Yeremia 34

Yeremia okuhanuura aha kukwatwa kw'omugabe

1 # Yer 1:15; 2 Bag 25:1, 2. Eki n'ekigambo ekyarugire ahari MUKAMA, kikaija ahari Yeremia, obu Nebukadeneeza n'eihe rye ryona n'abantu b'abagabe boona ab'endi z'omu butegyeki bwe n'ab'amahanga goona baarwanisa Yerusaalmu n'endembo zaayo zoona, nikigira kiti: 2#Yer 21:10. Oku nikwo MUKAMA, Ruhanga wa Israeli, arikugamba naagira ati: Irooko ogambe na Zedekia omugabe wa Yuda, omugire oti: Oku nikwo MUKAMA arikugamba naagira ati: Reeba, oru rurembo ninduhayo omu mikono y'omugabe wa Babulooni, kandi aryarwotsya n'omuriro; 3kandi naiwe torimukira, kureka buzimazima oryakwatwa, oheebweyo omu mikono ye; ogwo mugabe wa Babulooni muryagamba hamw enimureebana, bwanyima otwarwe Babulooni. 4#Yer 38:17, 20. Kwonka iwe Zedekia omugabe wa Yuda, hurira ekigambo kya MUKAMA! Oku nikwo MUKAMA arikukugambaho naagira ati: Yoriitwa rurara, kureka oryafa gye. 5#Yer 22:18; 1 Sam 31:12; 2 Bus 16:14. Kandi nk'oku baayoterire baashwenkuru abagabe abaakubandiize obubaane, nikwo naiwe barikwoterera obubaane, bakakucurira nibagira bati: Ai bambe, mukama wangye! Ahakuba niinye naagamba ekyo kigambo; nikwo MUKAMA arikugira.

6Atyo nabi Yeremia yaagambira Zedekia omugabe wa Yuda ebigambo ebyo byona bari Yerusaalemu, 7#Yer 4:5. obu eihe ry'omugabe wa Babulooni ryabaire nirirwanisa Yerusaalemu n'endembo za Yuda, Lakishi na Azeeka, ezaabaire zitsigaireho; ahabw'okuba ezo zombi nizo ndembo ezeehinguririziibwe engo z'amabaare ezaabaire zitsigaireho.

Zedekia okwita endagaano y'okurekura abahuuku omu Bayuda

8 # Kur 21:2. Ekigambo kya MUKAMA kikaija ahari Yeremia, omugabe Zedekia aharize kuragaana n'ab'omuri Yerusaalemu endagaano y'okubarangira eby'okurekura abahuuku, 9#Lev 25:39-46; Neh 5:8. ngu buri muntu weena arekure abahuuku be n'abazaana be b'Abaheburaayo, harekye kubaho omuntu weena owaagira mwene waabo Omuyudaaya omuhuuku. 10Boona baagyorobera; abanyiginya boona n'abantu boona abaaragaine egyo ndagaano erikugira ngu buri muntu arekure omuhuuku we n'omuzaana we, barekye kugaruka kuza omu buhuuku; boona baabyorobera, baabarekura. 11Kwonka bwanyima baahinduka, baagarura abo bahuuku n'abazaana abu baarekwire, baabagarura omu buhuuku. 12Ekigambo kya MUKAMA kyaija ahari Yeremia nikigira kiti: 13Oku nikwo MUKAMA, Ruhanga wa Israeli, arikugamba naagira ati: Nkaragaana na baashwenkuriimwe, obu naabaiha omu nsi ya Misri omu nju y'obuhuuku, ningira nti: 14#Bir 15:12. Ahari buri muheru gw'emyaka mukaaga, buri muntu omuriimwe aryarekura Omuheburaayo mugyenzi we ou yaaguziibwe, omazire emyaka mukaaga naamukorera; aryamurekura arugye omu buhuuku. Kwonka baashwenkuriimwe tibarampuriire n'obu kwakuba okuntega amatu. 15#2 Bag 23:3. Ebiro ebi mweteisize, mwakora ebi ndikusiima, mwaranga obusingye, buri muntu yaagambira mugyenzi we eby'okurekurwa, mwaraganira endagaano omu maisho gangye omu nju erikwetererwa eiziina ryangye. 16#Lev 18:21. Kwonka muhindukire, mwajumisa eiziina ryangye, buri muntu omuriimwe yaagarura abahuuku be n'abazaana be, abu mubaire murekwire, nk'oku babaire nibenda, mwabagarura omu buhuuku kuba abahuuku n'abazaana. 17#Yer 14:12; 15:4; Gal 6:7; Yak 2:13. Nikyo MUKAMA arikugirira ati: Timumpuriire, buri muntu kurangira mugyenzi we na mutaahi we eby'okurekurwa. Reeba, nyowe nimbarangira okurekurwa, nikwo kurekurirwa rurara, n'orufu n'enjara, mbahindura eky'okutiinisa aha mahanga goona ag'omu nsi; nikwo MUKAMA arikugira. 18#Kut 15:10. Kandi n'abo bashaija abaitsire endagaano yangye, bakanga kuhitsya egyo ndagaano ei baragaine omu maisho gangye, niinyija kubagira nk'enyana ei baacwiremu ebicweka bibiri, bakabiraba ahagati: 19abanyiginya ba Yuda, aba Yerusaalemu, abakonwa, abanyamurwa n'abantu boona ab'omuri egi nsi, abaarabire ahagati y'ebicweka by'egyo nyana, 20#Yer 7:33; 22:25. ndyabahayo omu mikono y'abazigu baabo n'ey'abarikwenda kubaita. Kandi emitumbi yaabo eryaba eby'okurya by'amahungu g'omu mwanya n'enyamaishwa z'omu ihamba. 21#Yer 37:5, 11. Kandi Zedekia omugabe wa Yuda n'abanyiginya be ndyabahayo omu mikono y'abazigu baabo n'ey'abarikwenda kubaita, n'omu mikono y'eihe ry'omugabe wa Babulooni, eryabarugireho rikagarukayo. 22#Yer 4:7; 9:11; 37:8; Isa 10:6. Reeba, niinyija kubaragiira, bagarukye ahari oru rurembo, barurwanise, barukwate, barwotsye n'omuriro. N'endembo za Yuda ndyazihindura amatongo, zibure ab'okuzituuramu; nikwo MUKAMA arikugira.

Currently Selected:

Yeremia 34: RR64

Highlight

Copy

Compare