2 Abagabe 9

Yehu okuba omugabe

1 # 1 Bag 19:16. Bwanyima Elisa nabi yaayeta omwe aha batabani ba baanabi, yaamugira ati: Yezirikye, otware eri ihembe ry'amajuta, oze Ramosi-gileadi. 2Ku oraahikyeyo, osherure Yehu mwene Yehoshafaati, mwijukuru wa Nimushi; ku oraamanye omu ati, otaahemu, omwimutsye omuri beene ishe, omutware omu kishengye ky'omunda. 3Bwanyima okwate eri ihembe ry'amajuta, ogamushukye aha mutwe, ogire oti: Oku nikwo MUKAMA arikugamba naagira ati: Naakushukaho amajuta kuba omugabe wa Israeli. Ku oraaheze, oigure orwigi, ohungye, oteeziringa.

4Atyo ogwo mutsigazi nabi yaagyenda, yaaza Ramosi-gileadi. 5Ku yaahikireyo, yaashanga abakuru b'eihe nibahanuura; yaagira ati: Nyine obutumwa ahariiwe, Omukuru w'engabo. Yehu yaamubuuza ati: Ahari oha omuriitwe twena? Yaamugarukamu ati: Ahariiwe, Omukuru w'engabo. 6#2 Bus 22:7. Atyo Yehu yaimuka, baataaha omu nju; ogwo mutsigazi yaamushuka amajuta aha mutwe, naamugira ati: Oku nikwo MUKAMA, Ruhanga wa Israeli arikugamba naagira ati: Naakushukaho amajuta kuba omugabe w'eihanga rya MUKAMA Israeli. 7#1 Bag 18:4; 21:5-15. Oryaita ab'enju ya Ahabu mukama waawe, mbone kuhoora Yezebeeli enzigu y'eshagama y'abairu bangye baanabi, kandi n'eshagama y'abandi bairu ba MUKAMA boona. 8#1 Bag 21:21, 22; 2 Bag 10:17. Ahakuba ab'enju ya Ahabu boona nibaija kuhwerekyerera, mmare ahari Ahabu oyetwa omushaija weena, omuhuuku nari ow'obusingye, omuri Israeli. 9#1 Bag 14:10; 16:3, 11. Kandi ndyahindura enju ya Ahabu nk'eya Yeroboamu mwene Nebati, kandi nk'eya Baasha mwene Ahiya. 10#1 Bag 21:23; 2 Bag 9:35, 36. Embwa ziryariira Yezebeeli omu kibanja kya Yezereeli, abure owaamuziika. Ahonaaho yaigura orwigi, yairuka.

11 # Yoh 10:20. Bwanyima Yehu yaashohora, yaagaruka aha bashaija ba mukama we, baamubuuza bati: Ni buhooro? Ogwo mushaija omugwairaro yaaba areetsirwe ki ahariiwe? Yaabagarukamu ati: Ogwo mushaija nimumumanya n'ebigambo bye. 12Baagira bati: Ngaaha, noobeiha; tugambire amazima. Onu ati: Yaagamba naanye naagira ati: Oku nikwo MUKAMA arikugamba naagira ati: Naakushukaho amajuta kuba omugabe wa Israeli. 13#Mat 21:8. Batyo baarahuka, buri muntu yaakwata ekijwaro kye, baabyara ahansi ye aha mutwe gw'amatembero, baateera eikondere nibagira bati: Yehu yaaba omugabe.

Yehu okwita Yoramu na Ahazia

14 # 1 Bag 19:17; 2 Bag 8:28. Oku nikwo Yehu mwene Yehoshafaati mwijukuru wa Nimushi, yaagomeire Yoramu. (Omu bunaku obwo Yoramu n'Abaisraeli boona bakaba nibarinda Ramosi-gileadi Hazaeli omugabe wa Siria; 15#2 Bag 8:29. kwonka omugabe Yoramu akaba agarukire Yezereeli kurwarizibwayo obuhuta obu Abasiria baamuhutaize, obu yaarwana na Hazaeli omugabe wa Siria.) Atyo Yehu yaagira ati: Eki ku muraabe nikyo murikwenda, hatagira omuntu weena owairuka kuruga omu rurembo, kutwara enkuru omuri Yezereeli. 16Atyo Yehu yaatemba ekigaari, yaaza Yezereeli, ahakuba Yoramu niyo yaabaire arwariire; kandi obwo Ahazia omugabe wa Yuda akaba ashuumireyo kureeba Yoramu.

17Obwo omurinzi akaba ayemereire aha munaara gw'omuri Yezereeli, naareebera ahare omutwe gw'engabo za Yehu nigwija; yaagira ati: Nindeeba omutwe gw'engabo nigwija. Yoramu yaagira ati: Tuma omuntu aha mbaraasi ababugane, ababuuze ati: Ni buhooro? 18Atyo ow'aha mbaraasi yaaza kumubugana, yaagira ati: Omugabe naabuuza ngu, Ni buhooro? Yehu yaagira ati: Ebya buhooro noofa ki nabyo? Hingura, okubuukye, onkurate. Ogwo murinzi yaagira ati: Entumwa yaabahika, kwonka tindikureeba neegaruka. 19Omugabe yaagaruka yaatuma ondiijo aha mbaraasi; nawe yaabahika, yaabagira ati: Omugabe naabuuza ngu, Ni buhooro? Yehu yaagarukamu ati: Ebya buhooro, noofa ki nabyo? Hingura, okubuukye, onkurate. 20Omurinzi yaagaruka yaagira ati: Nawe yaabahika, kwonka tindikureeba naagaruka. Kandi emivugire neeshusha eya Yehu mwene Nimushi, ahakuba naavugisa amaani.

21 # 1 Bag 21:1; 2 Bus 22:7. Yoramu yaagira ati: Muboneze ekigaari kyangye. Baakiboneza. Yoramu omugabe wa Israeli na Ahazia omugabe wa Yuda baashohora, buri omwe omu kigaari kye, baaza kubugana Yehu, baamubugana aha kibanja kya Nabosi owa Yezereeli. 22#2 Bus 21:13. Yoramu ku yaareebire Yehu, yaamubuuza ati: Ni buhooro, Yehu? Onu yamugarukau ati: Ni buhooro ki, obushambani bwa nyoko Yezebeeli, n'oburugo bwe bikiri bingi biti? 23Yoramu yaahinduza embaraasi orukoba, yaahunga, naagira Ahazia ati: Ahazia, hariho okureebyana! 24Yehu yaananuura obuta bwe n'amaani ge goona, yaateeera Yoramu omwambi omu buteeraniro bw'amabega, gwamwata omutima, gwayogamu, yaagwa omu kigaari kye 25#1 Bag 21:19, 29. Yehu yaagira Bidukaari omukuru w'engabo ze, ati: Mukirize, omunagye omu musiri gw'ekibanja kya Nabosi owa Yezereeli; ahakuba noijuka, obu nyowe naiwe twakurata Ahabu ishe, turi aha mbaraasi, MUKAMA akamuraguraho ekigambo eki ati: 26Buzimazima, nk'oku nyomwabazyo ndeebire eshagama ya Nabosi n'abatabani, naanye ndyakuhoorera omuri ogu musiri; nikwo MUKAMA arikugira. N'ahabw'ekyo mukirize, omunagye omuri ogwo musiri, nk'oku MUKAMA yaagambire.

27 # 2 Bus 22:9. Ahazia omugabe wa Yuda ku yaakireebire, yaahungira omu muhanda ogurikuza Besi-hagani. Yehu yaamubinga, naagira ati: Nawe mumurashe. Baamurasira omu kigaari kye yaahika aharikweinamuka Guuri, eri haihi na Ibuleamu. Yaahungira Megido, yaagwayo. 28Abagaragwa be baamuta omu kigaari, baamutwara Yerusaalemu, baamuziika omu kituuro omu rurembo rwa Daudi, baamushangisa baishenkuru. 29Kandi omu mwaka gwa ikumi na gumwe ogw'omu busingye bwa Yoramu mwene Ahabu, Ahazia akatandika kutegyeka Yuda.

Okufa kwa Yezebeeli

30Yehu ku yaahikire Yezereeli, Yezebeeli yaakihurira, yaaziga amaisho ge, yaaboneza eishokye rye, yaaringuririza omu dirisa. 31#1 Bag 16:9-20. Yehu ku yaabaire yaahika ati omu rurembo, Yezebeeli yaamugira ati: Iwe Zimuri, owaita mukama waawe, ni buhooro? 32Yehu yaimutsya amaisho, yaareeba omu dirisa, yaagira ati: Ori aha rubaju rwangye n'oha? N'oha? Abakonwa bashatu nari babiri baamuringuriza. 33Yaabagira ati: Mumunagye ahansi. Batyo baamunaga ahansi, eshagama ye yaataraakira ekisiika n'embaraasi, zaamuribatiirira. 34#1 Bag 16:31. Yehu yaataaha omu nju, yaarya, yaanywa; bwanyima yaagira ati: Mwirooko mureebe ogwo mukazi okyeenirwe, mumuziikye, ahakuba ni muhara w'omugabe. 35Kwonka ku baagiire kumuziika, tibaamushangaho, kureka empanga y'omutwe gwe n'ebigyere n'ebiganja. 36#1 Bag 21:23. Ku baagarukire, baamugambira, yaagira ati: Ekyo nikyo kigambo kya MUKAMA, eki yaagambire naaraba omu mwiru we Eliya owa Tishubi, ati: Omu musiri gwa Yezereeli nimwo embwa ziririira omutumbi gwa Yezebeeli; 37kandi omutumbi gwe guryaba nk'amasha agari ahansi omu musiri gwa Yezereeli, habure owaagira ati: Ogu ni Yezebeeli.

Currently Selected:

2 Abagabe 9: RR64

Highlight

Copy

Compare