Abaramuzi 11
11
Yefusa okutooranwa kuba omuramuzi
1 #
Bar 6:12. Yefusa Omugileadi akaba ari emanzi rugambwa, kwonka akaba ari omwana wa maraaya; Gileadi niwe yaamumuzaireho. 2Kandi muka Gileadi akaba amuzaariire abaana b'aboojo. Batabani b'omukazi we abo ku baakuzire, baabinga Yefusa, baamugira bati: Torigira buhunguzi mu ka ya tataitwe, ahabw'okuba ori omwana w'ondiijo mukazi. 3#Bar 9:4. Yefusa nikwo kuhunga beene ishe, akatuura omu nsi ya Toobu; abantu abaabaire bataine mugasho baaguma nibateeranira ahari Yefusa, nibahurura nawe.
4Ku haahingwireho ebiro, Abaamoni baateera Abaisraeli. 5Abaamoni ku baabateire, abakuru ba Gileadi baaza kuhuruza Yefusa omu nsi ya Toobu; 6baamugira bati: Ija obe omukuru w'eihe ryaitu, tubone kurwanisa Abaamoni. 7#Kut 26:27. Kwonka Yefusa yaabagarukamu ati: Tiimwe mwanyangire, mukambinga omu ka ya taata? Ahabw'enki mwaija kunsherura, obu muri omu busaasi? 8#Bar 10:18. Abakuru ba Gileadi baamugarukamu bati: Ekyatureetera kukugarukira, nitwenda ngu ogyende naitwe, turwanise Abaamoni, kandi obe omukuru w'abatwire omuri Gileadi boona. 9Yefusa yaabuuza abakuru ba Gileadi ati: Ku murangarure owaitu kurwanisa Abaamoni, MUKAMA yaabahayo omu mikono yangye, n'ekya buzima ndyaba omukuru waanyu? 10#1 Tes 2:5. Abakuru ba Gileadi baamugarukamu bati: MUKAMA niwe ariba mushinja ahagati yaitu; buzimazima turyakora nk'oku waagamba. 11#Bar 10:17; 1 Sam 10:17. Atyo Yefusa yaagyenda n'abakuru ba Gileadi, abantu baamuhindura omukuru waabo w'okubeebembera. Yefusa yaagambira ebigambo bye byona omu maisho ga MUKAMA omuri Mizipa.
Entumwa za Yefusa okubuuza Abaamoni ekirikwenda kubarwanisa nabo
12Yefusa yaatuma entumwa aha mugabe w'Abaamoni, naamubuuza ati: Nontura ki okwija kuteera ensi yangye? 13#Kub 21:24. Omugabe w'Abaamoni yaagarukamu entumwa za Yefusa ati: Ahakuba Abaisraeli ku baabaire nibaruga Misri, baanyaga ensi yangye okuruga Arunooni okuhika Yaboki na Yorudani; mbwenu gigarure n'obusingye. 14Yefusa yaagaruka yaatuma entumwa aha mugabe w'Abaamoni, 15#Bir 2:9, 19; 2 Bus 20:10. yaamugira ati: Oku nikwo Yefusa arikugira ati: Israeli taranyagire nsi ya Moabu n'obu yaakuba ey'Abaamoni; 16#Kub 13:26; 14:25; Bir 1:46. kureka Abaisraeli bakaruga Misri, baaraba omu ihamba okuhika aha Nyanja erikutukura; bwanyima baahika Kadeshi. 17#Kub 20:14. Okuruga aho Israeli yaatuma entumwa aha mugabe wa Edomu, naagira ati: Twakweshengyereza, reka turabe omu nsi yaawe; omugabe wa Edomu tiyaikiriza. Kandi yaatuma atyo aha mugabe wa Moabu; kwonka nawe tiyaikiriza. Israeli nikwo kuguma Kadeshi. 18Bwanyima baaraba omu ihamba, baayekiikuura ensi ya Edomu n'eya Moabu, baaraba aha rubaju rw'oburugwa-izooba rw'ensi ya Moabu, baateera amahema seeri ya Arunooni; kwonka tibaarenga mwatano gwa Moabu, ahakuba omwatano gwayo ni Arunooni. 19#Kub 21:21; Bir 2:26; 3:1-17. Bwanyima Israeli yaatuma entumwa ahari Sihooni omugabe w'Abaamori, omugabe wa Heshibooni, naamugira ati: Twakweshengyereza, reka turabe omu nsi yaawe, tuze owaitu. 20Kwonka Sihooni tiyaayesiga Baisraeli kurenga omwatano gwe, kureka yaateerana abantu be boona, yaateera orusiisira Yahazi, yaarwanisa Abaisraeli. 21#Kub 21:24; Bir 2:33, 34. MUKAMA Ruhanga wa Israeli yaahayo Sihooni n'abantu be boona omu mikono y'Abaisraeli, baabasingura. Batyo Abaisraeli baakubuura ensi yoona ey'Abaamori abaabaire batwiremu. 22Baakubuura ensi yoona ey'Abaamori okuruga Arunooni okuhika Yaboki, kandi okuruga aha ihamba n'okuhika Yorudani. 23Atyo MUKAMA Ruhanga w'Abaisraeli yaabinga Abaamori omu maisho g'abantu be Abaisraeli. Mbwenu niimwe mwakushemereire kugikubuura? 24#Kub 21:29; Yer 48:7; Bir 7:16; Zab 44:2, 3. Torikubuura ensi ei Kemoshi ruhanga waawe arikuha? Naitwe abantu boona abu MUKAMA Ruhanga waitu yaabingire omu maisho gaitu, nibo turaakubuure ensi yaabo. 25#Kub 22:2; Bir 23:3, 4. Oine eki orikukiza Balaki mwene Zipori omugabe wa Moabu? Akaba arahakaniiseho Abaisraeli, nari akaba arabarwaniiseho? 26Abaisraeli ka baamazire emyaka magana ashatu, batwire omuri Heshibooni n'omuri tauni zaayo, n'omuri Aroeri na tauni zaayo, n'omu ndembo zoona eziri aha mbaju za Arunooni! Ahabw'enki omuri egyo myaka yoona ezo ndembo timurazigarukaine? 27#Kut 18:25; Yob 9:15. N'ahabw'ekyo tiinye nkukozire kubi, kureka niiwe onkozire kubi kundwanisa. MUKAMA Omucwi w'emanja abe niwe yaaramura Abaisraeli n'Abaamoni eri izooba. 28Kwonka omugabe w'Abaamoni tiyaata mutima ha bigambo ebi Yefusa yaamutumireho.
Okuhiga kwa Yefusa n'okusingura Abaamoni
29Omwoyo wa MUKAMA yaija ahari Yefusa; Yefusa yaaraba omuri Gileadi na Manaase, yaahika Mizipa eya Gileadi; yaarugayo yaahika omu Baamoni. 30#Kut 28:20; 1 Sam 1:11. Yefusa yaahiga ahari MUKAMA naagira ati: Buzimazima ku oraaheyo Abaamoni omu mikono yangye, 31#Lev 27:2; 1 Sam 1:11. ku nditabaaruka gye ninduga kurwanisa Abaamoni, ekiribanza kushohora omu muryango gw'enju yangye kumbugana, kiryaba ekya MUKAMA, kandi ndyakihonga, kibe ekitambo ky'okwotsya. 32Atyo Yefusa yaayambuka aha Baamoni kubarwanisa; MUKAMA yaabahayo omu mikono ye. 33Yaabateera okuruga Aroeri okuhika Miniisi, yaabaitamu abantu baingi munonga, yaakwata endembo makumi abiri okuhika ahari Abeeli-keramimu. Okwo nikwo Abaamoni baasingwirwe Abaisraeli.
Yefusa okubugana muhara we n'okumuhayo
34 #
Kur 15:20; 1 Sam 18:6. Yefusa yaatabaaruka, yaagaruka omu ka ye Mizipa; reeba, muhara we yaashohora kumubugana, naateera ebitaasa naazina; niwe yaabaire ari omwana we nyamunegyere; akaba ataine mwanda ondiijo weena, yaaba w'omwojo nari w'omwishiki, okwihaho ogwo. 35#Kut 42:36-38; 2 Sam 18:33; Mub 5:2-5. Yefusa ku yaamureebire, yaataagura ebijwaro bye, yaagira ati: Ai bambe, mwana wangye! ka wangwisiza akagwe, okandeetera amaganya maingi; ahakuba nkaashamya akanwa kangye ahari MUKAMA; tinkibaasa kukireka. 36#Kub 30:2. Muhara we yaamugarukamu ati: Taata, ku oraabe waayashamize akanwa kaawe ahari MUKAMA, ongire nk'ekyarugire omu kanwa kaawe oku kiri, nk'oku MUKAMA akuhooreire Abaamoni abazigu baawe. 37Yaagaruka yaagira ishe ati: Ninkushaba onyikirize eki; ondekye ameezi abiri, nze omu bibungo, ngyendagyende na bagyenzi bangye, ncurire obuhangare bwangye. 38Yaamugira ati: Irooko. Yaamwohereza okumara ameezi abiri; yaagyenda na bagyenzi be, yaacurira obuhangare bwe omu bibungo. 39Ameezi abiri ku gaahweire, yaagaruka ahari ishe, yaamugira nk'oku yaaraganiise; kandi omwishiki ogwo akaba atakamanyaga mushaija. 40Gwahinduka omugyenzo omuri Israeli, abaishiki ba Israeli okuguma nibagyenda buri mwaka kumara ebiro bina nibacurira muhara wa Yefusa Omugileadi.
Currently Selected:
Abaramuzi 11: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
