2 Abagabe 2

Eliya okutwarwa omu iguru

1 # 1 Bag 19:19-21; Kut 5:24. MUKAMA ku yaabaire ari haihi kutwara Eliya omu iguru n'omuyaga gw'akasooroora, Eliya na Elisa bakaba bari omu muhanda nibaruga Gilugaali. 2#Rus 1:15, 16. Eliya yaagira Elisa ati: Ninkweshengyereza, guma aha; ahakuba MUKAMA yantuma Beseeli. Kwonka Elisa yaagira ati: Nindahira MUKAMA, kandi ninkurahira, tindikwija kukurugaho. Batyo baashuuma, baaza Beseeli. 3#2 Bag 4:1, 38. Abaana ba baanabi, abaabaire bari Beseeli, baashohora, baashanga Elisa, baamugira bati: Noomanya ku eri izooba MUKAMA arikwija kutwara mukama waawe, akamukwihaho? Onu ati: Eego ninkimanya; kwonka, nimwetsize.

4Eliya yaagira Elisa ati: Elisa, ninkweshengyereza guma aha, ahakuba MUKAMA yantuma Yeriko. Kwonka Elisa yaagira ati: Nindahira MUKAMA, kandi ninkurahira, tindikwija kukurugaho. Batyo baahika Yeriko. 5Abaana ba baanabi abaabaire bari Yeriko, bairirira Elisa, baamugira bati: Noomanya ku eri izooba MUKAMA arikwija kutwara mukama waawe, akamukwihaho? Yaagarukamu ati: Eego, ninkimanya; kwonka nimwetsize.

6Bwanyima Eliya yaamugira ati: Ninkweshengyereza guma aha; ahakuba MUKAMA yantuma Yorudani. Kwonka Elisa yaagira ati: Nindahira MUKAMA, kandi ninkurahira, tindikwija kukurugaho. Batyo baagumizamu bombi. 7Abashaija makumi ataano ab'omu baana ba baanabi nabo baagyenda, baabeemerera hangahari, nibareeba Eliya na Elisa beemereire aha rubaju rwa Yorudani. 8#Kur 14:21; Yos 3:16; 1 Bag 19:19. Bwanyima Eliya yaajuura omunagiro gwe, yaagukubamu, yaateera amaizi; ahonaaho amaizi gaayecwamu habiri oku n'oku, bombi baayambukira ahoomire.

9Ku baaherize kwambuka, Eliya yaagira Elisa ati: Shaba eki ndaakukorere, ntakakwihirweho. Elisa yaagira ati: Ninkweshengyereza, ndaga emigabo ebiri y'omwoyo gwawe. 10Onu yaagira ati: Waashaba ekigumire; kwonka ku orandeebe ninkwihwaho, noija kukitunga; ku oraabe otandeebire, tikirikwija kuba kityo. 11#2 Bag 6:17. Ku baabaire nibakigyenda nibagaaniira, ahonaaho haija ekigaari ky'omuriro n'embaraasi z'omuriro, byabataanisa. Eliya yaatwarwa omuyaga gw'akasooroora, yaatemba omu iguru. 12#2 Bag 13:14. Elisa ku yaakireebire, yaagamba munonga, naagira ati: Taata! Taata! Ebigaari bya Israeli n'embaraasi zaayo! Tiyaagaruka kumureeba. Ahonaaho yaakwata ebijwaro bye, yaabitaaguramu ebicweka bibiri. 13Bwanyima yaihaho omunagiro gwa Eliya ogwamuragara, yaagarukayo, yaayemerera aha rubaju rwa Yorudani. 14Yaakwata ogwo munagiro gwa Eliya ogwamuragara, yaateera amaizi naagira ati: MUKAMA, Ruhanga wa Eliya, arahi? Ku yaateire amaizi, gaayebaganisamu habiri, yaayambuka.

15Abaana ba baanabi abaabaire bari Yeriko, ku baamureebire abari omumaisho, baagira bati: Omwoyo gwa Eliya guri ahari Elisa. Baija kumubugana, baamwinamira; 16#1 Bag 18:12. baamugira bati: Reeba, itwe abairu baawe twine abashaija b'amaani makumi ataano; nitukweshengyereza, ka bagyende, basherure mukama waawe. Obundi Omwoyo wa MUKAMA akaaba amukiriize, amunagire omu kibungo nari omu ruhanga ahatarikumanywa. Onu ati: Mutabatuma. 17Kwonka ku baamweshengyereize munonga, yaarugaho yaakwatwa enshoni, yaabagira ati: Mubatume. Batyo baatuma abashaija makumi ataano, baamara ebiro bishatu nibamusherura, tibaamubona. 18Ku baamugarukireho, baashanga akiri Yeriko, yaabagira ati: Timbagizire nti: Mutagyenda?

Elisa okushemeza amaizi

19Abashaija b'orwo rurembo baagira Elisa bati: Reeba Mukama waitu, naiwe nk'oku orikureeba, ahu orurembo rwombekirwe ni harungi, kwonka amaizi gaaho ni mabi, n'eitaka ryaho tiririkweza. 20Yaagira ati: Mundeetere akaabya kasya, mukatemu omwonyo. Batyo bakamureetera. 21#Kur 15:25; 2 Bag 4:41. Yaaza aha nshuro y'amaizi, yaaginagamu omwonyo, yaagira ati: Oku nikwo MUKAMA arikugamba naagira ati: Naatambira aga maizi; okuruga hati tigakirugwamu rufu nari okutorooga. 22N'ahabw'ekyo ago maizi gaashemera okwiha obwo n'okuhitsya eri izooba, nk'ekigambo eki Elisa yaagambire oku kyabaire kiri.

23Yaarugayo, yainamuka, yaaza Beseeli; ku yaabaire naakigyenda, haija abatsigazi bato nibaruga omu rurembo, baamugaaniiza nibagira bati: Iwe mushaija w'oruhara 'we, inamuka! Iwe mushaija w'oruhara 'we, inamuka! 24#Neh 13:25. Yaahinduka; ku yaabareebire, yaabakyeena omu iziina rya MUKAMA; ahonaaho haija edubu ibiri z'enkazi zaaruga omu kibira, zaabataagataaguramu abatsigazi makumi ana na babiri. 25#1 Bag 18:19, 20. Okuruga aho yaagumizamu, yaaza aha kibungo kya Karumeeli; yaarugayo, yaagaruka Samaria.

Currently Selected:

2 Abagabe 2: RR64

Highlight

Copy

Compare