Yakobo 3

Akabi k'orurimi

1B'eishe-emwe, mutariikiriza baingi omuriimwe kuhinduka abeegyesa; ahakuba nimumanya ngu itwe abeegyesa turyacwerwa orubanja orurikukira ez'abandi. 2#Yak 1:26. Ahabw'okuba twena tushobya omuri bingi; omuntu weena otashobya mu kugamba, ogwo n'omuntu ohikire, naabaasa kutegyeka n'omubiri gwona. 3Nimumanya ngu, ku tuta ebyoma omu kanwa k'embaraasi, ngu zitworobere, tuhindura emibiri yaazo yoona. 4Kandi mureebe n'emeeri; n'obu ziraabe ziri mpango munonga, kandi nizitwarwa omuyaga gw'amaani, kwonka zihindurwa kabaho kakye munonga, kuza ei omuvugi arikwenda yoona. 5N'orurimi narwo nikwo ruri; n'akagingo kakye, akeehimbisa omu bintu bikuru. Mureebe ekibira n'obu kiraabe kiri kihango kita, kitwekwa akariro kakye! 6#Mat 15:11, 19; 12:36, 37. N'orurimi ruba omuriro. Orurimi n'ensi mbi etuura omu ngingo zaitu, rushiisha omubiri gwona, rwotsya obuzaarwa bw'obuntu bwaitu bwaona, kandi narwo rwokibwa Gehana. 7Nimumanya ngu emiringo yoona ey'enyamaishwa n'ebirikuguruka, ebirikwekurura n'eby'omu nyanja, nibibaasa kutegyekwa kandi bikaba bitegyekwa abantu; 8#Zab 140:3; 141:3. kwonka tihariho muntu orikubaasa kutegyeka orurimi; n'obubi obutatuuza, rwijwire obushegu oburikwita. 9Nirwo tuhimbisisa Mukama Isheboona, kandi nirwo tukyeenesa abantu, abahangirwe omu kishushani kya Ruhanga. 10Omu kanwa kamwe harugamu okuhimbisa n'okukyeena. B'eishe-emwe, ebyo tibishemerire kuba bityo. 11Enshuro neebaasa kurugwamu amaizi amarungi n'agarikushaarira? 12B'eishe-emwe, omutiini nigubaasa kwana emizeituuni, nari omuzaabibu kwana emitiini? Nikwo n'amaizi g'omwonyo gatabaasa kurugwamu amarungi.

13 # 1 Pet 2:12. Omuriimwe n'oha oine obwengye, orikwetegyereza? Ahabw'emitwarize ye mirungi ayorekye emirimo ye n'obwengye oburimi obucureezi. 14#Efe 4:31. Kwonka ku muraabe mwine eihari ry'obushaarizi n'okweyendeza omu mitima yaanyu, murekye kwehimbiwsa n'okubeiha, mukarwanisa amazima. 15Obwengye obwo ti bwengye oburikuruga omu iguru, kureka n'obw'ensi, n'obw'abantu-buntu, n'obwa baadaimoni. 16Ahakuba ahu eihari n'okweyendeza biri, niho haba okurabanamu n'okukora kubi kwona. 17Kwonka obwengye oburikuruga omu iguru, okubanza buba obushemeire, kandi obw'obusingye, obw'okutwaza gye, obwikiriza okuteisibwa, obwijwire embabazi n'ebyana ebirungi, obutarimu kugambira habiri n'obu bwakuba obugobya. 18#Isa 32:17; Mat 5:9. Abareeta obusingye babiba embibo omu busingye ezireeta ebyana by'okuhikiirira.

Currently Selected:

Yakobo 3: RR64

Highlight

Copy

Compare