1 Samueli 25

Okufa kwa Samueli

1 # 1 Sam 28:3. Ebiro ku byahingwireho, Samueli yaafa; Abaisraeli boona baateeranira hamwe, baamucurira, baamuziika omu nju ye Raama. Bwanyima Daudi yaimuka, yaashuuma, yaaza omu ihamba rya Parani.

Ebya Nabali

2Omuri Maoni hakaba harimu omushaija, ou amatungo ge gaabaire gari Karumeeli; akaba ari omutungi munonga, aine entama enkumi ishatu, n'embuzi rukumi; omuri obwo bunaku akaba naakyemurira ebyoya by'entaama ze Karumeeli. 3#Enf 31:10; Isa 32:5, 7. Ogwo mushaija akaba naayetwa Nabali, n'eiziina ry'omukazi we ari Abigaili. Ogwo mukazi akaba ari omukazi orikwetegyereza, kandi murungi; kwonka iba akaba ari omunyamwaga, aine emicwe mibi; kandi akaba ari ow'omu muryango gwa Kalebu.

4Daudi ku yaabaire akiri omu ihamba, yaahurira ngu Nabali naakyemura ebyoya by'entaama ze. 5Daudi yaatuma abatsigazi ikumi, yaabagira ati: Mwinamukye Karumeeli, muze owa Nabali, mumundamukize; 6#Mat 10:12, 13. mugire ogwo mutungi muti: Obusingye bugume ahariiwe, n'aha ka yaawe, n'ahari byona ebi oine. 7Mpuriire ku oine abarikukyemura ebyoya; kandi ebi biro tubaire turi hamwe n'abariisa baawe; omwanya gwona ogu baamazire Karumeeli, titwine ki tubaitsize, kandi tibaine kintu kyona eki baafeereirwe. 8Buuza abatsigazi baawe, nibaija kukugambira. Ninkweshengyereza abatsigazi bangye bagirirwe embabazi omu maisho gaawe, ahakuba twaija aha izooba rirungi ry'obugyenyi. N'ahabw'ekyo eki oraabe oine kyona obe nikyo waaha abairu baawe n'omwana waawe Daudi.

9Abatsigazi ba Daudi ku baahikire aho, baagambira Nabali byona nk'oku Daudi yaabibatuma; baaguma bategyereize. 10#Zab 123:3, 4. Nabali yaagarukamu abo baheereza ba Daudi, ati: Daudi ogwo niwe oha? Kandi mwene Yese niwe oha? Ebi biro hariho abahuuku baingi abacwire ahari bakama baabo. 11Mbwenu nyeyakye eby'okurya byangye, n'amaizi gangye, n'enyama ei mbaagiire abakyemuzi bangye b'ebyoya, mbihe abantu abu ntarikumanya i barikuruga? 12Batyo abatsigazi ba Daudi baahinduka, baagarukayo, baamuteekyerereza ebyo byona. 13#1 Sam 30:24. Daudi nikwo kugira abashaija be ati: Buri muntu ahagatire rurara ye. Batyo buri muntu yaahagatira rurara ye, na Daudi yaahagatira eye; abantu nka magana ana bainamuka bakuratiire Daudi; na magana abiri baatsigara aha bintu.

14Omwe aha batsigazi ba Nabali yaagambira Abigaili muka mukama we ati: Reeba, Daudi atumire entumwa, zaaruga omu ihamba kuramutsya mukama waitu; ku baizire, yaabajuukirira. 15Haza abo bashaija bakatubeera efura; tibaine ki baatwitsize nari eki twafeereirwe, omwanya gwona ogu twamazire nabo turi omu mariisizo. 16#Zek 2:5. Bakatubeera orugo nyomushana na nyekiro, omwanya gwona ogu twamazire nabo nituriisa entaama. 17N'ahabw'ekyo hati okimanye, oteekateekye eki oraakore, ahakuba bamaririire kukora kubi mukama waitu n'eka ye yoona; noomanya omuntu mubi nk'ogwo tihaine orikubaasa kugamba nawe.

18 # 2 Sam 17:28, 29; Kut 32:13; Enf 21:14. Abigaili yaakoresa obwira, yaagira emigaati magana abiri, n'efurebe ibiri za viinyo, n'enyama y'entaama itaano eteekire gye, n'encuro itaano z'engano ezikarangire, n'emitsitsa igana y'emizaabibu eyomire, kandi n'ebiihuro magana abiri by'ebijuma by'emitiini, yaabita aha ndogoya, 19yaagira abatsigazi be ati: Muunyebembere; niinyija kubakurata. Kwonka tiyaabigambira iba Nabali. 20Ku yaabaire ari aha ndogoya naashuuma omu rukiizi rw'ekibungo, reeba Daudi n'abantu be nabo baashuuma nibareebana nawe, baabugaabugana. 21#Zab 109:5; 1 Pet 3:17. Kandi Daudi akaba agizire ati: Buzimazima nkahendekyera busha kurinda ebintu ebi ekyo kishaija kyabaire kiine omu ihamba byona; tihaagira kintu kyona omu bintu byakyo ekyabura; nkamukorera gye, mbwenu yanzimuurira ebibi. 22Nyowe Daudi ku ndaahitsye omu kasheeshe hakiriho ekyetwa omwojo omu bantu be boona, Ruhanga akinture n'okukiraho.

23Abigaili ku yaareebire Daudi, yaarahuka yaaruga aha ndogoya ye, yaajuumara omu maisho ga Daudi, yainama ahansi. 24Yaamukwata amaguru naagira ati: Mukama wangye, ekyo kibi kibe niinye kyabarirwa. Ninkweshengyereza ikiriza omuzaana waawe agire eki yaakugambira, naiwe ohurire ebigambo by'omuzaana waawe. 25Mukama wangye, ninkweshengyereza, reka kweta ahari ogwo mushaija mubi Nabali; ahakuba oku arikwetwa, nikwo arikushusha; #25:25 Nabali amakuru ngu omushema. Nabali niryo iziina rye, n'obushema butuura bumwezingiriire; kwonka nyowe omuzaana waawe tindeebire batsigazi baawe abu otumire, mukama wangye; nindahira MUKAMA otahwaho, kandi ninkurahira, timbareebire. 26N'ahabw'ekyo mukama wangye, nk'oku MUKAMA akuzibiire kwehoorera enzigu n'omukono gwawe, okagiibwaho orubanja rw'eshagama, reka abazigu baawe n'abarikukutengyera kubi, mukama wangye, babe nka Nabali. 27#Kut 33:11. Mbwenu ngugu omutoijo ogu omuzaana waawe yaakureetera, mukama wangye, guheebwe abatsigazi abarikugyendana mukama wangye. 28#Bir 33:29; Mat 10:29, 30; Byak 17:28. Ninkweshengyereza saasira omuzaana waawe ekyo kibi, ahakuba MUKAMA taribura kukwombekyera enju ehamire; ahabw'okuba mukama wangye, niiwe orwana engamba za MUKAMA, kandi torireebwaho kibi ebiro byona ebi orimara omu nsi. 29#1 Sam 28:3. Kandi n'obu abantu baimukire kukuhiiga n'okwenda kukwita, mukama wangye, amagara gaawe garyakomwa hamwe na MUKAMA Ruhanga waawe omu mutwaro gumwe gw'abahuriire; kwonka amagara g'abazigu baawe aryagarekyera nk'eibaare ry'enjungu. 30Mbwenu MUKAMA ku ariba yaaherize kuhikiiriza ebirungi byona ebi yaakugambireho, akakugira omugabe wa Israeli, 31nyetsya eki kitarikusaasa nari okukureetera okwefuuza ahabw'okusheesha eshagama y'abataine rubanja nari okwehoorera enzigu. Kandi MUKAMA ku ariba yaakukoreire ebirungi, Nyakusinga, oijukye omuzaana waawe.

32Daudi yaagarukamu Abigaili ati: MUKAMA Ruhanga wa Israeli, owaakwohereza kumbugana eri izooba, asiimwe. 33Kandi obwengye bwawe busiimwe, naiwe osiimwe ahabw'okunzibira eri izooba kwehoorera enzigu n'omukono gwangye, nkagiibwaho orubanja. 34Ninkurahira MUKAMA Ruhanga wa Israeli owanzibira kukukora kubi, kuri noogira ngu tiwaarahuka kwija kumbugana, bwaba nibuza kusheesha hatakiriho ekyetwa omwojo omu bantu ba Nabali. 35Atyo Daudi yaayakiira ebi yaamutoijera, yaamugira ati: Yeinamukire owaawe n'obusingye; ebi waagamba naabihurira, n'ebi waashaba naabiikiriza.

36 # Isa 5:11; Luk 21:34. Bwanyima Abigaili yaagaruka owa Nabali, yaashanga ateekire obugyenyi omu nju ye, oburikushusha nk'obw'omugabe; kandi agwirwe gye omu mutima, ahabw'okuba akaba asinzire munonga; n'ahabw'ekyo Abigaili tiyaagira ki yaamugambira kyona okuhitsya omu kasheeshe. 37Ku bwaseesire, Nabali amaarwa gaamurugaho, omukazi we yaamuteekyerereza ebyo byona, omutima gwa Nabali gwamuhwa omunda, yaaba nk'ekiti. 38#2 Sam 6:7; Yob 12:10; Byak 12:23. Ku haahingwireho ebiro ikumi, MUKAMA yaamuteera, yaafa.

39 # Enf 22:23; Zab 7:16. Daudi ku yaahuriire ngu Nabali yaafa, yaagira ati: MUKAMA asiimwe, owaanyihaho ekijumo eki Nabali anjumire, akazibira omwiru we kukora ekibi; kandi MUKAMA azimuuriire Nabali obubi bwe. Bwanyima Daudi yaatuma ahari Abigaili, naamuresya kumutwara, ngu abe omukazi we. 40Abagaragwa ba Daudi ku baahikire Karumeeli owa Abigaili, baamugira bati: Daudi yaakututumaho kumukutwarira, ngu obe omukazi we. 41#Rus 2:13. Yaabandatuka, yainika omutwe ahansi, yaagira ati: Reeba, nyowe omuzaana we ndi ow'okunaabisa ebigyere by'abagaragwa ba mukama wangye. 42Ahonaaho Abigaili yaimuka, yaatemba endogoya, aine abazaana be bataano bamukuratiire; yaakurata entumwa za Daudi, yaaba omukazi we.

43 # 2 Sam 3:2. Kandi Daudi yaashwera Ahinoamu owa Yezereeli; bombi baaba abakazi be. 44#2 Sam 3:14. Kwonka Saulo akaba yaahingiire Paluti mwene Laishi owa Galimu muhara we Mikaali, owaabaire ari muka Daudi.

Currently Selected:

1 Samueli 25: RR64

Highlight

Copy

Compare