2 Abagabe 8

Eby'Elisa n'omukazi wa Shuneemu

1 # Kut 41:27; 2 Bag 4:35; Hag 1:11. Kandi Elisa akaba agambiire omukazi, ou yaazoire omwana we ati: Imuka ogyende, iwe n'ab'eka yaawe, oshuhuukire ahu orikubaasa hoona; ahabw'okuba MUKAMA aragiire enjara kuteera, kandi neija kumara omu nsi emyaka mushanju. 2Omukazi yaimuka, yaakora nk'oku omushaija wa Ruhanga yaamugambiire; yaagyenda n'ab'eka ye, yaashuhuukira omu nsi y'Abafilistia okumara emyaka mushanju. 3Emyaka mushanju ku yaahweire, ogwo mukazi yaagaruka naaruga omu nsi y'Abafilistia, yaaza owa omugabe kumwetongyeza ahabw'enju ye n'obutaka bwe. 4#2 Bag 4:12. Kandi obwo omugabe akaba naagaaniira na Gehazi omuheereza w'omushaija wa Ruhanga, naagira ati: nteekyerereza ebikuru byona ebi Elisa yaakozire. 5#2 Bag 4:35. Ku yaabaire naakiteekyerereza omugabe oku Elisa yaahimbwire ofiire, omukazi ou yaahimbwire omutabani, yaija yaayetongyeza omugabe ahabw'enju ye n'obutaka bwe. Gehazi yaagira ati: Mukama wangye omugabe, ogu niwe mukazi n'ogu niwe mutabani ou Elisa yaahimbwire. 6Kandi omugabe ku yaabuurize ogwo mukazi, nawe yaabimushobororera. Atyo omugabe yaamukwatsa omwe aha batware be, yaamugira ati: Omugarurire ebye byona, n'ebyayezire omu misiri ye okwiha obu yaaruga omuri egi nsi n'okuhitsya hati.

Okufa kwa Benihadadi, na Hazaeli okurya obugabe bwe

7 # 2 Bag 6:24. Bwanyima Elisa yaaza Damasiko. Omu bunaku obwo Benihadadi omugabe wa Siria akaba arwaire; baamugira bati: Omushaija wa Ruhanga ori yaija. 8#2 Bag 1:2; 19:15, 17. Omugabe yaagira Hazaeli ati: Twara omukimbo, obugane ogwo mushaija wa Ruhanga, omushabe, akubuurize ahari MUKAMA, naagira ati: Ebyo omugabe naija kukira egi ndwara? 9Atyo Hazaeli yaaza kumubugana, aine omukimbo gw'ebintu by'emiringo yoona ebya Damasiko, ebirikwekorerwa engamira makumi ana. Ku yaamuhikire, yaayemerera omu maisho ge, yaagira ati: Omwana waawe Benihadadi omugabe wa Siria yaakuntumaho naabuuza ati: Niinyija kukira egi ndwara? 10#2 Bag 8:14, 15. Elisa yaamugarukamu ati: Irooko omugire oti: Buzima egyo ndwara noija kugikira. Kwonka kandi MUKAMA anyorekire ngu, buzima naija kufa. 11Yaamugumyaho eriisho, okuhitsya obu yaakwatsirwe enshoni. Omushaija wa Ruhanga yaarira. 12#2 Bag 10:32; 12:17; 13:3, 7, 22; Hos 13:16. Hazaeli yaamubuuza ati: Mukama wangye, noorizibwa ki? Yaagarukamu ati: Ahabw'okuba nimmanya oku orikora kubi Abaisraeli; ebigo byabo oryabyotsya n'omuriro, abatsigazi baabo oryabaitsa rurara, oryateera ahansi abaana baabo, bacwagagurikye, n'abakazi baabo abaine enda obashature aha nda. 13#1 Bag 19:15. Hazaeli yaagira ati: Mbwenu nkaanye omwiru waawe embwa, niinye oha okukora ekigambo ekyo ekikuru? Elisa yaamugarukamu ati: MUKAMA anyorekire ku orikwija kuba omugabe wa Siria. 14#2 Bag 8:10. Atyo yaaruga ahari Elisa, yaija ahari mukama we; mukama we yaamubuuza ati: Elosa yaakugambira ki? Onu yaamugarukamu ati: Yangira ngu buzima noija kukira. 15Kwonka ku bwaseesire, yaakwata eky'okweshweka, yaakijabika omu maizi, yaakimuta aha maisho okuhitsya obu yaafiire. Bwanyima yaategyeka omu mwanya gwe.

Eby'omu busingye bwa Yehoraamu omugabe wa Yuda

16Omu mwaka gwa kataano ogw'omu busingye bwa Yoramu mwene Ahabu omugabe wa Israeli, Yehoraamu mwene Yehoshafaati omugabe wa Yuda akatandika kutegyeka. 17#2 Bus 21:5-10. Yaaza aha ngoma ahikize emyaka makumi ashatu n'ebiri, yaategyekyera emyaka munaana omuri Yerusaalemu. 18Yaagyendera omu mitwarize y'abagabe ba Israeli, nk'ab'enju ya Ahabu oku baakozire, ahabw'okuba akashwera muhara wa Ahabu. Kandi yaakora ebirikwangwa MUKAMA. 19#1 Bag 11:36. Kwonka MUKAMA tarenzire kuhwerekyereza Yuda ahabwa Daudi omwiru we, nk'oku yaaraganiise kuguma naamuha etabaaza n'oruzaaro rwe ebiro byona.

20Omu biro bye Abanyaedomu bakagoma, baaruga omu butegyeki bwa Yuda, baayeteeraho omugabe. 21Bwanyima Yehoraamu yaayambuka, yaaza Zairi n'ebigaari bye byona. Yaimuka nyekiro, we n'abakuru b'ebigaari bye baateera Abanyaedomu, abaabaire bamwehinguririize; kandi engabo ze zoona zaahunga, zaataaha. 22#Kut 27:40; Yos 10:29, 30. Okwo nikwo Edomu yaagomire, ekaruga omu butegyeki bwa Yuda n'okuhitsya hati. Omu bunaku obwo Libuna nayo yaagoma. 23Mbwenu endiijo mirimo ya Yehoraamu n'ebi yaakozire, tibihandiikirwe omu kitabyoky'oby'omu busingye bw'abagabe ba Yuda? 24#2 Bus 21:20; 4:12. Yehoraamu yaagwejegyera, yaashanga baishenkuru, yaaziikwa hamwe na baishenkuru omu rurembo rwa Daudi; Ahazia omutabani yaategyeka omu mwanya gwe.

Eby'omu busingye bwa Ahazia omugabe wa Yuda

25Omu mwaka gwa ikumi n'ebiri ogw'omu busingye bwa Yoramu mwene Ahabu omugabe wa Israeli, Ahazia mwene Yerohaamu omugabe wa Yuda akatandika kutegyeka. 26Ahazia akaba ahikize emyaka makumi abiri n'ebiri, obu yaatandika kutegyeka. Yaategyekyera omwaka gumwe omuri Yerusaalemu; kandi eiziina rya nyina akaba ari Atalia, mwijukuru wa Omuri omugabe wa Israeli. 27Nawe yaagyendera omu mitwarize y'ab'enju ya Ahabu, yaakora ebirikwangwa MUKAMA, nk'ab'enju ya Ahabu oku baakozire; ahabw'okuba akaba ari mukwe w'ab'enju ya Ahabu.

28 # 1 Bag 22:3. Bwanyima yaahurura na Yoramu mwene Ahabu kurwanisa Hazaeli omugabe wa Siria omuri Ramosi-gileadi. Abasiria baahutaarizayo Yoramu. 29#2 Bag 9:15, 16. Omugabe Yoramu yaagaruka Yezereeli kurwarizibwayo obuhuta obu Abasiria baamuhutaariize Raama, obu yaarwana na Hazaeli omugabe wa Siria. Kandi Ahazia mwene Yehoraamu omugabe wa Yuda yaashuuma kureeba Yoramu mwene Ahabu omuri Yezereeli, ahabw'okuba akaba arwaire.

Currently Selected:

2 Abagabe 8: RR64

Highlight

Copy

Compare