Yoshua 23
23
Yoshua okwehanangiriza eihanga ryona
1Bwanyima y'ebiro bingi MUKAMA aherize kuha Abaisraeli okuhuumura engamba z'abazigu baabo boona abaabaire babeehinguririize, na Yoshua yaakuzire, yaahikire omu ngingo zaabukuru, 2#Bir 31:28. yaayeta Abaisraeli boona, n'abakuru baabo n'abategyeki n'abaramuzi n'abakuru b'engabo, yaabagira ati: Reeba hati nkuzire, mpikire omu ngingo zaabukuru; 3kandi mukareeba byona ebi MUKAMA Ruhanga waanyu yaakozire amahanga aga goona ahabwanyu; ahabw'okuba MUKAMA Ruhanga waanyu niwe yaabarwaniriire. 4Reeba, mperize kubabaganisiza amahanga aga agakitsigaireho kuba obuhunguzi bw'enganda zaanyu, hamwe n'amahanga goona agu naahwerekyereize okuruga Yorudani okuhika aha Nyanja empango aha rubaju rw'oburengyerwa-izooba. 5#Bir 11:23. MUKAMA Ruhanga waanyu niwe aribabinga omu maisho gaanyu, akabatuntumura, mukabona kukubuura ensi yaabo nk'oku MUKAMA Ruhanga waanyu yaabaraganiise. 6#Yos 1:7. N'ahabw'ekyo muhamire kimwe mubone kwerinda n'okukora byona ebihandiikirwe omu kitabo ky'ebiragiro bya Musa, murekye kuteishuka mukabirugamu kutoora orubaju-rwa-buryo nari orwa-bumosho, 7#Enf 4:14; Efe 5:11; Kur 23:13; Yer 5:7. mutariteerana n'amahanga aga agatsigaire omuriimwe; mutarigamba aha maziina ga baaruhanga baabo, nari okubarahira nari okubakorera, n'obu kwakuba okubaramya, 8#Bir 10:20. kureka muhamire ahari MUKAMA Ruhanga waanyu, nk'oku mwakozire n'okuhitsya hati. 9Nimumanya ku MUKAMA yaabingire amahanga makuru kandi ag'amaani omu maisho gaanyu; kwonka imwe tihaine muntu weena orabagiire omu kaso n'okuhitsya hati. 10#Bar 15:15. Omwe omuriimwe aryabinga rukumi; ahakuba MUKAMA Ruhanga waanyu niwe aribarwanirira, nk'oku yaabagambiire. 11N'ahabw'ekyo muteho omutima munonga kukunda MUKAMA Ruhanga waanyu. 12#Heb 10:38; 2 Pet 2:20. Ahakuba ku murigaruka enyima omu muringo gwona, mwateerana n'amahanga aga agatsigaire omuriimwe, mwashwererana nago, kandi mwataahirana nago, 13#Bar 2:3. mumanyire kimwe mutarikubanganisa ku MUKAMA Ruhanga waanyu atarigaruka kubinga amahanga ago omu maisho gaanyu, kureka baryababeera obusya n'omutego, babe eky'okubaasha omu mbaju, n'amahwa omu maisho gaanyu, okuhitsya obu murihwerekyererera omu nsi egi enungi ei MUKAMA Ruhanga waanyu yaabahaire, mukahwaho.
14 #
Mub 12:3-7; Luk 21:33. Kandi reeba, eri izooba naaza kugyenda, nk'oku ab'ensi boona bagyenda; kandi mwena nimumanya gye omu mitima yaanyu n'omu magara gaanyu, ku hatariho kintu na kimwe ekirabuzire aha birungi byona ebi MUKAMA Ruhanga waanyu yaabaraganiise; byona bikabahikaho, tihariho kintu na kimwe ekitarabaireho. 15#Bir 28:63; Bir 28:15, 16; Luk 21:22. Nk'oku mwatungire ebirungi byona ebi MUKAMA Ruhanga waanyu yaabagambiire, nikwo MUKAMA aribareetaho ebibi byona, okuhitsya obu aribahwerekyerereza omu nsi egi enungi ei MUKAMA Ruhanga waanyu yaabahaire, akabamaraho. 16Ku muricumura, mwaita endagaano ei MUKAMA Ruhanga waanyu yaabahaire, mwagyenda, mwaheereza baaruhanga abandi, mwabaramya, MUKAMA aryabagirira ekiniga kingi, muhwerekyererere juba omu nsi enungi ei MUKAMA Ruhanga waanyu yaabahaire, muhweho.
Currently Selected:
Yoshua 23: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
