Abaleevi 25

Omwaka gwa mushanju ogw'okuraaza emisiri

1MUKAMA yaagambirira Musa aha rushozi Sinai ati: 2#Lev 26:34, 35; 2 Bus 36:21. Gambira Abaisraeli ebi ndikugamba ningira nti: Ku murihika omu nsi ei ndikubaha, egyo nsi eryaguma egire sabato ahabwa MUKAMA. 3Oryamara emyaka mukaaga noohinga emisiri yaawe, noosharira emizaabibu yaawe, nooshaaruura emyaka yaabyo. 4Kwonka omwaka gwa mushanju guryaba sabato y'okuraariza kimwe emisiri; ni sabato ahabwa MUKAMA; otarihinga emisiri yaawe, n'obu kwakuba okusharira emizaabibu yaawe. 5#Isa 37:30. Ebyemerize otaribigyesha, kandi ebijuma by'emizaabibu yaawe etashariire otaribicwa; omwaka ogwo guryaba ogw'okuhuumura kw'ensi okurikwera. 6Sabato egyo ey'ensi niyo eriba eby'okurya byanyu, iwe n'omuhuuku waawe n'omuzaana waawe n'omupakasi waawe n'omunyaihanga owaakushuhuukiireho, 7n'amatungo gaawe n'enyamaishwa ez'omu nsi yaawe, byona ebi ensi eryeza nibyo biriba eby'okurya.

Omwaka gwa Jubili

8Kandi oryayebarira sabato mushanju z'emyaka, niyo myaka mushanju emirundi mushanju; n'ahabw'ekyo obunaku bwa sabato ezo mushanju z'emyaka buryababeera emyaka makumi ana na mwenda. 9Reero aha kiro kya ikumi ky'okwezi kwa mushanju oryatwara enzamba erikugamba munonga; ahari eryo izooba ry'okurihiirira niryo oriteereraho enzamba omu nsi yaawe yoona. 10#Yer 34:8, 17; Gal 5:1. Mweze omwaka gwa makumi ataano, murangye omu nsi yoona abagitwiremu boona, ku baine obusingye; guryababeera jubili; omuntu weena omuriimwe agarukye omu butaka bwe n'omu baabo. 11Ogwo mwaka gwa makumi ataano guryababeera jubili; mutariguhingiramu, mutarigushaaruuriramu ebyemerize, n'obu kwakuba okugucweramu ebijuma by'emizaabibu etashariire; 12ahabw'okuba ni jubili; guryababeera ogurikwera; muryaguma nimurya ebyezire omu ishwa omuri ogwo mwaka.

13Omuri ogwo mwaka gwa jubili omuntu weena omuriimwe aryagaruka omu butaka bwe. 14#1 Sam 12:3; 1 Kor 6:8. Kandi ku origira eki waaguza mutaahi waawe, nari eki waamuguraho, mutariinyagana. 15Nk'emyaka erikurata jubili oku eriba eri, obe nikwo waagura ahari mutaahi waawe, kandi nawe akuguze nk'emyaka y'ebihingirwe oku eriba eri. 16Emyaka ku eriba mingi, oyongyere obuguzi; kandi emyaka ku eriba mikye, otuubye aha buguzi; ahabw'okuba omu kukuguza aryakurata obwingi bw'emyaka ei orishaaruura. 17#Enf 14:31; 22:22; 1 Tes 4:6. Mutariinyagana, kureka mutiine Ruhanga waanyu; ahakuba niinye MUKAMA Ruhanga waanyu.

18 # Zab 4:8; Yer 23:6. N'ahabw'ekyo muhurire ebiragiro byangye, mworobere emigyenzo ei naataireho, mugikore; obwo nibwo murituura omu nsi buhooro. 19Ensi eryayeza emyaka yaayo, naimwe murye, muhaagye, mugituuremu buhooro. 20#Mat 6:25. Kandi ku murigira muti: Beitu shi turyatungwa ki omu mwaka gwa mushanju? Ku turiba tutahingire kandi tutashaarwire! 21#Kur 16:29; Bir 28:8. mumanye ku ndiragiira omugisha gukabaijaho omu mwaka gwa mukaaga, ogwo mwak gukeera eby'okurya by'emyaka eshatu. 22Omu mwaka gwa munaana muryahinga; kwonka muryaguma nimurya ahari ebyo ebi muhunikire ira, okuhitsya omu mwaka gwa mwenda, obu ebi mwabibire biryera.

23Eitaka ritaritundirwa kimwe; ahakuba niinye mukama waaryo; naimwe muri abanyaihanga abanshuhuukiireho. 24Kandi ensi yoona eriba yaabaire obutaka bwanyu, muryaguma mwikirize eitaka ricungurwe. 25#Rus 2:20; 3:2. Mwene waanyu ku ariba omworo, yaatunda aha butaka bwe, owaabo omuri haihi omu buzaare aryaija acungure eki mwene waabo atunzire. 26Omuntu ku aribura ow'okubucungura, bwanyima yaatunga, yaagira eby'okubucungura, 27abare emyaka ehingwire okwiha obu yaabutunda, agarurire owaabuguzire eby'emyaka eriba etsigaireyo, abone kugaruka omu butaka bwe. 28Kwonka ku ariba atarikubaasa kubwecungurira, obutaka obu yaatunzire buryagumanwa owaabuguzire okuhitsya aha mwaka gwa jubili; omu mwaka ogwo buryarekurwa, mukama waabwo abugarukyemu.

29Omuntu ku aritunda enju ye omu rurembo orwehinguririziibwe orugo rw'amabaare, aryaikirizibwa kugicungura omwaka gutakahweireho okuruga obu yaagitunda; aryamara omwaka gwona aine obushoboorozi bw'okugicungura. 30Kwonka ku eriba etacungwirwe omwaka ogwo gutakahweire, enju egyo eri omu rurembo orwehinguririziibwe orugo rw'amabaare eryahamibwa kubeera kimwe ey'ogwo owaagiguzire ebiro bye byona n'eby'abarimukurata; n'omu mwaka gwa jubili tericungurwa. 31Kwonka amaju g'omu birorero ebiteehinguririziibwe rugo rw'amabaare nigabarwa nk'emisiri y'omu ishwa; nigabaasa kucungurwa; kandi omu mwaka gwa jubili garyarekurwa. 32Kwonka omu ndembo z'Abaleevi amaju g'omu butaka bwabo nibaikirizibwa kugacungura omu bunaku bwona. 33Kandi Omuleevi ku ariba atacungwire nju ye, egyo nju eyaatunzirwe omu rurembo rw'obutaka bwabo, eryarekurwa omuri jubili; ahabw'okuba amaju g'omu ndembo z'Abaleevi n'agaabo g'obutaka obu baabagaine omu Baisraeli. 34Kwonka emisiri ehereraine n'endembo z'Abaleevi teritundwa, ahakuba n'obutaka bwabo bw'ebiro byona.

35 # Byak 11:29; 1 Yoh 3:17. Mwene waanyu otwire naiwe ku ariba omworo, atakibaasa kwetunga, iwe oryamutunga, agume naiwe nk'omunyaihanga kandi omushuhuuki. 36#Neh 5:7. Otarimushaba enshaagi nari ebirengyesereize; kureka otiine Ruhanga waawe, mwene waanyu abone kuguma atwire naiwe. 37Otarimuguza empiiha ahabw'enshaagi, n'obu kwakuba okumuha eby'okurya ngu akweshumbizeho. 38Niinye MUKAMA Ruhanga waanyu, owaabaihire omu nsi ya Misri kubaha ensi ya Kanaani, ngu mbe Ruhanga waanyu.

39 # 2 Bag 4:1; Yer 34:14. Kandi mwene waanyu otwire naiwe ku ariba omworo, yaayetunda kuba owaawe, otarimukoresa nk'omuhuuku, 40kureka agume naiwe nk'omupakasi kandi nk'omushuhuuki; akukorere okuhitsya omu mwaka gwa jubili. 41Obwo aryakurugaho, we n'abaana be, agarukye omuri beene waabo n'omu butaka bwa baishenkuru; 42#1 Kor 7:23. ahakuba n'abairu bangye abu naihire omu nsi ya Misri; bataritundwa nk'abahuuku. 43#Efe 6:9. Otarimutegyekyesa eikama, kureka otiine Ruhanga waawe. 44Kandi eby'abahuuku baawe n'abazaana baawe, abu oriba oine, noikirizibwa kubagura omu mahanga agabeehinguririize; 45kandi nimwikirizibwa kubagura omu baana b'abanyamahanga abaabashuhuukiiremu, n'abaijukuru baabo abu barizaarira omu nsi yaanyu; bo baryaba abaanyu. 46Kandi nimwikirizibwa kubaraga abaana baanyu abaribakurata, babe abaabo ebiro byona. Bo muryaguma mubagire abahuuku ebiro byona; kwonka beene waanyu Abaisraeli mutaribaikiriza omuntu kutegyekyesa mutaahi we amaani.

47Omunyaihanga nari omushuhuuki okushuhuukiireho ku ariba omutungi, na mwene waanyu otwire nawe yaaba omworo yaayetunda ahari ogwo munyaihanga nari omushuhuuki okushuhuukiireho, nari ahari omwe ow'omuri beene waabo, 48bwanyima y'okutundwa naabaasa kucungurwa; omwe ahari beene waabo naabaasa kumucungura, 49yaaba ishento nari omwana wa ishento, nari mwene waabo weena ow'obuzaare bwa haihi, naabaasa kumucungura; nari shi we wenka, yaatunga, nabaasa kwecungura. 50Aryabara emyaka n'owaamuguzire okwiha aha mwaka ogu yaamwetundiiremu okuhitsya aha mwaka gwa jubili; empiiha z'okumucungura ziingane n'egyo myaka; ebiro ebi ariba amazire naakorera mukama we biryabariirirwa, biihurwe nk'oku baihura omupakasi. 51Emyaka ku eriba ekitsigaire mingi okuhitsya ahari jubili, oku eriba eri, nikwo arigarurira mukama we empiiha z'okumucungura, naaziitsya ahari ezo ezi yaaguzirwe. 52Emyaka ku eriba etsigaire mikye, aryabara emyaka na mukama we; oku egyo myaka eriba eri, abe nikwo yaamugarurira empiiha z'okwecungura. 53Aryaguma nawe nk'omupakasi orikukorera ebihembo buri mwaka; atarimutwaza eikama, noomureeba. 54Ku ariba atacungwirwe omu buryo obwo, omu mwaka gwa jubili aryarekurwa n'abaana be; 55ahakuba ahariinye Abaisraeli n'abairu; n'abairu bangye abu naihire omu nsi ya Misri. Niinye MUKAMA Ruhanga waanyu.

Currently Selected:

Abaleevi 25: RR64

Highlight

Copy

Compare