2 Abakorinso 9

Oku Omukristaayo ashemereire kuba efura

1Aha by'okuhwera abarikwera tindikureeba ki ndikubahandiikirira; 2ahakuba nimmanya okukunda kwanyu, oku ndikweraata ahabwanyu omu Bamakedonia, ningira nti: Abaakaya bamazire omwaka beeteekateekire; kandi obweziriki bwanyu bwezirikiise baingi munonga aharibo. 3Kwonka nintuma ab'eishe-emwe abo ngu okwehimbisa kwaitu ahabwanyu omu kigambo ekyo kutaba kwa busha, kureka babashangye mweteekateekire, nk'oku naagambire; 4ahakuba tindikwenda itwe, (tutagizire imwe) kukwatwa nshoni z'ebyo ebi tubainemu matsiko, Abamakedonia bamwe batakaija naanye, bakashanga muteeteekateekire. 5Nikyo naateekateekyeire ngu kishemereire kweshengyereza ab'eishe-emwe abo kumbandiza okwo, ngu bateekateekye kare ekiconco kyanyu eki mwaraganiise, ira, ngu kishangwe kyatebeekanisiibwe, kiri eky'embabazi, kitari ky'okugyemwa.

6 # Enf 19:17. Eki ndikugamba n'eki, ngu, Orikubiba nkye, aryagyesha bikye; kandi orikubiba nyingi, aryagyesha bingi. 7#Rom 12:8; 1 Bus 29:17. Omuntu weena akore, nk'oku amaririire omu mutima gwe, atarikunyoomwa nari akugyemwa; ahakuba Ruhanga akunda efura. 8Ruhanga naabaasa kubakanyisiza emigisha yoona, ngu imwe, ku muraatungye obutoosha ebirikubamara, mubone kugira bingi eby'okuhwera omurimo gwona omurungi. 9#Zab 112:9. Nk'oku kyahandiikirwe ngu:

Akateera hoona embibo, yaagabira abooro;

Okuhikiirira kwe nikugumaho ebiro byona.

10 # Hos 10:12. Kandi Ogwo orikuha omubibi embibo, akamuha eby'okurya, aryabaha embibo z'okubiba, azikanyise, kandi akanyise n'ebyana by'okuhikiirira kwanyu. 11Naimwe omuri byona muryatungisibwa munonga, mubone kugira obufura oburisiimisa Ruhanga ahabwaitu; 12ahakuba okuheereza eby'okuhwera ebyo tikurikumara bworo bw'abarikwera kwonka, beitu kandi nikureetera baingi okukiraho kusiima Ruhanga; 13ahabw'okuba omu kugyezibwa okw'okuheereza oku, Ruhanga naija kuhimbisibwa ahabw'okworoba kwanyu oku mwayorobeire engiri ya Kristo, kandi n'obufura bwanyu omu bintu ebi mwahaire ahabw'abo n'ahabw'abandi boona; 14kandi baryabagirira orushusho, nibabashabira ahabw'embabazi za Ruhanga ezihinguraine omuriimwe. 15Ruhanga asiimwe ahabw'ekiconco kye ekitarikubaasa kushoboororwa.

Currently Selected:

2 Abakorinso 9: RR64

Highlight

Copy

Compare