Yohaana 14
14
Omuhanda, n'amazima, n'amagara
1Emitima yaanyu etarishoberwa; mwikirize Ruhanga, naanye muunyikirize. 2Omu nju ya Tata harimu emyanya mingi ey'okutuuramu; kuri kitari kityo, nkaabagambiire; hati ninza kubashemereza omwanya. 3#Yoh 17:24. Kandi ku ndaabe ninza kubashemereza omwanya, ndyagaruka aha, mbatware ei ndi; okwo ei ndi, naimwe mube niyo mwatuura. 4Kandi ei ndikuza, omuhanda nimugumanya. 5Tomasi yaamubuuza ati: Mukama wangye, ka tutarikumanya i orikuza, omuhanda nitugumanya tuta? 6#Heb 10:20; Yoh 11:25. Yesu yaamugambira ati: Niinye muhanda, n'amazima, n'amagara; tihariho oija ahari Isheboona, atarabire muriinye. 7Kuri mwammanyire, na Tata nawe mukaamumanyire. Okuruga hati nimumamanya, kandi mwamureeba. 8Filipo yaamugira ati: Mukama wangye, tworekye Isheboona; ekyo nikitumara. 9#Heb 1:3. Yesu yaamubuuza ati: Filipo, ahi nakatuurira naimwe, tokammanyaga? Ondeebire, biri areebire Isheboona; n'enki ekirikukushabisa oti, Otworekye Isheboona? 10Torikwikiriza ku ndi omuri Tata, kandi na Tata ku ari omuriinye? Ebigambo ebi mbagambira timbyetuma, kureka Tata ori omuriinye niwe akora emirimo ye. 11#Yoh 10:25, 38. Muunyikirize ku ndi omuri Tata, na Tata ku ari omuriinye; nari shi muunyikirize ahabw'emirimo yonka. 12Buzimazima nimbagambira nti: Orikuunyikiriza, emirimo ei nkora erikukira eyangye obuhango, ahabw'okuba nyowe ningyenda ahari Tata. 13#1 Yoh 5:14. Kandi kyona eki murishaba omu iziina ryangye, ndyakikora, Isheboona abone kuhimbisibwa omu Mwana. 14Ku murishaba ekintu kyona omu iziina ryangye, ndyakikora.
Yesu okuraganisa Omwoyo Orikwera
15 #
1 Yoh 5:3. Ku muraabe nimunkunda, nimwija kukwata ebiragiro byangye. 16#Yoh 15:26; 16:7. Naanye ndyashaba Tata, nawe aryabaha Omuhwezi ondiijo, agume naimwe obutwire bwona. 17#Yoh 7:39; Rom 8:26. Omuhwezi ogwo n'Omwoyo ow'amazima, ou ensi etarikubaasa kwakiira, ahakuba temureeba n'obu kwakuba okumumanya; kwonka imwe mumumanya; ahakuba aguma naimwe, kandi aryatuura omuriimwe. 18Tindibatsiga muri efuuzi; ndyaija ahi muri. 19#Yoh 16:16. Hatsigaire omwanya mukye, ensi okutandeeba bundi; kwonka imwe muryandeeba; ahabw'okuba ndi ohuriire, naimwe muryaba abahuriire. 20Aha kiro ekyo muryamanya ku ndi omuri Tata, naimwe ku muri omuriinye, naanye omuriimwe. 21Oine ebiragiro byangye akabyorobera niwe arikunkunda; kandi orikunkunda, aryakundwa Tata, naanye ndyamukunda, mmweyorekye. 22Yuda, otari Iskaryota, yaamubuuza ati: Mukama wangye, kibaire kita iwe okutweyoreka, oteeyorekye nsi? 23#2 Kor 6:16. Yesu yaamugarukamu ati: Omuntu ku arikunkunda, aryarinda ekigambo kyangye, na Tata aryamukunda; kandi turyaija ahariwe, tutuure nawe. 24Otarikunkunda, tarinda bigambo byangye; kandi ekigambo eki muhurira ti kyangye; n'ekya Tata owantumire.
Yesu okuraga abeegi be
25Ebigambo ebi naabibagambira nkibaine. 26#Mat 10:19. Kwonka Omuhwezi, Omwoyo Orikwera, ou Isheboona aryohereza omu iziina ryangye, niwe aribeegyesa byona, akabaijutsya byona ebi naabagambiire. 27#Fil 4:7. Nimbatsigira obusingye; obusingye bwangye nimbubaha; tindikubaha nk'oku ensi eha. Emitima yaanyu etarishoberwa, n'obu kwakuba okutiina. 28#Yoh 14:3, 18. Mwahurira ku naabagambira nti, Ningyenda, kandi ndyagaruka ahu muri. Kuri nimunkunda, mukaashemereirwe, ahabw'okuba ninza ahari Tata; kandi Tata nankira. 29Hati naakibagambira kitakabaireho, ngu ku kiriba kyahikire, mukiikirize. 30#Efe 2:2. Tinkigamba bingi naimwe, ahabw'okuba omutegyeki w'ensi egi naija, kwonka taanyineho bushoboorozi. 31Nyowe nkora nk'oku Tata yandagiire, ngu ensi emanye ku mmukunda. Mwimukye, turugye aha.
Currently Selected:
Yohaana 14: RR64
Highlight
Share
Copy
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964