1 Samueli 2

Okusiima kwa Hanna

1Bwanyima Hanna yaasiima naagira ati:

Omutima gwangye nigwesiimira omuri MUKAMA;

Eihembe ryangye ritunguuriirwe omuri MUKAMA;

N'akanwa kangye nikashekyerera abazigu bangye,

Ahakuba ninshemerererwa okujuna kwawe.#Fil 4:6; Luk 1:46; Zab 13:5.

2Tihariho orikwera nka MUKAMA,

Tihariho ondiijo kureka Iwe wenka;

Kandi tihariho Rukiri ori nka Ruhanga waitu.#Kur 15:11; Isa 6:3; Zab 73:25.

3Mutagaruka kugamba eby'okwehimbisa;

N'eby'amaryo birekye kuruga omu kanwa kaanyu;

Ahakuba MUKAMA ni Ruhanga orikumanya byona;

Kandi niwe arenga ebi abantu bakora.#Mal 3:13.

4Amata g'amamanzi gahendekire;

Kwonka abarikutsibaaza beezirikire amaani.

5Abaabaire nibaiguta, hati nibakorera eby'okurya;

N'abaabaire baine enjara, tibakigiine.

Eego, engumba ezaire mushanju,

N'ow'abaana baingi atentebukire.#Luk 1:53; Zab 113:9; Isa 54:1.

6MUKAMA aita, kandi akiza;

Ashuumya okuzimu, kandi aihayo.#Bir 32:39; Hos 6:1; Yoh 11:25, 26.

7MUKAMA ainaza, kandi atungisa;

Agarura ahansi, kandi atunguura.#Yob 5:11; Zab 75:7.

8Aimutsya abooro omu mucuucu,

Aiha abakyene omu rubungo,

Kubashutamya n'abanyiginya,

Kandi n'okuhungura ekitebe ky'ekitiinisa;

Ahakuba enyomyo z'ensi n'eza MUKAMA,

Kandi nizo yaagihangiriize.#Dan 4:17; 1 Sam 15:17; Yak 2:5; Kush 3:21.

9Aryarinda ebigyere by'abarikwera be,

Kwonka ababi baryahwerekyererera omu mwirima;

Ahakuba tihariho muntu orisinguza amaani ge.#Zab 91:11.

10Abarwanisa MUKAMA baryacwanyagurika;

Abahindireho naayema omu iguru.

MUKAMA aryacwera emperu z'ensi orubanja.

Aryaheereza omugabe we amaani,

Atunguure eihembe ry'ou yaashukireho amajuta.#Zab 96:13.

11Bwanyima Elukaana yaagaruka omu ka ye Raama; kandi omwana yaaguma naaheereza MUKAMA omu maisho ga Eli omunyamurwa.

Ebibi bya beene Eli

12 # Rom 1:28. Kandi batabani ba Eli bakaba bari abantu abataine mugasho, abatarikumanya MUKAMA. 13Ogu nigwo gwabaire guri omucwe gw'abo banyamurwa omu mitwarize yaabo n'abantu. Omuntu weena ku yaabaire atamba ekitambo, omuheereza w'omunyamurwa aija bakiteekire enyama, aine orwoma rw'amaino ashatu omu ngaro; 14arucumita omu safuriya, nari omu binika, nari omu nyungu, nari omu rwabya; ekintu kyona eki orwoma rwabaire rujaburamu, nikyo omunyamurwa yaabaire atwara. Okwo nikwo baabaire batwaza Abaisraeli boona abaabaire baza Shiilo. 15Kandi ebishaju ku byabaire biba bitakookiibwe, omuheereza w'omunyamurwa akaba aija, agira orikutamba ati: Mpa enyama y'okwokyeza omunyamurwa; ahabw'okuba tarikwenda eteekire, kureka embisi. 16Kandi ogwo muntu akimugarukamu ati: Ka babanze bootsye ebishaju, obone kutwara ei orikwenda yoona, onu amugarukamu ati: Ngaaha! gimpe hati; kandi ku oraayangye, ningitwaza amaani. 17#Mal 2:8; Rom 2:24. Okwo nikwo ekibi ky'abo batsigazi kyabaire kihango omu maisho ga MUKAMA; ahabw'okuba bikareetera abantu kutambira MUKAMA ebitambo babitamirwe.

Samueli okutandika kuheereza MUKAMA

18 # Kur 28:4. Samueli akatandika kuheereza MUKAMA akiri omwana muto, ajwaire efodi ya kitaani. 19Kandi nyina akaba amubaziirira akakooti, akamutwarira buri mwaka, nainamuka na iba kutamba ekitambo kya buri mwaka. 20Kandi Eli akaba ashabira Elukaana n'omukazi we omugisha naagira ati: MUKAMA akuhe oruzaaro omuri ogu mukazi omu mwanya gw'ogu ou yaahongyeire MUKAMA. Batyo bagaruka owaabo. 21#Luk 2:40. Bwanyima MUKAMA yaataayaayira Hanna, yaagira enda, yaazaara abaana b'aboojo bashatu n'abaishiki babiri. Omwana ogwo Samueli yaakurira omu maisho ga MUKAMA.

Ebya beene Eli n'ekifubiro kyabo

22Omu bunaku obwo Eli akaba ahikire omu ngingo zaabukuru; yaaguma naahurira byona ebi abatabani baabaire nibakora omu Baisraeli boona, kandi n'oku barikushambana n'abakazi, abaabaire baheereza aha muryango gw'Eihema ry'okubugaabuganiramu. 23Yaababuuza ati: N'enki ekirikubakoresa ebirikushusha bityo? Ahakuba nimpurira omu bantu boona eby'emicwe yaanyu emibi. 24Ngaaha, baana bangye! Ebi ndikuhurira abantu nibabagambaho ti birungi; nimusiisisa abantu ba MUKAMA. 25#Bir 2:30; Enf 15:10; Yoh 12:39, 40. Omuntu ku arikushiisha ahari mugyenzi we, Ruhanga naamucwera orubanja; mbwenu omuntu ku arikushiisha ahari Ruhanga, n'oha orikubaasa kumweshengyerereza? Kwonka baayanga kuhurira ishebo, ahakuba MUKAMA akaba naayenda kubaita.

26 # Luk 2:40; Rom 14:18. Ogwo mwana Samueli yaagumizamu naakura, naasiimwa MUKAMA n'abantu.

27 # 1 Bag 13:1. Bwanyima haija omuntu wa Ruhanga ahari Eli, yaamugira ati: MUKAMA naagira ati: Noomanya ku naayeyorekire eka ya sho, obu baabaire bari omu buhuuku bw'enju ya Faraho. 28#Kur 28:1. Niwe naatooraine omu nganda zoona eza Israeli kuba omunyamurwa wangye, okuza aha itambiro ryangye, okwotera obubaane, n'okujwara efodi omu maisho gangye. Kandi nkaha oruganda rwa sho empongano z'Abaisraeli zoona ez'ebitambo by'okwotsya omu muriro. 29#Bir 32:15; Mal 1:12. Mbwenu ahabw'enki nimureebesa omururu ebitambo byangye n'empongano zangye, ezi naaragiire kumpongyera, okaha batabani baawe ekitiinisa okunkira, ngu mweyitirire n'ebicweka ebirikukira oburungi by'empongano zoona ezi abantu bangye Abaisraeli barikumpongyera? 30#Zab 18:20; 91:14; Yoh 5:44; 12:26; Mal 2:9. Nikyo MUKAMA, Ruhanga wa Israeli, arikugirira ati: N'ekya buzima nkaba ngizire nti; Ab'enju yaawe n'ab'enju ya sho nibo bariguma nibaheereza omu maisho gangye ebiro byona; mbwenu hati MUKAMA naagira ati: Nikikabure! ahakuba abarikumpa ekitiinisa, nibo ndikiha; kwonka abarikungaya, baryagaywa. 31Reeba, ebiro nibiija, obu ndimaraho amaani gaawe n'ag'enju ya sho, hakabura omugurusi omu nju yaawe. 32Kandi omu kubonabona kwawe oryareebesa eihari ebirungi byona ebi Abaisraeli bariheebwa omu Butaaho bwangye; n'omu nju yaawe tiharibamu mugurusi ebiro byona. 33Ku harigira omuntu waawe owaahonokaho, akatsigara aha itambiro ryangye, aryaba ow'okukuhwereza amaisho noorira, n'okukusaasa omutima; oruzaaro rw'enju yaawe rwona ruryahenderwa omunyeeto. 34#1 Sam 4:11. Ako kagwe akarigwera batabani baawe bombi, Hofuni na Finehaasi, karyakubeera akamanyiso; bombi baryafa eizooba rimwe. 35#1 Bag 2:35; Heb 2:17; 7:26-28; 2 Sam 7:11. Naanye ndyayeimukiza omunyamurwa orikwesigwa, orikora nk'ebindi aha mutima n'omu biteekateeko oku biri. Ndyamwombekyera enju ehamire; kandi aryaheerereza omu maisho g'ou naashukireho amajuta ebiro byona. 36#1 Bag 2:27. Bwanyima weena oriba yaatsigaireho omu nju yaawe, aryaija, amukwate amaguru ngu amuhe akacweka k'efeeza nari omugaati, amushabe ati: Ninkweshengyereza, mpa omurimo gumwe aha y'abanyamurwa, beitu nkaabona ak'okurya.

Currently Selected:

1 Samueli 2: RR64

Highlight

Copy

Compare