Yoshua 22
22
Enganda ibiri n'ekicweka okugaruka owaazo seeri ya Yorudani
1Bwanyima Yoshua yaayeta Abareubeeni n'Abagaadi n'ekicweka ky'oruganda rwa Manaase, 2#Kub 32:20. yaabagira ati: Mukozire byona ebi Musa omugaragwa wa MUKAMA yaabaragiire; kandi omuri byona ebi naabaragiire, mukanyorobera. 3Ebiro ebi ebingi ebi mumazire, timukahemukaga ahari beene waanyu n'okuhitsya hati, kureka mworobeire ekiragiro eki MUKAMA Ruhanga waanyu yaabaragiire. 4#Kub 32:33; Bir 29:8. Mbwenu hati MUKAMA Ruhanga waanyu ahuumwize beene waanyu, nk'oku yaabaraganiise; n'ahabw'ekyo mugarukyeyo, muze omu maka gaanyu omu nsi y'obutaka bwanyu ei Musa omugaragwa wa MUKAMA yaabahaire seeri ya Yorudani. 5#Bir 11:22; Mat 22:36, 37; 1 Tim 1:5; Yoh 15:9, 10; 1 Yoh 5:3. Kwonka muteho omutima munonga kworobera ebiragiro byona ebi Musa omugaragwa wa MUKAMA yaabaragiire, okukunda MUKAMA Ruhanga waanyu, okugyendera omu mihanda ye yoona, okworobera ebiragiro bye, okumuhamiraho, n'okumuheereza n'omutima gwanyu gwona n'amagara gaanyu goona. 6#Kur 39:43. Atyo Yoshua yaabashabira omugisha, yaaboohereza, baagaruka omu maka gaabo.
7Ekicweka kimwe eky'oruganda rwa Manaase Musa akaba yaabahaire obuhunguzi omuri Bashani; kwonka ekindi kicweka kyarwo Yoshua niwe yaabahaire obuhunguzi omuri beene waabo seenu ya Yorudani oburengyerwa-izooba. Kandi Yoshua, ku yaaboohereize kugaruka omu maka gaabo, yaabashabira omugisha, 8#1 Sam 30:24. yaabagira ati: Mugarukye omu maka gaanyu, mutware ebintu bingi, namatungo maingi munonga, efeeza, ezaabu, emiringa, ebyoma, n'ebijwaro bingi munonga; mubagane na beene waanyu eminyago y'abazigu baanyu.
Enganda ibiri n'ekicweka okukora eitambiro ahari Yorudani; n'abandi okuzigwerwa kubi
9Abareubeeni n'Abagaadi n'ekicweka ky'oruganda rwa Manaase baagarukayo, baataana n'Abaisraeli okuruga Shiilo ey'omu nsi ya Kanaani, kuza omu nsi ya Gileadi ei baayekubuuriire, nk'ekigambo kya MUKAMA eki yaagambiire Musa oku kyabaire kiri. 10Ku baahikire omu kyanga ekiri haihi na Yorudani omu nsi ya Kanaani, Abareubeeni n'Abagaadi n'ekicweka ky'oruganda rwa Manaase baakora eitambiro haihi na Yorudani, eitambiro rihango munonga. 11#Lev 17:8. Abaisraeli baahurira abarikugira bati: Reeba Abareubeeni n'Abagaadi n'ekicweka ky'oruganda rwa Manaase bakozire eitambiro aha mwataho gw'ensi ya Kanaani, haihi na Yorudani, aha rubaju rw'Abaisraeli. 12#Bar 20:1. Abaisraeli ku baakihuriire, omutwe gwona gw'Abaisraeli gwayeteeranira Shiilo kuza kubarwanisa. 13#Bir 13:14; Bar 20:12; Kub 25:7. Abaisraeli baatuma Finehaasi mwene Eleazaari omunyamurwa aha Bareubeeni n'Abagaadi n'ekicweka ky'oruganda rwa Manaase omu nsi ya Gileadi. 14Baamutuma n'abakuru ikumi, buri ruganda rwa Israeli omukuru omwe ow'omuryango gwa baishenkurubo, buri omwe omuribo akaba ari omukuru w'omuryango gwa baishenkurubo omu nganda za Israeli. 15Baija omu nsi ya Gileadi, baashangayo Abareubeeni n'Abagaadi n'ekicweka ky'oruganda rwa Manaase, baagamba nabo nibagira bati: 16#Bir 13:12. Ab'eihanga ryona erya MUKAMA baatutuma ngu: Eki kicumuro ki mucumwire ahari Ruhanga wa Israeli mukikoreire ki, okureka kukuratira MUKAMA, mukeekorera eitambiro, mukamugomera? 17#Kub 25:3, 4; Bir 4:3. Nimugira ngu ekicumuro eki twacumuriire omuri Peori kikatubeera kikye? timurikumanya na hati ku tutakakyetuuraga, n'obu orufu rwateire eihanga rya MUKAMA? 18#Kub 16:22; 1 Bus 21:1, 14. Mbwenu ekyo kikaabareeteire okuteishuka, mukareka kukuratira MUKAMA eri izooba? Ekiraabirugyemu ahabw'okugomera MUKAMA eri izooba, nyencakare naija kugirira eihanga ryona ery'Abaisraeli ekiniga kingi. 19#Lev 17:8, 9; Yos 18:1. Ensi yaanyu ei mwakubwire ku eraabe esiisikaire, mwambukye mwije omu nsi ya MUKAMA, ei eihema rya MUKAMA riri, mutungye obutaka omuriitwe; kwonka mutagomera MUKAMA, kandi naitwe mutatugomera, mukeekorera erindi itambiro, eritari rya MUKAMA Ruhanga waitu. 20#Yos 7:1, 5. Timurikumanya Akani mwene Zeera ku yaacumwire akatwara aha byabiikiirwe MUKAMA, eihanga ryona erya Israeli rikahikwaho ekiniga kingi? Kandi ogwo mushaija taracwekyereire wenka ahabw'ekicumuro kye.
Okwetonganira kw'enganda ezo
21Abareubeeni n'Abagaadi n'ekicweka ky'oruganda rwa Manaase baagarukamu nibagambira abakuru b'enganda za Israeli bati: 22#Bir 10:17; Dan 2:47; 1 Bag 8:39; Zab 44:21; Heb 4:13. MUKAMA Ruhanga Nyamuhanga! MUKAMA Ruhanga Nyamuhanga niwe arikukimanya, kandi n'Abaisraeli baryakimanya. Ku turaabe twakikozire ahabw'obugomi nari ahabw'okucumura ahari MUKAMA, eri izooba tutakira! 23#Zab 7:3, 5. Ku turaabe twayekoreire eitambiro ngu tuteishukye, turekye kukuratira MUKAMA, nari ngu tutambireho ebitambo ebyokize, nari empongano z'eby'okurya, nari ez'okusiima ahabw'obusingye, MUKAMA wenka abe niwe yaabitutura; 24kureka tukikozire twine eki tukikoreire, ngu omu biro ebiriija abaana baanyu bataribuuza abaitu bati: Mwine kakwate ki na MUKAMA Ruhanga wa Israeli? 25Timurikumanya ngu MUKAMA akataho Yorudani kuba omwatano gwaitu naimwe, imwe Abareubeeni n'Abagaadi? Timwine mugabo ahari MUKAMA. N'ahabw'ekyo abaana baanyu baryazibira abaitu kutiina MUKAMA. 26Nikyo kyatureeteire kugira tuti: Ka twekorere eitambiro, eritari ry'okutambiraho ebitambo ebyokize nari ebindi bitambo; 27#Kut 31:48; Yos 24:27. kureka ribe eky'okuhamya ahagati yaitu naimwe, na baijukuru baitu abaritukurata, ku turi abantu abakora omurimo gwa MUKAMA nitutambira ebitambo ebyokize omu maisho ge n'ebindi bitambo n'empongano z'okusiima ahabw'obusingye, abaana baanyu nyentsya batarigira abaitu omu biro ebiriija bati: Timwine mugabo ahari MUKAMA. 28Nikyo twagiriire tuti: Ku baritugira batyo, nari baagira kwo baijukuru baitu omu biro ebiriija, itwe turyabagarukamu tuti: Reeba eitambiro eri tukozire, eririkushushana n'eitambiro eri baatatenkuriitwe baakozire, eritari ry'ebitambo ebyokize nari ebindi bitambo, kureka ery'okuhamya ahagati yaitu naimwe. 29#Bir 12:13, 14. Nikikabure itwe okugomera MUKAMA eri izooba, tukateishuka, tukareka kumukuratira, tukeekorera eitambiro ry'okwokyezaho ebitambo, nari ery'okuhongyeraho empongano z'eby'okurya, nari ebindi bitambo, ritari itambiro rya MUKAMA Ruhanga waitu eriri omu maisho g'eihema rye.
Ezo nganda okugarukana n'Abaisraeli
30Finehaasi omunyamurwa n'abakuru b'eihanga, nibo bakuru b'emiryango y'Abaisraeli abu yaabaire aine, ku baahuriire ebigambo by'Abareubeeni n'Abagaadi n'Abamanaase, baashemererwa munonga. 31#1 Kor 14:25. Kandi Finehaasi mwene Eleazaari omunyamurwa yaagambira Abareubeeni n'Abagaadi n'Abamanaase ati: Mbwenu eri izooba nibwo twamanya ku MUKAMA ari omuriitwe, ahakuba timurakozire kicumuro eki ahari MUKAMA; mbwenu mwakiza Abaisraeli okutaitwa mukono gwa MUKAMA. 32Bwanyima Finehaasi mwene Eleazaari omunyamurwa n'abakuru baaruga omu nsi ya Gileadi; ei baashangire Abareubeeni n'Abagaadi, baagaruka omu nsi ya Kanaani aha Baisraeli, baabagambira ebyabaireho. 33Ekyo kyashemeza Abaisraeli, baahimbisa Ruhanga, tibaagaruka kugamba by'okurwanisa Abareubeeni n'Abagaadi, n'okucwekyereza ensi ei batwiremu. 34#Yos 24:27. Kandi eryo itambiro Abareubeeni n'Abagaadi baaryeta Edi; amakuru gaakyo, ngu eky'okuhamya ahagati yaitu naimwe ku MUKAMA ari Ruhanga.
Currently Selected:
Yoshua 22: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
