Abagalatia 4

Oku tuhindurwa abaana ba Ruhanga

1Kwonka ningira nti: Omuhunguzi, ku aba akiri omwana muto, taine ki akiza omuhuuku, n'obu araabe ari mukama wa byona; 2kureka ategyekwa abarezi n'ababiiki okuhitsya aha bunaku obwaragiirwe ishe. 3#Gal 5:1; Kol 2:20. Nikwo naitwe; obu twabaire tukiri abaana bato, tukaba tutegyekwa nk'abahuuku eby'okubandizaho eby'omu nsi egi. 4Kwonka obunaku ku bwahikiire kimwe, Ruhanga yaatuma Omwana we, owaazairwe omukazi omu butegyeki bw'Ebiragiro, 5#Gal 3:13. ngu acungure abaabaire nibategyekwa Ebiragiro, tuheebwe okuhindurwa abaana. 6#Rom 8:15. Kandi imwe, ahabw'okuhinduka abaana, Ruhanga akatuma Omwoyo w'Omwana we omu mitima yaitu, otugambisa ati: Abba, Taata! 7#Rom 8:16, 17. Mbwenu tokiri muhuuku, kureka ori omwana; kandi ku oraabe ori omwana, ori omuhunguzi ahabw'embabazi za Ruhanga.

Okugaruka enyima kw'Abagalatia

8Haza omu bunaku obwo, obu mwabaire mutarikumanya Ruhanga, mukaba muri abahuuku b'abo, abatari baaruhanga buzima omu buhangwa bwabo; 9kwonka hati nk'oku muherize kumanya Ruhanga, nari okukira We nk'oku abamanyire, mugarukire muta enyima omu migyenzo ei mwabandiizeho, etaine maani n'obu gwakuba omugasho, okwenda ngu egarukye ebategyekye? 10#Kol 2:16. Nimugyenza ebiro n'ameezi n'obunaku n'emyaka! 11Nintiina nti, shana byona ebi naabakoreire, nkahendekyera busha.

12Nimbeeshengyereza, B'eishe-emwe, mube nkaanye, ahakuba naanye mbaire nkaimwe. Timurankozire kubi; 13#1 Kor 2:3. nimumanya ngu endwara y'omu mubiri niyo yandeeteire kubabuurira engiri aha murundi ogw'okubanza; 14kandi endwara egyo, n'obu eraabe yaabaruhize, timurangayire, n'obu kwakuba okunnuga; kureka mukanyakiira nka maraika wa Ruhanga, nari nka Kristo Yesu. 15Mbwenu okwesiima kwanyu oku mwabaire mwine, hati kuri nkahi? Ahakuba nimpamya ngu, kuri kyabaire nikibaasika, mukaabaire mwihiremu amaisho gaanyu, mugampa. 16#Amo 5:10. Mbwenu mpindukire omuzigu waanyu ahabw'okubagambira amazima? 17Abo nibabeekundisa, kwonka ti habw'okubendeza ebirungi; kureka nibenda kubakingirana aheeru, ngu mube nibo mwahakwaho. 18Mumanye ngu obutoosha bwona ni kirungi okukundwa, kwonka mukundirwe ebirungi, t'obu ndi naimwe bwonka. 19#1 Kor 4:15. Baana bangye abato, abu ndikugaruka kusaasibwa nk'omukazi orikurumwa, okuhitsya obu Kristo arihangwa omuriimwe! 20Nkaayenzire kuguma naimwe, n'okworobya aha migambire yangye; ahakuba ebyanyu binshobeire.

Ebya Saara na Hagari okumanyisa eby'endagaano ibiri

21Imwe abarikwenda kutegyekwa Ebiragiro, nimungambire. Timuhurira Ebiragiro? 22#Kut 16:15; 21:2, 9. Nimumanya ku kyahandiikirwe ngu: Abrahamu akaba aine abatabani babiri, omwe akaba ari ow'omuzaana, ondiijo ari ow'omukazi nyeiteeka. 23#Rom 9:7-9. Kandi owmana ow'omuzaana akazaarwa ahabw'okwetenga kw'omubiri, ow'omuazi yaazaarwa ahabw'endagaano. 24Ebyo biri nk'enfumu, ahakuba abakazi abo nibamanyisa endagaano ibiri, emwe ekaruga aha rushozi Sinai, eyaazaire abaana ab'obuhuuku, niwe Hagari; 25mbwenu Hagari ogwo naashushanisibwa nk'orushozi Sinai orw'omuri Buharabu, orurikugyeranisibwa na Yerusaalemu ekiriho na hati; ahakuba ari omu buhuuku hamwe n'abaana be. 26Kwonka Yerusaalemu ey'omu iguru niwe mukazi nyeiteeka, kandi niwe maaweitwe. 27#Isa 54:1. Ahakuba kikahandiikwa ngu:

Shemererwa, iwe engumba etazaara!

Imutsya eiraka, oteere akaari, iwe otarumwa kuzaara;

Ahakuba abaana b'enyangwakazi nibakira ab'enkundwakazi.

28Mbwenu itwe, B'eishe-emwe, turi abaana b'endagaano nka Isaaka. 29#Kut 21:9-12. Kandi nk'owaazairwe ahabw'okwetenga kw'omubiri omu biro ebyo oku yaahiigire owaazairwe ahabw'Omwoyo, nikwo kiri na hati. 30Beitu Ebyahandiikirwe bigira bita? Biti: Binga omuzaana n'omwana we; ahakuba omwana w'omuzaana tarihungura n'ow'omukazi nyeiteeka. 31Mbwenu, B'eishe-emwe, tituri baana b'omuzaana, kureka ab'omukazi nyeiteeka.

Currently Selected:

Abagalatia 4: RR64

Highlight

Copy

Compare