1 Samueli 24

Saulo okugumizamu naahiga Daudi

1 # 1 Sam 23:28. Saulo ku yaatabaarukire naaruga kubinga Abafilistia, abantu baamugira bati: Reeba, Daudi ari omu ihamba rya Eni-geedi. 2Saulo nikwo kutoorana engabo enkumi ishatu omuri Israeli yoona, akazitwara, akaza kusherura Daudi n'abantu be aha nkiri z'aha izaagiriro ry'enzaza. 3Ku yaahikire aha ngombe z'entaama ezaabaire ziri aha rubaju rw'omuhanda, yaashangaho enyanga, yaagitaahamu kuza aha ishaazi. Kandi Daudi n'abashaija be bakaba bari hare omunda y'egyo nyanga. 4#1 Sam 26:8. Abashaija ba Daudi baamugira bati: Eri niryo izooba eri MUKAMA yaakugambiire naagira ati: Reeba, ndyahayo omuzigu waawe omu mikono yaawe, omugire nk'oku orikwenda. Bwanyima Daudi yaimuka, yaagyenda naashooba, yaashara aha mukugiro gw'omunagiro gwa Saulo. 5Kwonka ku yaaherize kukora atyo, yaashinjwa omu mutima ahabw'okushara ahari ogwo munagiro; 6#1 Sam 26:11; Yob 31:29, 30. yaagira abashaija be ati: Nikikabure nyowe okukora ntyo mukama wangye, ou MUKAMA yaashukireho amajuta, okumubangira omukono, haza MUKAMA yaamushukireho amajuta. 7#Zab 7:4; Rom 12:17. Atyo Daudi yaazibira abashaija be, tiyaabaikiriza kwita Saulo. Bwanyima Saulo yaimuka, yaaruga omu nyanga, yaagyenda.

8Bwanyima Daudi nawe yaimuka, yaaruga omu nyanga, yaayeta Saulo naagira ati: Nyakusinga mukama wangye. Saulo ku yaagarwire amaisho enyima, Daudi yainama, yaamutangirira. 9Daudi yaabuuza Saulo ati: Ahabw'enki noohurira ebi abantu barikukugambira ngu, Daudi naayenda kukukora kubi? 10Mbwenu tiwaayereebera ku MUKAMA yaaba akuhaireyo omu mikono yangye eri izooba, obu waaba ori omu nyanga? Nangwa hariho abamwe abangambira kukwita, kwonka nyowe naakusaasira, naagira nti: Tindikwija kugorora mukono gwangye ahari mukama wangye, ahakuba niwe MUKAMA yaashukireho amajuta. 11#1 Sam 23:28. Kandi Taata, reeba omukugiro gw'omunagiro gwawe; nk'oku naashara omukugiro gw'omunagiro gwawe, ntakwite, ekyo kikumanyise kandi oreebe ku hatariho kibi nari obugomi omuriinye; kandi ku ntakakucumurahoga, n'obu oraabe otuura noohiiga amagara gangye kugaihaho. 12#Yob 5:8. MUKAMA abe niwe yaatucwera orubanja twembi, kandi abe niwe yaakumpoorera; kwonka omukono gwangye gurekye kuba nigwo gwakwita. 13Nk'oku enfumu y'aba kare egira eti, Ebibi biruga omu babi; kwonka omukono gwangye tigurikukoraho. 14Beitu omugabe wa Israeli aizire kuteera oha? Ou ohiigire n'oha? Ohiigire embwa efiire, ohiigire omura. 15#Zab 35:1. N'ahabw'ekyo MUKAMA abe omuramuzi waitu twembi, atucwere orubanja, areebe, antonganire, akunjune. 16#1 Sam 26:17. Daudi ku yaaherize kugambira Saulo ebigambo ebyo, Saulo yaagira ati: Mwana wangye Daudi, eryo n'eiraka ryawe? Saulo yaayeha eboroogo, yaarira. 17#Kur 9:27. Yaagaruka yaagira Daudi ati: Wankiza okuhikiirira; ahakuba waanyihura ebirungi, haza nyowe nkwihwire ebibi. 18Kandi eri izooba waayoreka butunu ku wankora gye, ahabw'okuba tiwaanyita n'obu MUKAMA yampayo omu mikono yaawe. 19Noogira ngu omuntu akaareeba omuzigu we, amureka, agyenda? N'ahabw'ekyo MUKAMA akuzimuurire ebirungi ahabw'eki wankorera eri izooba. 20#1 Sam 23. Kandi reeba, hati nimmanya ku otaribura kuba omugabe, n'obugabe bwa Israeli ku burihamibwa omu mikono yaawe. 21N'ahabw'ekyo ndahira MUKAMA ku otaricwekyereza ruzaaro rwangye naarugaho, kandi ku otarimaraho iziina ryangye omu nju ya tata. 22Daudi yaamurahira. Saulo yaagaruka owe; kwonka Daudi yainamuka yaagaruka omu kigo n'abantu be.

Currently Selected:

1 Samueli 24: RR64

Highlight

Copy

Compare