Okuruga 33

Eihema rya MUKAMA okwihwa omu Baisraeli

1MUKAMA yaagambira Musa ati: Irooko orugye aha, iwe n'abantu abu waihire omu nsi ya Misri, muze omu nsi ei naarahiire Abrahamu, Isaaka na Yakobo, ningira nti: Ndyagiha oruzaaro rwawe. 2Naanye ndyayohereza maraika akwebembere, kandi ndyabinga Abanyakanaani, Abaamori, Abahiiti, Abaperizi, Abahiivi n'Abayebusi; 3#Bir 9:6. mutaahe omu nsi y'amate n'obwoki; kwonka Nyowe tindigyenda naimwe, ntakaabaitira omu muhanda; ahabw'okuba muri abantu b'ebitsya bigangaire. 4Abantu ku baahuriire ebyo bigambo bibi, baashaasha munonga, tihaagira n'omwe owaajwara eby'okweshemeza. 5Ahakuba MUKAMA akaba yaagambiire Musa ati: Gambira Abaisraeli oti: Muri abantu b'ebitsya bigangaire; ku naakugyenda naimwe nangwa n'akaanya kakye, nkaabamaraho. Mbwenu nu, mujuure eby'okweshemeza byanyu, mbone kumanya oku ndaabagire. 6N'ahabw'ekyo Abaisraeli baajuura eby'okweshemeza, okutandikira aha rushozi Horebu n'okweyongyerayo.

7Kandi okuruga obwo Musa yaaguma naatwara Eihema naariteera aheeru y'orusiisira hare narwo; yaaryeta Eihema ry'okubugaabuganiramu. Kandi omuntu weena owaabaire aba naasherura MUKAMA, akaba ashohora aza aha Ihema ry'okubugaabuganiramu, eryabaire riri aheeru y'orusiisira. 8Musa ku yaabaire aruga omu rusiisira, naaza aha Ihema, abantu boona baimuka, buri muntu ayemerera aha muryango gw'eihema rye, baguma nibamureeba okuhitsya obu araataahe omu Ihema. 9#Zab 99:7. Musa ku yaabaire aheza kutaahamu, enyomyo eri ey'ekicu eshuuma, eyemerera aha muryango gw'Eihema, MUKAMA agamba nawe. 10Abantu boona bakireeba enyomyo y'ekicu eyemereire aha muryango gw'Eihema, baimuka, baramya, buri muntu ari aha muryango gw'eihema rye. 11#Bir 34:10. Okwo nikwo MUKAMA yaabaire agamba na Musa nibareebana, nk'oku omuntu agamba na mugyenzi we. Bwanyima Musa agaruka omu rusiisira; kwonka omuheereza we Yoshua mwene Nuuni, omutsigazi, akaba ataruga omuri eryo Hema.

Musa okworekwa ekitiinisa kya MUKAMA

12 # Yer 1:5; 2 Tim 2:19. Musa yaagambira MUKAMA ati: Reeba, nongira oti: Twara abantu aba; kwonka tiwammanyisa u orantume nawe. Kandi okagira oti: Ninkumanya eiziina, kandi ogiriirwe embabazi omu maisho gangye. 13#Kur 34:9; Zab 27:11. Mbwenu nu, ninkweshengyereza, ku ndaabe ngiriirwe embabazi omu maisho gaawe, hati onyorekye enaama zaawe, nkumanye, mbone kuguma ningirirwa embabazi omu maisho gaawe; kandi oijukye eihanga eri ku riri eihanga ryawe. 14#Isa 63:9; Yos 21:44. MUKAMA yaamugarukamu ati: Nyowe nyenka ndyagyenda naiwe, kandi ndyakuha obuhuumure. 15Musa yaamugira ati: Iwe wenka ku oraabe otarikugyenda naanye, otatwiha aha. 16#Kub 14:14; Tit 2:14. Mbwenu kiryamanywa kita, nyowe n'abantu baawe ku tugiriirwe embabazi omu maisho gaawe? Tiiwe kugyenda naitwe, kikareetera nyowe n'abantu baawe kugira omutaano n'amahanga goona agari omu nsi?

17MUKAMA yaagambira Musa ati: Ekigambo eki eki waagamba nakyo niinyija kukikora; ahabw'okuba ogiriirwe embabazi omu maisho gangye, kandi ninkumanya eiziina. 18Musa yaagira ati: Ninkweshengyereza, nyoreka ekitiinisa kyawe. 19MUKAMA yaagira ati: Niinyija kurabya oburungi bwangye bwona omu maisho gaawe, ndangye eiziina ryangye YEHOVA omu maisho gaawe; ndyagirira embabazi ou ndigirira embabazi, kandi nsaasire, ou ndisaasira. 20#Isa 6:5; Kush 1:17. Kandi yaamugira ati: Torikubaasa kundeeba hamaisho; ahakuba tihariho muntu orindeeba, akagumaho. 21MUKAMA yaagira ati: Reeba, aha rubaju rwangye hariho omwanya, ahu orikwija kwemerera aha rukiri. 22#Zab 91:1, 4. Ekitiinisa kyangye ku kiraabe nikihinguraho, niinyija kukuta omu bwatika bwarwo, nkusangire n'ekiganja kyangye, okuhitsya obu ndaarabeho; 23#Yoh 1:18; 1 Yoh 1:2. bwanyima nyiheho omukono gwangye, ondeebe omugongo; kwonka aha maisho gangye tiharikwija kureebwa.

Currently Selected:

Okuruga 33: RR64

Highlight

Copy

Compare