mwene Beori, owaabaire atwire Pesori aha mugyera Furaati omu nsi y'abantu b'eihanga rye, kumweta, naagira ati: Hariho abantu barugire Misri; reeba, bashwekire ensi, batwire aharikureebana naitwe. 6#Kut 27:29. Mbwenu ninkweshengyereza, ija onkyeenere aba bantu; ahabw'okuba nibankiza amaani; obundi nkaabaasa kubasingura, mbabingira kimwe omu nsi; ahakuba nimmanya ngu ou oshabira omugisha aguheebwa, kandi ou okyeena akyeenwa.
7 #
Kur 23:8; Mik 3:11. Abakuru ba Moabu n'Abamidiani baagyenda n'emikimbo omu ngaro; baahika ahari Balamu, baamugambira ebi Balaki abatumire. 8Yaabagira ati: Muraare aha eki kiro; niinyija kubagambira nk'oku MUKAMA arangambire. Abanyiginya ba Moabu baaraara owa Balamu. 9Ruhanga yaija ahari Balamu, yaamubuuza ati: Abo bashaija abari hamwe naiwe nibaahi? 10Balamu yaagarukamu Ruhanga ati: Balaki mwene Zipori omugabe wa Moabu antumireho ati: 11Reeba, hariho abantu barugire Misri, baashweka ensi; mbwenu ija obankyeenere; obundi nkaabaasa kubarwanisa, mbabinga. 12#Kub 23:20; Zab 144:15. Ruhanga yaagira Balamu ati: Otagyenda nabo, otarikyeena abo bantu, ahakuba bahairwe omugisha. 13Balamu yaimuka omu kasheeshe, yaagambira abanyiginya ba Balaki ati: Mwirooko mugarukye owaanyu, ahabw'okuba MUKAMA taanyikiriize kugyenda naimwe. 14Abanyiginya ba Moabu baimuka, baagaruka ahari Balaki, baamugira bati: Balamu ayangire kwija naitwe.
15Balaki yaagaruka yaatuma abandi banyiginya abarikukira bari obwingi n'ekitiinisa. 16Baija ahari Balamu, baamugira bati: Balaki mwene Zipori atutumire naagira ngu, hatagira ekyakuzibira kwija; 17#Bir 16:19; Mat 4:8, 9. ahakuba naija kukukuza, akuhindure omuntu w'ekitiinisa kingi; kandi ngu, eki orimugambira kyona, aryakikora; n'ahabw'ekyo ngu oije omukyeenere abo bantu. 18#1 Bag 22:14. Balamu yaagarukamu abagaragwa ba Balaki ati: N'obu Balaki yaakumpa enju ye eijwire efeeza n'ezaabu, tinkaabaasa kuhingura aha kigambo kya MUKAMA Ruhanga wangye, kukicwaho nari okukyongyeraho. 19Mbwenu nimbeeshengyereza, naimwe muraare aha eki kiro, ndeebe eki MUKAMA araagarukye kungambira. 20Ruhanga yaija ahari Balamu ekyo kiro, yaamugira ati: Aba bashaija ku baraabe baizire kukweta, imuka ogyende nabo; kwonka eki ndaakuragiire, obe nikyo waakora.
Ruhanga okuhanisa Balamu endogoya
21 #
1 Tim 6:9, 10; 2 Pet 2:15. Balamu yaimuka omu kasheeshe, yaatandiika endogoya ye, yaagyenda n'abanyiginya ba Moabu. 22#Kur 23:20. Kwonka Ruhanga yaamugirira ekiniga ahabw'okugyenda; maraika wa MUKAMA yaayemerera omu muhanda kumutanga; obwo Balamu akaba atembire endogoya ye, kandi aine abaheereza be bombi. 23Endogoya yaareeba maraika wa MUKAMA ayemereire omu muhanda, aine rurara omu ngaro; endogoya yaaruga omu muhanda, yaakiikama yaaza omu kishaka; Balamu yaagiteera kugigarura omu muhanda. 24Bwanyima maraika wa MUKAMA yaayemerera omu kahanda kafunzire, akarikuraba ahagati y'emisiri y'emizaabibu, orugo rumuri oku n'oku. 25Egyo ndogoya ku yaareebire maraika wa MUKAMA, yaayemigisiriza aha rugo, yaarumigiraho ekigyere kya Balamu; Balamu yaagaruka yaagiteera. 26#Hos 2:6. Maraika wa MUKAMA yaagaruka enyima, yaayemerera ahafunzire munonga, ahataine buhindukiro aha rubaju rwa buryo nari orwa bumosho. 27Endogoya ku yaareebire maraika wa MUKAMA, yaabyama omu maguru ga Balamu; Balamu yaagira ekiniga kingi, yaagiteera enkoni. 28#Mat 19:26; 2 Pet 2:16. MUKAMA yaayashamya akanwa k'egyo ndogoya, yaabuuza Balamu eti: Wantura ki okunteera egi mirundi yonshatu? 29#Enf 12:10. Balamu yaagigarukamu ati: Naakutura okungaya. Kuri naaba nyine rurara mu ngaro, naaba ninkwita. 30#1 Kor 1:27. Endogoya yaabuuza Balamu eti: Tiinye endogoya yaawe, ei otuura nootemba obutoosha n'okuhitsya eri izooba? Hariho obu ndakugizire nti? Onu ati: Ngaaha!
31 #
2 Bag 6:17; 1 Bus 21:16. Bwanyima MUKAMA yaahwezesa amaisho ga Balamu, yaareeba maraika wa MUKAMA ayemereire omu muhanda, aine rurara omu ngaro; yainama, yaajuumara. 32#Byak 13:10; 2 Pet 2:14, 15. Maraika wa MUKAMA yaamubuuza ati: Waateerera ki endogoya yaawe egi mirundi yonshatu? Reeba, naija kukutanga omu maisho, ahabw'okuba orugyendo oru orimu n'orw'obugomi omu maisho gangye; 33endogoya yaawe ku yandeeba, yampigiza egyo mirundi eshatu; kuri etampigiza, buzimazima hati kuri naakwitsire, yo ngireka ehuriire. 34#1 Sam 26:21. Balamu yaagarukamu maraika wa MUKAMA ati: Naacumura, ahakuba naaba ntamanyire ku onyemereire omu maisho kuntanga; mbwenu ku kiraabe nikikugwisa kubi, naaza kugarukayo. 35Maraika wa MUKAMA yaagira Balamu ati: Irooko ogyende n'abo bashaija; kwonka ekigambo eki ndaakugambire, obe nikyo waagamba. Atyo Balamu yaagumizamu, yaagyenda n'abanyiginya ba Balaki. 36Balaki ku yaahuriire ngu Balamu yaija, yaaza kumubugana omu rurembo rwa Moabu, orwabaire ruri aha mwatano gwa Arunooni, ahu ogwo mwatano gurikugarukira. 37Balaki yaagira Balamu ati: Tindakutumireho kukweta? N'enki ekyakuzibiire kwija? Torikumanya ku ndikubaasa kukukuza nkakuhindura omuntu w'ekitiinisa? 38#2 Bus 18:13. Balamu yaagarukamu Balaki ati: Reeba, mbwenu naija; noogira ngu nyine obushoboorozi bwona kugira eki naagamba ahabwangye? Ekigambo eki Ruhanga araate omu kanwa kangye, nikyo ndaagambe. 39Balamu yaagyenda na Balaki, baahika Kiryasi-huzoosi. 40Balaki yaatamba ebitambo by'ente n'entaama, yaatwekyeraho Balamu n'abanyiginya abaizire nawe.
41 #
Bir 12:2. Ku bwaseesire, Balaki yaatwara Balamu yaamwinamura omu kibungo ekirikwetwa Bamosi-baali; yaareebera okwo orubaju rumwe orw'Abaisraeli orwabaire rumuri haihi.
Currently Selected:
Okubara 22: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
