2 Abagabe 21

Eby'omu busingye bwa Manaase

1 # 2 Bus 33:1-9. Manaase akaza aha ngoma aine emyaka ikumi n'ebiri, yaamara aha ngoma emyaka makumi ataano n'etaano naategyekyera Yerusaalemu. Nyina akaba naayetwa Hefuziba. 2#2 Bag 16:3. Kwonka yaakora ebirikwangwa MUKAMA, naatooreza emicwe erikunugwa ey'abanyamahanga, abu MUKAMA yaabingire omu maisho g'Abaisraeli; 3#2 Bag 17:16; 18:4; 23:5; 1 Bag 16:32, 33; Bir 4:19. ahabwo'okuba akagaruka yaayombeka zaanyaruju z'omu myanya mikuru y'okuramizamu, ezi Hezekia ishe yaabaire asheenyire; yaayombekyera Baali amatambiro, yaakora Ashera nk'oku Ahabu omugabe wa Israeli yaabaire akora, kandi yaaguma naaramya eihe ryona ery'omu iguru, naariheereza. 4#Bir 12:11; 2 Sam 7:13; 1 Bag 8:29; 9:3; 2 Bag 23:27; Yer 7:30; 32:34. Kandi yaayombeka amatambiro omu nju ya MUKAMA, ei MUKAMA yaabaire agambireho ati: Omuri Yerusaalemu nimwo ndita eiziina ryangye. 5#1 Bag 6:36; 7:12; 2 Bag 23:12. Kandi yaayombekyera eihe ryona ery'omu iguru amatambiro omu bikaari byombi eby'enju ya MUKAMA. 6#Lev 18:21; 19:26, 31; 2 Bag 17:17; 23:24. Yaarabya omutabani omu muriro, yaaguma naakora eby'okumanyisa ebiribaho n'okuragura, kandi yaaraguza aha barikugambisa emizimu n'abarogi. Yaakora ebibi bingi omu maisho ga MUKAMA, yaamugwisa kubi. 7Yaata ekishushani kya Ashera ekibaizire omu nju ei MUKAMA yaagambiire Daudi n'omutabani Sulemaani ati: Omu nju egi n'omuri Yerusaalemu ebi naatooraine omu nganda zoona eza Israeli, nimwo ndita eiziina ryangye kugumamu ebiro byona; 8#2 Sam 7:10. kandi Abaisraeli ku barita omutima aha kworobera ebi naabaragiire byona, n'ebi omwiru wangye Musa yaabaragiire, tindigaruka kubazengyereza kubaiha omu nsi ei naahaire baishenkurubo. 9Kwonka tibaahurira, kandi Manaase yaababeihabeiha kukora ebibi ebirikukira obubi ebi amahanga gaakozire, agu MUKAMA yaacwekyerereize omu maisho g'Abaisraeli.

10Bwanyima MUKAMA yaagamba naaraba omu bairu be baanabi ati: 11#1 Bag 21:26; 2 Bag 21:2, 16; 24:3, 4; Yer 15:4. Ahabwa Manaase omugabe wa Yuda kukora ebirikunugwa ebyo, akakora ebibi ebirikukira obubi ebi Abaamori abaamubandiize baakozire byona, akasiisisa Abayuda ebishushani bye ebirikuramibwa; 12#1 Sam 3:11; Yer 19:3. nikyo MUKAMA Ruhanga wa Israeli arikugambira naagira ati: Reeba, naaza kureeta akabai ahari Yerusaalemu na Yuda, aku omuntu weena araahurire, amatu gakateera enduuru. 13#Isa 28:17; 34:11; Tonz 2:8; Amo 7:7, 8. Ndyagyeresa Yerusaalemu akagoye nk'aku naagyereise Samaria, na kariisho ei naashwijumiise enju ya Ahabu; kandi ndyaragaza Yerusaalemu, nk'oku omuntu aragaza eshuhaani, akgijuumika. 14Ndyanaga ekicweka ekitsigaire aha buhunguzi bwangye, mbaheyo omu mikono y'abazigu baabo, bahindukye omuhiigo n'omunyago aharibo, 15ahakuba bakozire ebi ndikwanga, bangwisa kubi okwiha obu baishenkurubo baaruga Misri n'okuhitsya hati.

16 # 2 Bag 21:11; 24:4. Kandi Manaase akasheesha eshagama nyingi y'abataine rubanja, okuhitsya obu yaijwize Yerusaalemu okuruga aha rubaju okuhika aha rundi, akabyongyera aha kibi eki yaasiisiise Abayuda, bakakora ebirikwangwa MUKAMA. 17#2 Bus 33:11-19. Mbwenu endiijo mirimo ya Manaase, n'ebi yaakozire byona, n'ekibi eki yaakozire, tibihandiikirwe omu kitabo ky'eby'omu busingye bw'abagabe ba Yuda? 18#2 Bus 33:20-25. Manaase yaagwejegyera, yaashanga baishenkuru, yaaziikwa omu musiri gw'aha nju ye, ogwa Uzza; Amoni omutabani yaategyeka omu mwanya gwe.

Eby'omu busingye bwa Amoni

19Amoni akaba aine emyaka makumi abiri n'ebiri, obu yaatandika kutegyeka, yaategyekyera emyaka ebiri omuri Yerusaalemu, Nyina akaba naayetwa Meshulemeesi, muhara wa Haruzi owa Yotiba. 20#2 Bag 21:2, 6, 11. Yaakora ebirikwangwa MUKAMA nka Manaase ishe. 21Yaagyendera omu muhanda gwona ogu ishe yaagyendeiremu, yaaheereza ebishushani ebi ishe yaaheereize, kandi yaabiramya; 22#2 Bag 22:17. yaimuura MUKAMA, Ruhanga wa baishenkuru, tiyaagyendera mu mihanda ye. 23Bwanyima abaheereza b'omugabe Amoni baamugirira enaama, baamwitira omu nju ye. 24Kwonka abantu b'omuri egyo nsi baita abamugiriire enaama boona, baata omutabani Yosia aha ngoma omu mwanya gwe. 25Mbwenu endiijo mirimo ya Amoni ei yaakozire, tehandiikirwe omu kitabo ky'eby'omu busingye bw'abagabe ba Yuda? 26Yaaziikwa omu kituuro kye omu musiri gwa Uzza; Yosia omutabani yaategyeka omu mwanya gwe.

Currently Selected:

2 Abagabe 21: RR64

Highlight

Copy

Compare