Isaaya 66

Embabazi za Mukama aha booro n'abakyene abarikweteisa

1 # 1 Bag 8:27; Mat 5:34, 35; Byak 7:49-50; 17:24. Oku nikwo MUKAMA arikugamba naagira ati:

Eiguru nikyo kitebe kyangye ky'obukama,

N'ensi n'akatebe k'ebigyere byangye.

Ni nju ki ei muriinyombekyera,

Nari shi ni mwanya ki ogu ndihuumuriramu?

2 # Isa 57:15; 1 Bus 29:14; Zab 34:18. Ebyo byona omukono gwangye nigwo gwabihangire;

N'ahabw'ekyo byona n'ebyangye,

Nikwo MUKAMA arikugira.

Kwonka omuntu ou nditaho omutima

N'oine omutima omucureezi, kandi ogirikweteisa,

Kandi orikutetema ahabw'ekigambo kyangye.

3 # Yer 7:24, 31. Orikwita ente ni nk'orikwita omuntu;

Orikutamba omwana gw'entaama, ni nk'orikuhotora embwa ebitsya;

Orikuhonga empongano y'eby'okunywa ni nk'orikuhonga eshagama y'empunu;

Orikwotera obubaane, ni nk'orikushabira ekishushani ekirikuramibwa omugisha.

Buzima beetooraniire emihanda yaabo,

Emitima yaabo eshemerererwa ebirikunugwa byabo.

4Naanye ndyabatooranira okubonabonesibwa,

Nbareeteho ebi barikutiina;

Ahabw'okuba ku naayetsire, haabura owaayetaba;

Ku naagambire, tibaatega matu;

Kureka baakora ebi ntarashemerereirwe.

5 # Isa 5:19. Imwe abarikutetema ahabw'ekigambo kya MUKAMA,

Nimuhurire ekigambo kye.

Beene waanyu abarikubanga,

Bakabacwa nibabatura eiziina ryangye,

Bagizire bati: Ka MUKAMA ahimbisibwe,

Haza tureebe okwo kushemererwa kwanyu.

Kwonka nibo barikwatwa enshoni.

6 # Isa 59:18. Hurira orwari orurikwimuka omu rurembo,

Eiraka eririkuruga omuri hekalu,

Eiraka rya MUKAMA orikuzimuurira abazigu be!

7Ku yaabaire atakarumirwe, yaazaara;

Ku yaabaire atakagizire bisha,

Yaateeraho omwana w'omwojo.

8Orareebire ekinti nk'ekyo n'oha?

Nari shi, ebyo birareebirwe oha?

Ensi ekaabaasa kuzaarwa omu izooba rimwe?

Eihanga rikaabaasa kuruga omu nda omu kaanya kakye?

Ahakuba Saayuuni ku yaarumirwe ati,

Ahonaaho yaazaara abaana be b'aboojo.

9Ndyakuhitysa aha bunaku bw'okuzaara,

Ndemwe kukuzaaza? nikwo MUKAMA arikugira.

Nyowe oha okuzaara, niinye ndiigara enda?

Nikwo Ruhanga waawe arikugira.

10 # Isa 65:19. Imwe abarikukunda Yerusaalemu mwena,

Mushemererwe hamwe nayo, mwesiime ahabwayo;

Imwe abarikugicurira mwena,

Mwesiime hamwe nayo n'okushemererwa.

11Mwonkye amabeere g'okurembesereza kwayo, muhaagye,

Munywe munonga aha kitiinisa kyayo kingi mushemereirwe.

12 # Isa 48:18. Ahakuba oku nikwo MUKAMA arikugamba naagira ati:

Reeba ndyamuha obusingye oburi nk'omugyera,

Mmuhe n'obutungi bw'amahanga nk'omugyera ogushandaire;

Mwonkye, muheekwe omu rubaju,

Mugurukagurukibwe aha bibero.

13 # Isa 51:12. Nk'oku nyina w'omwana amurembesereza,

Nikwo ndibarembesereza,

Mukagwisizibwa gye omuri Yerusaalemu.

14 # Isa 58:11; Ezr 8:22, 31. Ku murikireeba, emitima yaanyu eryashemererwa,

Amagufa gaanyu gakure gye nk'obunyaatsi bw'omuroba;

Kandi kiryamanywa ku omukono gwa MUKAMA guri hamwe n'abaheereza be,

N'ekiniga kye ku kiri aha bazigu be.

15 # Isa 33:14; Zab 68:17; 97:3; 2 Tes 1:7-8. Ahabw'okuba, reeba, MUKAMA aryaija n'omuriro,

N'ebigaari bye biri nk'akasooroora,

Ngu okuguubwa kubi kwe akuhikiirize n'ekiniga kingi,

Kandi abahanise endimi z'omuriro.

16 # Yoel 3:2. Ahakuba MUKAMA aryacwera abantu boona orubanja,

Abareho ekifubiro ky'omuriro na rurara;

Kandi abariitwa MUKAMA baryaba baingi.

17Abarikweyeza, bakeeshemeza, ngu baze omu misiri bakurataine, barye empunu n'ebirikunugwa n'embeba, abo boona baryacwekyererera hamwe, nikwo MUKAMA arikugamba.

18 # Zek 14:16. Ahakuba nimmanya emirimo yaabo n'ebiteekateeko byabo; obunaku nibwija, obu nditeeranira ahamwe amahanga goona n'endimi zoona, bakaija, bakareeba ekitiinisa kyangye. 19#Rom 15:20, 21. Ndyata akamanyiso omuribo, abaahonokireho mbatume omu b'amahanga, Tarushiishi, Puuli, Luudi, ab'omu barasi, Tubali, Yavani omu birwa ebiri hare, ei batakahuriraga kurangaanwa kwangye, n'obu kwakuba okureeba ekitiinisa kyangye; baryo baryamanyisa amahanga ekitiinisa kyangye. 20#Isa 14:2; Rom 15:16. Kandi baryareeta beene waanyu boona, baheekirwe aha mbaraasi, omu bigaari, omu ngozi, aha nyumbu n'aha ngamira, nibabaiha omu mahanga goona kuba empongano y'okuhongyera MUKAMA, babahitsye Yerusaalemu aha rushozi rwangye orurikwera, babitwaze nk'oku Abaisraeli bashangwa bareeta omu nju ya MUKAMA empongano zaabo z'esaano, omu nyabya zishemeziibwe, nikwo MUKAMA arikugamba. 21#Kur 19:6. Kandi ndyaihamu bamwe omuribo, mbagira abanyamurwa n'Abaleevi, nikwo MUKAMA arikugamba.

22 # Zab 89:29. Nk'oku eiguru risya n'ensi nsya ebi ndihanga birigumaho omu maisho gangye, nikwo n'oruzaaro rwanyu n'eiziina ryanyu birigumaho, nikwo MUKAMA arigamba. 23#Zab 86:9; Zek 14:16. Obunaku buryahika, obu abantu boona bariguma nibaija omu maisho gangye kuramya, buri kuboneka kw'okwezi, n'ahari buri sabato, nikwo MUKAMA arikugamba. 24#Mak 9:48. Kandi baryahsohora baze kureeba emitumbi y'abangomeire; ahabw'okuba enyogori zaabo tizirifa, n'omuriro gwabo tiguriraazibwa, baryaba ekihagaro aha bantu boona.

Currently Selected:

Isaaya 66: RR64

Highlight

Copy

Compare