Okuruga 34

MUKAMA okuha Musa ebindi bishate by'amabaare

1MUKAMA yaagambira Musa ati: Shatura ebishate bibiri by'amabaare nk'eby'okubanza; naanye niinyija kubihandiikaho ebigambo ebyabaire biri aha by'okubanza ebi waayatsire. 2Nyencakare omu kasheeshe obe oyeteekateekire, oinamukye aha rushozi Sinai, oyeyorekye omu maisho gangye aha mutwe gwarwo. 3Hatagira omuntu owainamuka naiwe, kandi otaikiriza omuntu weena kureebwa aha rushozi rwona, n'obu gaakuba amasyo g'entaama nari ag'ente kuriira omu maisho gaarwo. 4Musa yaashatura ebishate bibiri by'amabaare nk'eby'okubanza, yaimuka kare omu kasheeshe, yainamuka aha rushozi Sinai nk'oku MUKAMA yaamuragiire, aine omu ngaro ebyo bishate byombi by'amabaare. 5MUKAMA yaashuumira omu kicu, yaayemererayo nawe, yaaranga eiziina rye YEHOVA. 6#Neh 9:17; Rom 2:4. MUKAMA yaaraba omu maisho ga Musa, yaaranga naagira ati: MUKAMA, MUKAMA, Ruhanga ow'okusaasira n'embabazi, otarahuka kugira ekiniga, oijwire embabazi n'amazima, 7#Yer 32:18; 1 Yoh 1:9. ogirira embabazi abantu enkumi n'enkumi, osaasira okutahikiirira n'okushiisha n'ekibi; otasingisiriza na kakye abaine orubanja; ohoora abaana ahabw'eby'okushiisha bya baishebo, n'abaijukuru baabo okuhitsya aha busingye bwa kashatu n'obwa kana. 8Musa yaarahuka, yainika omutwe ahansi, yaaramya; 9yaagira ati: Ai MUKAMA, mbwenu ku ndaabe naagirirwa embabazi omu maisho gaawe, ninkweshengyereza, MUKAMA, ogyende ahagati yaitu, n'obu turaabe turi eihanga ry'ebitsya bigangaire, osaasire okutahikiirira kwaitu n'ekibi kyaitu, otwakiire tube obuhunguzi bwawe.

10 # 2 Sam 7:23. MUKAMA yaagira ati: Reeba, nindagaana endagaano; omu maisho g'abantu baawe boona ndyakora eby'okutangaaza ebitakakorwaga mu nsi yoona nari omu ihanga ryona; kandi abantu boona, abu orimu, baryareeba eki MUKAMA arikora, ahakuba eki ndikora, kiryaba eky'okutiinisa. 11Ogume oyorobere eki ndikukuragiira eri izooba. Reeba, ndyabinga Abaamori omu maisho gaawe, n'Abanyakanaani, Abahiiti, Abaperizi, Abahiivi n'Abayebusi. 12Oyerinde, otariragaana endagaano n'abatwire omu nsi ei orikuzamu, ekaba omutego omuriimwe; 13#2 Bag 18:4. kureka musheenye amatambiro gaabo, muhigure enyomyo zaabo, mutemagure na Ashera zaabo. 14#Bir 4:24; 1 Bag 14:22. (Mumanye ngu timuriramya Ruhanga ondiijo weena; ahabw'okuba MUKAMA, ou eiziina rye ririkwetwa Ow'eihato, ni Ruhanga ow'eihato.) 15#Ezk 6:9. Otariragaana endagaano n'abatwire omuri egyo nsi; ahakuba ku barikurata baaruhanga baabo nk'abarikuraaya, baabatambira ebitambo, nyentsya omwe aharibo akaakweta, orya aha kitambo kye, 16#Kub 25:1, 2. oshwererera batabani baawe bahara baabo, bwanyima bahara baabo bakurata baaruhanga baabo nk'abarikuraaya, bareetera batabani baawe kukurata baaruhanga baabo omu muringo ogwo.

17Otaryekorera ebishushani bya baaruhanga ebiheesirwe.

Eby'amagyenyi

18Oryaguma orinde obugyenyi bw'emigaati etatumbisiibwe. Omu bunaku obwatairweho omu kwezi Abibu oryamara ebiro mushanju noorya emigaati etatumbisiibwe, nk'oku naakuragiire; ahabw'okuba omuri okwo kwezi Abibu nimwo waarugiire omuri Misri. 19Ekiigura-nda kyona n'ekyangye, ekyetwa ekishaija ky'omu matungo gaawe goona ag'ente n'ag'entaama. 20Kwonka omujigaijo gw'endogoya oryagucunguza omwana gw'entaama; ku oriba otarikwenda kugucungura, oguhende ebitsya. Emijigaijo ya batabani baanyu yoona muryagicungura. Hatarigira owaija omu maisho gangye engaro nsha.

21Omu biro mukaaga oryakora, kwonka aha kiro kya mushanju oryahuumura; omu ibiba n'omu igyesha oryahuumura. 22#Kur 23:16. Kandi oryarinda obugyenyi bwa saabiiti mushanju, ez'omuganuro gw'eigyesha ry'engano, kandi n'obugyenyi bw'eishaaruura ry'aha muheru gw'omwaka. 23Kashatu omu mwaka abeetwa abashaija boona baryaguma baije, bareebwe omu maisho ga Mukama RUHANGA, Ruhanga wa Israeli. 24#Zab 78:55; 2 Bus 17:10. Ahakuba ndyabinga amahanga, garugye omu maisho gaawe, nyirizeyo emyatano yaawe; ku oriba ogiire kureebwa omu maisho ga MUKAMA kashatu omu mwaka, tihaine muntu weena oryetenga ensi yaawe. 25Otarihayo eshagama y'ekitambo ekintambiirwe hamwe n'omugaati ogutumbisiibwe, kandi ekitambo ky'obugyenyi bw'ekiro kikuru ky'Okuhingurwaho kitaritsigaraho okuhitsya omu kasheeshe. 26#Enf 3:9. Emiganuro y'ebirikubanza kwera omu misiri yaawe oryagireeta omu nju ya MUKAMA Ruhanga waawe. Otariteeka omwana gw'embuzi omu mahenahene ga nyinagwo. 27MUKAMA yaagambira Musa ati: Handiika ebigambo ebyo; ahakuba endagaano ei ndagaine naiwe n'Abaisraeli neehamira aha bigambo ebyo. 28Musa yaamarayo ebiro makumi ana nyomushana na nyekiro, ari hamwe na MUKAMA; omu biro ebyo tarariire by'okurya n'obu kwakuba okunywa amaizi. Yaahandiika ahari ebyo bishate by'amabaare ebigambo by'endagaano egyo, nibyo biragiro ikumi.

Musa okuruga aha rushozi Sinai

29 # Mat 17:2. Musa yaashuuma, yaaruga aha rushozi Sinai, aine ebishate bibiri eby'Ebirikuhamya omu ngaro; ku yaabaire naashuuma, tiyaamanya aha maisho ge ku harikumurinkana, ahakuba akaba naagaaniira na Ruhanga. 30Arooni n'Abaisraeli boona ku baareebire Musa, reeba aha maisho ge hakaba nihamurinkana; baatiina kumuhika haihi. 31Musa yaabeeta, Arooni n'abategyeki boona ab'eihanga eryo baagaruka ah'ari; Musa yaagaaniira nabo. 32Bwanyima Abaisraeli boona bairira haihi; yaabamanyisa ebiragiro byona oku biri, ebi MUKAMA amugambiriire aha rushozi Sinai. 33#2 Kor 3:13-16. Musa ku yaaherize kugamba nabo, yaata eky'okwetwekyerera aha maisho ge. 34Kwonka ku yaabaire aza omu maisho ga MUKAMA kugamba nawe, akiihaho okuhitsya ahu araashohorere; kandi ku yaabaire ashohora kugambira Abaisraeli ebi yaaragiirwa, 35Abaisraeli bareeba aha maisho ge nihamurinkana; Musa agaruka ayeta eky'okwetwekyerera aha maisho, okuhitsya obu yaabaire agarukayo kugaaniira na MUKAMA.

Currently Selected:

Okuruga 34: RR64

Highlight

Copy

Compare