Abaramuzi 10
10
Abandi baramuzi
1Bwanyima ya Abimeleki Toola mwene Pua, mwijukuru wa Dodo ow'omu ruganda rwa Isakaari yaimuka kujuna Israeli; akaba atuura Shamiri omu nsi y'ebibungo eya Efuraimu. 2Yaamara emyaka makumi abiri n'eshatu naacwera Abaisraeli emanja; bwanyima yaafa, yaaziikwa omuri Shamiri.
3Bwanyima ye haimuka Yairi Omugileadi, nawe yaamara emyaka makumi abiri ne'biri naacwera Abaisraeli emanja. 4#Bar 5:10; Bir 3:14. Akaba aine abatabani makumi ashatu, abaabaire bagyendera aha ndogoya nto makumi ashatu, kandi baine endembo makumi ashatu omu nsi ya Gileadi ezaabaaire nizeetwa Havosi-yairi n'okuhitsya hati. 5Yairi yaafa, yaaziikwa Kamoni.
Abaisraeli okwimuura Ruhanga n'okwitwa kubi Abaamoni
6 #
Bar 2:11, 13; 6:1; 2 Bus 28:23; 1 Bag 11:33. Abaisraeli baagaruka baakora ebirikwangwa MUKAMA, baaheereza Baabaali n'Ashitaroosi, na baaruhanga ba Siria, na Sidoni, na Moabu n'Abaamoni n'Abafilistia, baimuura MUKAMA, tibaamuheereza. 7MUKAMA yaagirira Israeli ekiniga kingi, yaabahayo omu mikono y'Abafilistia n'ey'Abaamoni. 8Omu mwaka ogwo baaburabuza Abaisraeli, baabaita kubi; baamara emyaka ikumi na munaana nibaita kubi Abaisraeli boona abaabaire batwire seeri ya Yorudani omu nsi y'Abaamori ey'omuri Gileadi. 9Kandi Abaamoni baayambuka Yorudani kurwanisa Abayuda n'Ababenyamiini n'ab'oruganda rwa Efuraimu; n'ahabw'ekyo Abaisraeli baatuntuzibwa munonga.
10 #
1 Sam 12:10. Abaisraeli baatakira MUKAMA, nibagira bati: Tukucumwireho, ahakuba tukaimuura Ruhanga waitu, twaheereza Baabaali. 11#Kur 14:30; 1 Sam 12:8. MUKAMA yaagarukamu Abaisraeli ati; Tindabajunire Abanyamisri n'Abaamori n'Abaamoni kandi n'Abafilistia? 12#Bar 6:3; Zab 106:42, 43. Kandi n'aba Sidoni n'Abaamaleki n'aba Maoni bakabaita kubi, mwantakira, naabaiha omu mikono yaabo. 13#1 Bus 28:9; Yer 2:13. Kwonka mwanyimuura, mwaheereza baaruhanga abandi; n'ahabw'ekyo tindigaruka kubajuna. 14#2 Bag 3:13. Mugyende mutakire baaruhanga abu mwayetooraniire; babe nibo baabajuna omu biro by'okutuntuzibwa kwanyu. 15#1 Bag 21:27. Abaisraeli baagarukamu MUKAMA bati: N'ekya buzima tukashiisha; mbwenu otukore kyona eki orikwenda; kwonka nitukweshengyereza otujune eri izooba. 16#2 Bus 7:14; Zab 106:44. Baiha baaruhanga b'abanyamahanga omuribo, baaheereza MUKAMA; omutima gwe gwashaasha munonga ahabw'obusaasi bw'Abaisraeli.
17Bwanyima Abaamoni baayeteerana, bateera orusiisira omuri Gileadi; n'Abaisraeli nabo baayeteerana, baateera orusiisira omuri Mizipa. 18Kandi abantu bakuru ba Gileadi, baagambirana bati: N'oha oraabanze kurwana n'Abaamoni? Ogwo niwe araabe mukuru w'abatwire omuri Gileadi boona.
Currently Selected:
Abaramuzi 10: RR64
Highlight
Copy
Compare
Share
Want to have your highlights saved across all your devices? Sign up or sign in
The Bible in Runyankore-Rukiga © United Bible Societies, 1964
