Eky'Ebiragiro 34

Okufa kwa Musa

1Musa yaaruga omu mpita za Moabu, yaatemba orushozi Neebo, yaahika aha mutwe gwa Pisiga, ahashungaine na Yeriko. MUKAMA yaamworeka ensi ya Gileadi yoona okuhika Daani, 2na Nafutaali yoona, n'ensi ya Efuraimu na Manaase n'ensi yoona eya Yuda okuhika aha Nyanja y'oburengyerwa-izooba; 3yaamworeka na Negebu, n'oruhita rwa Yorudani, nirwo ruhanga rwa Yeriko orurembo rw'emikindo, okuhika Zoari. 4MUKAMA yaamugira ati: Eriya niyo nsi ei naarahiire ningira Abrahamu, Isaaka na Yakobo nti: Ndyagiha oruzaaro rwawe. Mbwenu naakwikiriza kugireeba n'amaisho, kwonka toryambuka kugizamu. 5Atyo Musa omugaragwa wa MUKAMA yaafeera okwo omu nsi ya Moabu, nk'oku MUKAMA yaagambire. 6#Yud 1:9. Yaamuziika omu ruhanga omu nsi ya Moabu ahashungaine na Besi-peori; kwonka tihariho orikumanya ahu ekituuro kye kiri n'okuhitsya hati. 7Musa ogwo yaafa ahikize emyaka igana na makumi abiri, amaisho ge gatakagiirwemu ruho, n'amaani ge gatakatuubire. 8Abaisraeli baamara ebiro makumi ashatu, nibacurira Musa omu mpita za Moabu. Bwanyima ebiro by'okuba omu rufu rwa Musa n'okumucurira byahwa.

9 # Kur 31:3; Isa 11:2; Dan 6:3; Kub 27:18. Yoshua mwene Nuuni akaba aijwire omwoyo gw'obwengye; ahabw'okuba Musa akaba yaamutaireho engaro. Abaisraeli baamuhurira, baakora nk'oku MUKAMA yaaragiire Musa. 10#Bir 18:18; Kur 33:11. Okuruga obwo tiharagarukire kubaho nabi ori nka Musa, ou MUKAMA yaabaire amanya, kandi akareebana nawe; 11kandi tihariho owaakugyeragyeranisibwa nawe omu by'obumanyiso n'eby'okutangaaza byona, ebi MUKAMA yaamutumire kukora omu nsi ya Misri, ahari Faraho n'abaheereza be boona, n'ensi ye yoona, 12n'omu by'amaani maingi byona, n'ebirikutiinisa byona, ebi Musa yaakoreire omu maisho g'Abaisraeli boona.

Currently Selected:

Eky'Ebiragiro 34: RR64

Highlight

Copy

Compare