2 Petero 3

Eby'okugaruka kwa Mukama waitu

1Abarikukundwa, egi n'ebaruha ya kabiri ei naabahandiikira; omu baruha ezo zombi eki naagyendereire n'okusisiimura emitima yaanyu etarimu buryarya nimbaijutsya; 2ngu mwijukye ebigambo ebyagambirwe ira baanabi abarikwera, n'ekiragiro kya Mukama kandi Omujuni waitu eki mwagambiirwe entumwa ezaabatumirweho. 3#1 Tim 4:1. Mubanze mumanye eki ngu, omu biro by'aha mperu haryaija abagaaniizi abarikugaaniiza, nibakuratira okwetenga kwabo okubi, 4#Mat 24:48. nibagira bati: Ku yaaraganiise kwija! Mbwenu arahi? Ahakuba okwiha obu baatatenkuriitwe baagwejegyera, byona bituura nk'oku byabaire biri aha kutandika kw'okuhangwa kw'ensi. 5#Kut 1:2, 6. Ahakuba nibabyeyebesa nkana, nibamanya ngu hakaba hariho eiguru okuruga ira, n'ensi eyaahangirwe ekigambo kya Ruhanga okuruga omu maizi, kandi ekaguma eri ahagati yaago; 6#Kut 7:21. kandi ahabw'ekigambo kya Ruhanga ensi eyaabaire eriho ekagaruka yaashwekwa amaizi g'omwegyemure, yaamirwa; 7kwonka eiguru n'ensi ebiriho hati, ahabw'ekigambo ekyo, bibiikiirwe omuriro, nibirindwa okuhitsya aha kiro ky'orubanja eki abantu abatatiina Ruhanga baricwekyererezibwaho.

8 # Zab 90:4. Kwonka, B'eishe-emwe, mutaryebwa ekigambo eki, ngu ekiro kimwe ahari Mukama ni nk'emyaka rukumi, kandi n'emyaka rukumi ni nk'ekiro kimwe. 9#1 Tim 2:4. Mukama tatuuzayo ki yaaraganiise, nk'abamwe oku barikuteekateeka, kureka agumisiriza ahabwanyu, atarikwenda muntu weena kuhwerekyerera, kureka naayenda ngu boona bahikye aha kweteisa. 10#1 Tes 5:2, 3. Kwonka ekiro kya Mukama kiryaija nk'omushuma; obwo eiguru riryarugaho n'okuhinda kuhango, n'ebintu by'obuhangwa biryayagibwa omuriro, kandi ensi n'ebigirimu biryayokibwa.

Okweteekateekyera eby'aha mperu

11Ebyo byona ku biraabe biri eby'okuyaga bityo, mureebe oku mushemereire kuba abarikwera kandi abarikutiina Ruhanga omu mitwarize yaanyu, 12#Isa 34:4. nimutegyereza ekiro kya Mukama, kandi nimukora eby'okukirahutsya; ahabw'ekyo kiro eiguru riryayokibwa rihweho, kandi eby'obuhangwa biryayagibwa omuriro mwingi. 13#Kush 21:1, 27. Kwonka itwe nitutegyereza eiguru eritsya n'ensi ensya ebituurwamu okuhikiirira, nk'oku yaaraganiise.

14N'ahabw'ekyo, abarikukundwa, nk'oku mutegyereize ebyo, mwezirikye abashangye mwine obusingye, mutaine ibara ribi n'obu kaakuba akamogo omu maisho ge. 15#Rom 2:4. Mumanye ngu okugumisiriza kwa Mukama waitu okwo nikwo kujunwa; nka mugyenzi waitu orikukundwa paulo oku yaabahandiikiire nk'obwengye obu yaahairwe oku buri, 16naagamba atyo omu baruha ze zoona. Omuri ezo harimu ebigambo bimwe ebigumire kwetegyerezibwa, ebi abatarikwetegyereza n'abatahamire bakiikamya, nk'oku bagira ebyahandiikirwe ebindi, bakeereetaho okuhwerekyerera. 17N'ahabw'ekyo naimwe, abarikukundwa, nk'oku mushangirwe nimumanya ebyo, mwerinde mutahabisibwa obuhabe bw'abantu babi, mukaruga omu kuhama kwanyu. 18Kureka mukurire omu mbabazi za Mukama waitu kandi Omujuni Yesu Kristo, n'omu kumumanya. Aheebwe ekitiinisa hati n'ebiro byona. Amiina.

Currently Selected:

2 Petero 3: RR64

Highlight

Copy

Compare